قىتايدىڭ ۇلتتىق مۇناي- گاز كورپوراتسياسى الماتىدا ۇلكەن ديامەترلى قۇبىر شىعاراتىن زاۋىت سالادى

بۇل تۋرالى قازاقستاندىق جۋرناليستەرگە اتالعان كورپوراتسيانىڭ ديرەكتورلار كەڭەسىنىڭ ءتوراعاسى ۋاڭ يلين ءمالىم ەتتى.
«ەڭ بىرىنشىدەن، مەن قۇرمەتتى پرەزيدەنت مىرزانىڭ ءبىزدىڭ دەلەگاتسيامەن كەزدەسكەنى ءۇشىن زور ريزاشىلىعىمدى بىلدىرەمىن. ءبىزدىڭ كومپانيا 20 جىلعا جۋىق ۋاقىتتان بەرى قازاقستاننىڭ مۇناي- گاز نارىعىندا جۇمىس ىستەۋدە. وسى كەزەڭ ارالىعىندا ءبىزدىڭ جوبالارىمىز تابىستى جۇزەگە اسىرىلىپ جاتىر. بۇگىن ءبىز پرەزيدەنت ن. نازاربايەۆپەن قازاقستانداعى ءبىزدىڭ ىنتىماقتاستىعىمىزدى كەڭەيتۋ مۇمكىنشىلىكتەرىن تالقىلادىق. قازاقستاننىڭ قۇرمەتتى پرەزيدەنتىنىڭ قىتايعا مەملەكەتتىك ساپارى اياسىندا ءبىز مۇناي- گاز يندۋسترياسى ءۇشىن ۇلكەن ديامەترلى قۇبىرلار شىعاراتىن زاۋىت قۇرىلىسى تۋرالى كەلىسىمگە قول قويۋدى جوسپارلاۋدامىز. بۇل ىنتىماقتاستىقتىڭ جاڭا باعىتى بولماق»، - دەدى ول ق ح ر- دىڭ «دياويۋيتاي» مەملەكەتتىك رەزيدەنتسياسىندا ق ر پرەزيدەنتى نۇرسۇلتان نازاربايەۆپەن كەزدەسۋىنەن كەيىن.
ونىڭ ايتۋىنشا، زاۋىتتى الماتىنىڭ يندۋستريالىق پاركى اۋماعىندا سالۋ جوسپارلانۋدا. جوبا 150 ميلليون دوللارعا باعالانۋدا.
سونىمەن قاتار CNPC استانادا جوعارى حورەوگرافيالىق مەكتەپ قۇرىلىسىنا دا قولداۋ بىلدىرەتىن بولادى. «بۇل جوباعا پرەزيدەنت ن. نازاربايەۆتىڭ ءوزى باستاماشى بولعان. ن. نازاربايەۆتىڭ قولداۋىمەن جانە ق ح ر ءتوراعاسى شي جينپيڭنىڭ ءجىتى نازار اۋدارۋىمەن بىزدەر قازاقستانداعى ىنتىماقتاستىعىمىزدى كەڭەيتە تۇسەتىن بولامىز. بىزدەردىڭ ءوزارا ءىس- قيمىلىمىزدىڭ تابىستى بولۋى ەكى مەملەكەت حالقىنىڭ ءال- اۋقاتىن جاقسارتا تۇسەتىندىگىنە سەنىمدىمىز»، - دەدى ۋاڭ يلين.
ەستەرىڭىزگە سالا كەتەيىك، ن. نازاربايەۆتىڭ قىتايعا مەملەكەتتىك ساپارى 3- قىركۇيەككە دەيىن جالعاسادى. بەيسەنبى كۇنى ەلباسى قىتاي حالقىنىڭ جاپون باسقىنشىلارىنا قارسى سوعىستاعى جەڭىسىنىڭ 70 جىلدىعىنا ارنالعان سالتاناتتى پارادقا قاتىسادى.
اۆتور: مارلان جيەمباي