الماتىدا ەنەرگيا ۇنەمدەيتىن ۇيلەر سالۋ جوباسىن جۇزەگە اسىراتىن ءوندىرىس ورنى ت م د- داعى ەڭ ءىرى زاۋىت اتانباق - فوتو
بۇگىندە ءىرى مەگاپوليس سانالاتىن الماتى قالاسىندا سالىنىپ جاتقان ۇلكەن عيماراتتاردىڭ اينەكتەرىنىڭ بارلىعى دەرلىك «قاز اينەك قۇرىلىس» كومپانياسىنىڭ ونىمدەرى ەكەندىگى راس.
ولاردىڭ ىشىندە ساۋدا ورىندارى، مادەني ورتالىقتار، بيزنەس ورتالىقتار، اۋەجايلار، قوناق ۇيلەر، سپورت سارايلارى بار.
كەشە يندۋستريالاندىرۋدىڭ ەكىنشى كەزەڭىنە اسقارالى ماقساتپەن اياق باسىپ وتىرعان «قاز اينەك قۇرىلىس» كومپانياسىنىڭ الماتىداعى شىنى وڭدەۋ زاۋىتىنا بارىپ، ءوندىرىس پروتسەسىن ءوز كوزىمىزبەن كورىپ قايتتىق.
«قاز اينەك قۇرىلىس» - ورتالىق ازياداعى ەڭ ءىرى شىنى وڭدەۋ زاۋىتى. ول قۇرىلعالى بەرى 250 نىسان شىنىمەن قاپتالدى. 2,5 ميلليون شارشى مەتر اينەك شىعارىلدى.
ايتا كەتۋ كەرەك، 2014 - جىلى مەملەكەت باسشىسى نۇرسۇلتان نازاربايەۆ «قاز اينەك قۇرىلىس» كومپانياسىنىڭ استاناداعى زاۋىتىن سالتاناتتى تۇردە ىسكە قوسقان بولاتىن.
استانا مەن الماتىداعى ەكى زاۋىتتىڭ وندىرىستىك قۋاتى جىلىنا 880 مىڭ شارشى مەتر شىنى پاكەتتەرىن شىعارۋعا مۇمكىندىك بەرەدى. زاۋىت ىشىندە ءونىمنىڭ ساپاسىن تەكسەرەتىن تەحنيكالىق زەرتحانا بار. ءوندىرىس ورنى ەڭ زاماناۋي قۇرال- جابدىقپەن قامتىلعان.
بۇل زاۋىتتا بۇگىندە 140 ادام ەڭبەك ەتىپ وتىر.
ەڭ الدىمەن، شەتەلدەن جەتكىزىلگەن شيكىزات - شىنى LISEC (اۆستريا) جابدىعىندا قاجەتتى پىشىندە كەسىلەدى.
ودان سوڭ شىنىنى قاۋىپسىز ەتۋ ءۇشىن ءارى تەسۋ ءۇشىن يتالياندىق Busetti Intermac Forvet وندىرىستىك جەلىلەرى قولدانىلادى. بۇل كەزەڭدە شىنىنىڭ قىرلارى دوعالدانىپ، شەتىندەگى قىسىم الىنادى. سوندا شىنى ءتوزىمدى كەلەدى.
ودان كەيىن قاۋىپسىز شىنى Tamglass ستانوگىندا شىڭدالادى. تەمپەراتۋراسى 700 گرادۋس بولاتىن پەشتە شىڭدالعان شىنى وڭدەلمەگەن شىنىدان 5 ەسە مىقتى بولادى. ونداي ونىمنەن كوبىنە بالكون، باسپالداق جاقتاۋلارى، فاساد جاسالادى.
سونداي- اق، زاۋىتتا شىنىنى ءتۇرلى تۇسكە بوياپ، ءتۇرلى قاجەتتى پىشىندە بۇگۋگە مۇمكىندىك بەرەتىن ستانوكتار بار. تاپسىرىس ءتۇسىپ جاتسا، ءتۇرلى پىشىندەگى شىنى پاكەتتەرى ساناۋلى مينۋتتاردا دايىن بولادى.
بۇگىنگى تاڭدا ەنەرگوتاسىمالداۋشىلاردىڭ باعاسىنىڭ ارتۋىنا بايلانىستى ساۋلەت سالاسىندا تۇرعىن ءۇي بولسىن، كوممەرتسيالىق عيمارات بولسىن ەنەرگيا ۇنەمدەيتىن شىنى پاكەتتەرىن شىعارۋعا باسا ءمان بەرىلىپ وتىر.
وسىنداي جىلۋ شىعارمايتىن، سۋىق كىرگىزبەيتىن ساپالى ءونىم اۆتوماتتى شىنى پاكەتىن قۇراۋ جۇيەسىندە جاسالادى.
