اتىراۋ وبلىسىنىڭ اكىمى ءۇش جىلدىق جۇمىسى بويىنشا ەسەپ بەردى

اتىراۋ. قازاقپارات - اتىراۋ وبلىسىنىڭ اكىمى باقتىقوجا ىزمۇحامبەتوۆ مۇنايلى ايماق باسشىسى قىزمەتىندە اتقارعان ءۇش جىلدىق جۇمىسى بويىنشا ەسەپ بەردى.

«سوڭعى ءۇش جىلدا جالپى ايماقتىق ءونىمنىڭ كولەمى 3,2 تريلليون تەڭگەدەن 4 تريلليون تەڭگەگە دەيىن وسكەن. 2015 - جىلى ايماق ەكونوميكاسىندا دا وڭ ديناميكا بايقالىپ وتىر. ءبىزدىڭ وبلىسىمىزدىڭ ەلدىڭ ءج ءى ءو- گى ۇلەسى 10,8 پايىزدان 12,4 پايىزعا دەيىن وسكەن. جالپى ىشكى ءونىم جان باسىنا شاققاندا شامامەن 6 ميلليون تەڭگەدەن 7 ميلليون تەڭگەگە دەيىن ارتقان. ەگەر 2012 - جىلى اتىراۋ وبلىسى مەملەكەتتىك بيۋدجەتكە 365 ميلليارد تەڭگە سالىق تۇسىمدەرىن تۇسىرسە، 2014 - جىلى بۇل سوما 625,7 ميلليارد تەڭگەگە جەتكەن. اعىمداعى جىلدىڭ ءبىرىنشى جارتىجىلدىعىنىڭ بولجامى 110,5 پايىزعا ورىندالدى» ، - دەپ اتاپ ءوتتى اكىم.

ب. ىزمۇحامبەتوۆتىڭ ايتۋىنشا، سوڭعى ءۇش جىل بويى الەۋمەتتىك- ەكونوميكالىق دامۋدىڭ نەگىزگى كورسەتكىشتەرى بويىنشا اتىراۋ وبلىسى رەسپۋبليكا وڭىرلەرىنىڭ اراسىندا 1-2 - ورىندار الىپ وتىر.

«ءبىراق جالپى العاندا قارقىندى دامىپ وتىرعان وبلىس تۋرالى ايتا كەلە، ءبىز اۋداندار بويىنشا كورسەتكىشتەردىڭ بىردەي ەمەس ەكەنىن ۇمىتپاۋىمىز كەرەك. الەۋمەتتىك- ەكونوميكالىق دامۋ رەيتينگىسىندە اتىراۋ قالاسى جانە جىلىوي، قىزىلقوعا، يندەر، ماحامبەت اۋداندارى دامىعان نەمەسە ورتاشا دامىعان وڭىرلەر قاتارىندا بولسا، ال يساتاي، ماقات، قۇرمانعازى اۋداندارىنىڭ دامۋ قارقىنى ازىرگە تومەن بولىپ وتىر. بۇل جاعداي وبلىس رەيتينگىنە كەرى اسەرىن تيگىزۋدە. سوندىقتان اۋداندىق جانە قالالىق اكىمدىكتەر الەۋمەتتىك- ەكونوميكالىق دامۋ قارقىنىنىڭ جاندانۋىنا ودان دا كوپ كۇش سالۋى ءتيىس»، - دەدى وبلىس اكىمى.

يندۋستريالاندىرۋ باعدارلاماسىنىڭ اياسىندا وبلىستىڭ سوڭعى ءۇش جىلدىڭ ىشىندەگى نەگىزگى جەتىستىكتەرى تۋرالى ايتا كەلە، ب. ىزمۇحامبەتوۆ وڭىردە بۇرىن شىعارىلماعان ونىمدەردىڭ كوپتەگەن تۇرلەرى وندىرىلە باستاعانىن اتاپ ءوتتى.

 «سولاردىڭ اراسىندا «اتىراۋ مۇنايماش» ءىرى كولەمدى جانە اۋىر مەتالل قوندىرعىلارىن جيناۋ ءوندىرىسىن، «شيەۆرون مۇناي ينك» قۇبىر جۇرگىزۋ ارماتۋراسىن شىعارۋ زاۋىتىن، ەكى تۇرعىن ءۇي قۇرىلىس كومبيناتىن، «پەرۆومايسكي» ا ق ءسۇت- تاۋارلىق بۇيىمدارى فەرماسىن، «سارايشىق» تۇقىمدى شارۋاشىلىعىنىڭ» ەشكى فەرماسىن، ءبىر تونناعا دەيىن قارا ۋىلدىرىق الۋ جوسپارلانىپ وتىرعان «كاسپيان رويال فيش» فەرماسىنىڭ بەكىرە بالىعىن ءوسىرۋ زاۋىتىن ەرەكشە اتاپ وتكىم كەلەدى»، - دەپ اتاپ ءوتتى باقتىقوجا ىزمۇحامبەتوۆ.