قازاقستاندا شىعارىلعان «سامپو ازيا» جاڭا كومباينى سىناقتان ءوتتى - فوتو

پەتروپاۆل. قازاقپارات - سولتۇستىك قازاقستان وبلىسى اققايىڭ اۋدانى شاعلى اۋىلىنىڭ اۋىلشارۋاشىلىق تاجىريبەلىك ستانساسىنىڭ ەگىس تاناپتارىندا ەگىستىك كۇنى ءوتتى.

 شاراعا ايماقتىڭ 300 دەن استام ديحانى قاتىستى.

وسىندا پەتروپاۆلداعى «قاز تەح ماش» زاۋىتىندا شىعارىلعان «سامپو ازيا» جاڭا استىق جينايتىن كومباينى تانىستىرىلدى. وتاندىق ءوندىرۋشىنىڭ شىعارعان جاڭا جيناۋ تەحنيكاسىنىڭ جۇمىسىن ايماق باسشىسى ەرىك سۇلتانوۆ تا تەكسەرىپ كوردى.

«سوڭعى رەت 1978 - جىلى س ك-5 «نيۆا» كومباينىندا جۇمىس ىستەگەن ەدىم. بۇل ودان الدەقايدا جاقسى»، - دەدى ايماق باسشىسى.

جاڭا كومبايننىڭ باعاسى - 46 ميلليون تەڭگە. 10 - قىركۇيەككە دەيىن زاۋىتتا 50 ماشينا شىعارۋ جوسپارلانىپ وتىر.

«سامپو ازيا» كومباينى پەتروپاۆلدا شىعارىلادى. قازاقستاندا قۇراستىرىلعان. بۇگىن ەگىستىككە سىناقتان ءوتۋ ءۇشىن ءبىرىنشى رەت شىقتى. بۇل ماشينا «دجون دير»، «كلاس» كومبايندارىنان كەم ەمەس. كومباين 6 كلاۆيشالىق، استىقتىڭ 30 پايىزعا دەيىنگى ىلعالدىلىعى جاعدايىندا جيناي الادى. قوزعالتقىشى فينليانديالىق - 260 اتتىڭ كۇشىنە تەڭ»، - دەپ اقپاراتتاندىردى «قاز تەح ماش» ج ش س لوگيستيكا ءبولىمىنىڭ باسشىسى مۇراتبەك دوسجانوۆ.