ەلباسى: قازاقستاندى اۆتوكراتيا دەپ سىناۋدىڭ رەتى جوق
بۇل تۋرالى بۇگىن استاناداعى تاۋەلسىزدىك سارايىندا قازاقستان رەسپۋبليكاسى اتا زاڭىنىڭ 20 جىلدىعىنا ارنالعان «كونستيتۋتسيا: بىرىلىك، تۇراقتىلىق، وركەندەۋ» تاقىرىبىنداعى حالىقارالىق عىلىمي- تاجىريبەلىك كونفەرەنتسيادا ەلباسى نۇرسۇلتان نازاربايەۆ ءمالىم ەتتى.
(اۆتوكراتيا - مەملەكەتتە ءبىر ادامنىڭ شەكتەۋسىز، باقىلاۋسىز بۇتىندەي بيلەۋىنە نەگىزدەلگەن باسقارۋ ءتۇرى.)
«مەن بىلەمىن، كەيبىر كەزدەردە ءبىزدى اۆتوكراتيادا سىناپ جاتادى. اۆتوكراتيا جونىندە قالايشا ايتۋعا بولادى، ءاربىر 4-5 جىلدا جالپى حالىقتىق داۋىس بەرۋدە حالىق ءوزىنىڭ پرەزيدەنتىن، پارلامەنتىن سايلايدى، ياعني ەركىن بالامالى سايلاۋدا تاڭداۋ جاسايدى. بىزگە باتىس ەلدەرى ءومىر ءسۇرىپ جاتقان دەموكراتيا جولى بويىنشا جىلدام جىلجۋ كەرەكتىگىن ايتىپ جاتادى. ءبىز وسىنىڭ بارلىعىن تۇسىنەمىز. دەموكراتيا - ادامزاتتىڭ دامۋىنىڭ جالپى داڭعىل جولى، ءبىز سولاي جىلجىپ كەلەمىز. الايدا ءبىز ازيالىق قوعام ەكەنىمىزدى، سونداي- اق باتىسقا قاراعاندا، ەرەكشە ءداستۇرىمىز بار ەكەنىن ۇنەمى ەسكەرۋدەمىز»، - دەدى پرەزيدەنت.
وسى ورايدا ەلباسى ازيالىق وڭىردە ءدىني، مادەني كوزقاراستار وزگەشە ەكەنىن، سوندىقتان دا بايىپپەن العا جىلجۋ كەرەكتىگىن اتاپ ءوتتى.
«ياعني، ءبىزدىڭ ومىرلىك ءىس- ارەكەتىمىزدى باعالاۋ كەزىندە دوستارىمىزعا ەڭ الدىمەن ازيالىق قوعامنىڭ جۇيەسىنە، تاريحىنا، مادەنيەتىنە، داستۇرىنە تەرەڭدەپ ۇڭىلۋىنە كەڭەس بەرەر ەدىم. ەگەر مەملەكەت قۇرىلىسىنا قادامىمىز اسىعىس تۇردە ساياسي ابستراكتىلى جۇيەلەرگە ارنالسا، وندا ءبىز ساتسىزدىككە جول بەرەر ەدىك. بۇنى ءبىز جاقىن كورشىلەس ەلدەردىڭ ۇلگىسىنەن كورىپ وتىرمىز. اتاپ ايتقاندا، بۇنداي ساتسىزدىك اپاتتى دەڭگەيدە بولار ەدى»، - دەپ ءتۇيدى ن. نازاربايەۆ.
اۆتور: رۋسلان عابباسوۆ
