ەلباسى بيىلعى پرەزيدەنتتىك سايلاۋعا بارۋىنىڭ سەبەبىن ايتتى

بۇل تۋرالى ەلباسى نۇرسۇلتان نازاربايەۆ بۇگىن اقوردادا نەگىزگى ەكسپورتتاۋشى كومپانيالار باسشىلارىنىڭ قاتىسۋىمەن ءوتىپ جاتقان كەڭەستە ءمالىم ەتتى.
«بارلىق ىستەلىپ جاتقان شارۋا حالىقتىڭ قامى ءۇشىن. تاۋەلسىزدىك جىلدارىندا از قيىنشىلىقتار بولعان جوق. سونىڭ بارلىعىنان سۇرىنبەي ءوتىپ جاتقان سەبەبىمىز - ول ەلدىڭ بىرلىگى. حالىقتىڭ ويىنىڭ ءبىر جەردەن شىققاندىعى. وسى داعدارىستىڭ كەلە جاتقانىن مەن بۇرىننان ءبىلدىم. ايتپەسە، مەن بيىلعى سايلاۋعا بارار ما ەدىم ، بارماس پا ەدىم؟! دەگەنمەن دە ءدال وسىنداي قيىنشىلىقتان ەلدى الىپ شىعۋ قاجەتتىگى الدىمدا تۇرعانىن سەزىندىم. سوندىقتان حالىققا ايتاتىنىم، اۋىزبىرشىلىكتىڭ ارقاسىندا داعدارىستان امان- ەسەن شىعامىز»، - دەدى پرەزيدەنت.
ەلباسى دۇنيەجۇزىندە بولىپ جاتقان داعدارىستىڭ اسەرىنەن بۇرىنعىدان باسقاشا جاڭا ەكونوميكا ءوسىپ كەلە جاتقاندىعىن، سوندىقتان الداعى سىن- قاتەردى ەڭسەرىپ، قيىنشىلىقتارعا توتەپ بەرۋگە قاۋقارلى ەكەنىمىزدى اتاپ ءوتتى.
اۆتور: رۋسلان عابباسوۆ