ەلىمىزدە العاش رەت يىلگىش تاستار شىعارىلا باستادى

استانا. قازاقپارات - شىمكەنتتە قۇرىلىسقا قاجەتتى ماتەريالدىڭ جاڭا ءتۇرى شىعارىلا باستادى. «يىلگىش تاس» دەپ اتالاتىن جاپسىرما ءۇي ءىشىن بەزەندىرىپ، عيمارات سىرتىن قاپتاۋعا قولايلى.

 شىنى جاسايتىن قۇم مەن يىلگىش زاتتان جاسالاتىن  قۇرىلىس ماتەريالى جەڭىل ءارى ەكولوگيالىق جاعىنان دا تازا. ەرلى- زايىپتى كاسىپكەرلەر جاڭا تەحنولوگيانىڭ قىر- سىرىن كورشى رەسەيدەن ۇيرەنىپ كەلىپتى.

شاعىن سەحتىڭ جۇمىس باستاعانىنا از عانا ۋاقىت بولسا دا قايناعان قىزۋ تىرلىك ءجۇرىپ جاتىر. قىزمەتكەرلەر يىلگىش تاستىڭ جاسالۋ جولدارىن تولىق مەڭگەرىپ العان. ءتىپتى ءسان ۇلگىسىنىڭ   حاس شەبەرلەرلەرى دەۋگە بولادى. كادىمگى قۇمدى بەزەندىرىپ، ءتۇرلى تاستىڭ تابيعي كەسكىنىن شىعارادى.

ەرلى- زايىپتىلار بۇل جوبانى باستاماس بۇرىن ىشكى نارىقتىڭ قىر- سىرىن ابدەن تەكسەرىپ بارىپ، ىسكە كىرىسىپتى. اياق الىستارى جامان ەمەس. تاۋلىگىنە  250-330 شارشى مەتر ءونىم شىعارىپ جاتىر. «قازاقستاندا جاسالعان» دەگەن ساۋدا بەلگىسىمەن شىعىپ جاتقان قۇرىلىس زاتتارىنىڭ وزگەلەرگە قاراعاندا باعاسى دا ارزان. ساپاسى الدە قايدا جوعارى.

ىشكى نارىققا جاڭالىق رەتىندە ەنىپ وتىرعان وتاندىق تاۋارلاردىڭ جاسالۋ تەحنولوگياسى وتە وڭاي. يىلگىش تابيعي زاتقا قۇم بۇركۋ ارقىلى جابىستىرىلادى. وعان 12 ءتۇرلى قوسپا قوسىلادى. دايىن ءونىم ءبىر تاۋلىك كەپكەننەن كەيىن يىلگىش بولىپ شىعا كەلەدى.

مامانداردىڭ پىكىرىنشە، بۇل ىستىققا ءتوزىمدى. سۋىققا شىدامدى كەلەدى ەكەن. كاسىپ يەسى دارحان رەسەيدە وقىپ ءجۇرىپ، ءاربىر قوندىرعىنىڭ سىزباسىن قاعازعا ءتۇسىرىپ الىپتى. ەلگە كەلگەن سوڭ سوعان قاراپ قاجەتتى قۇرال- سايمانداردىڭ ءبارىن وزدەرى جاساپ العان. العاشقى ونىمدەرىن سىناقتان دا وتكىزىپ كورىپتى. ناتيجە جامان ەمەس. يىلگىش تاسپەن ءۇيدىڭ ىشكى قابىرعالارىنان باستاپ، قاسبەتتەرى مەن باعانالاردى، ءتىپتى سۋرەتتەردى دە بەزەندىرۋگە بولادى ەكەن. قالاۋىڭا قاراي كەسىپ الىپ جابىستىرا بەر. جەڭىل ءارى يىلگىش. تەز قۇراستىرىلادى.

دارحان ءومىرزاقوۆ، كاسىپكەر:

 - جاي قۇمسىلاقپەن سالىستىرعاندا مىنانداي تابيعي تەكتەس فاكتۋرانى جاساۋ مۇمكىنشىلىگ جوق. ال يىلگىش تاستىڭ مۇمكىندىگى وندايعا بار. تازا تابيعي تاس تەكتەس. وسى قالپىندا وسى ءتۇسىن، وسى تەگىن ساقتاپ قالادى 20 جىل بويى.

 وسىلايشا، ءوز كۇشتەرىمەن يگىلىكتى ءىس باستاعان ەرلى- زايىپتىلار ەندى الدا وتەتىن «جىلدىڭ ۇزدىك تاۋارى» جارمەڭكەسىنە قاتىسۋعا بەكىنىپ وتىر. كاسىپكەرلەر قازاقستاندا بالاماسى جوق ەكولوگيالىق تازا وتاندىق تاۋاردىڭ ءوز ۇمىتتەرىن اقتايتىندارىنا سەنىمدى.

www.24.kz