ەرەكشە تالعامپاز كليەنتتەر ءۇشىن اينەككە باسپامەن سۋرەت باسۋعا مۇمكىندىك بەرەتىن سيفرلىق باسپا سەحى جۇمىس جاساپ تۇر.
مۇندا قاجەتتى سۋرەت كەراميكالىق كراسكا ارقىلى شىنىنىڭ قۇرامىنا تەرەڭ ەندىرىلەدى. سوسىن شىڭداۋ پەشىندە 700 گرادۋس ىستىقتا شىڭدالادى.
كومپانيانىڭ ماركەتينگ بويىنشا ديرەكتورى باسىموۆ دارىننىڭ ايتۋىنشا، زاۋىت ونىمدەرى «جاسىل ەكونوميكا» پرينتسيپتەرىنە تولىقتاي جاۋاپ بەرەدى.
«2017 -جىلى ەلىمىزدە «ەكسپو-2017» كورمەسى وتەدى. ونىڭ نەگىزگى قۇرىلىس ماتەريالدارىنىڭ ءبىرى - اينەك. ءبىزدىڭ زاۋىتىمىز ەڭ الدىمەن سول ەكسپو نىساندارىن تولىق قامتاماسىز ەتۋى كەرەك. سونداي- اق، قازىر قازاقستاندا قۇرىلىس قارىشتاپ دامىپ كەلەدى. ءبىزدىڭ ءونىمىمىز، ءبىرىنشى كەزەكتە ەكولوگيالىق تۇرعىدان قاۋىپسىز، ەنەرگيا ۇنەمدى، جازدا كۇننىڭ ىستىعىن، قىستا سۋىقتى وتكىزبەيدى. ءونىمنىڭ قاۋىپسىزدىگىن ارتتىرۋ ءۇشىن ەۋروپادان 3 پەش اكەلىنگەن. ونىڭ بارلىعى 100 پايىزعا تولىق جۇمىس ىستەپ جاتىر. ەكىنشىدەن، ءبىز ورتا ازيا ەلدەرىندە ءبىرىنشى بولىپ باسپامەن فاساد ءوندىرۋدى يگەردىك. ونىڭ ەرەكشەلىگى ۇزاققا شىداپ، عيماراتقا كوركەم كەلبەت بەرەدى. مۇنداي فاسادتار تەك استانا ەمەس، الماتىنىڭ كوپتەگەن عيماراتتارىنا «دوستىق پلازا»، «مەگا» دەگەن ساۋدا ورتالىقتارىنا قويىلدى. سونداي- اق، ونىمدەرىمىزدى ورتا ازيا ەلدەرىنە ەكسپورتتاپ وتىرمىز. بولاشاقتا ەكسپورت نارىعىن دا كەڭەيتىپ، مونعولياعا شىعارساق دەگەن ويىمىز بار»، - دەدى د. باسىموۆ.
ايتا كەتۋ كەرەك، «قاز اينەك قۇرىلىس» كومپانياسى 3 جىل قاتارىنان يننوۆاتسيالىق گرانت ۇتىپ الدى. «دامۋ» قورىنىڭ «ءوندىرىس» ، «ءوندىرىس-2» باعدارلامالارىنىڭ اياسىندا جەڭىلدەتىلگەن نەسيەگە دە قول جەتكىزگەن.
قازىر استاناداعى زاۋىتتا 80 ادام جۇمىس جاساپ جاتىر. الماتىدا 140 ادام ەڭبەكتەنۋدە.
اتالعان كومپانيا باسشىلىعى بيزنەستىڭ الەۋمەتتىك جاۋاپكەرشىلىگىن دە ەستەن شىعارمايدى.
كەلەر جىلى زاۋىت الماتى اكىمىنىڭ شەشىمى بويىنشا الاتاۋ يندۋستريالىق ايماعىنان بولىنگەن 6 گ ا جەرگە كوشەدى.
جاڭا ءوندىرىس ورنى - الماتى زاۋىتىنان ەكى ەسە ۇلكەن، ت م د ەلدەرىندەگى ەڭ ءىرى زاۋىت بولادى.
كومپانيا باسشىلىعى ەسكى زاۋىتتىڭ ورنىندا «قولجەتىمدى باسپانا-2020» باعدارلاماسى بويىنشا اۋدانى 110 مىڭ شارشى مەتر بولاتىن 22 تۇرعىن ءۇي سالىپ، 1611 ادامدى باسپانامەن قامتىماقشى.
ولاردىڭ جارتىسى كەزەكتەگى باسپاناعا مۇقتاج ادامدار بولسا، جارتىسى «قاز قۇرىلىس اينەك» كومپانياسىندا 10 جىلدان بەرى جۇمىس ىستەپ كەلە جاتقان ارداگەر قىزمەتكەرلەرگە بەرىلەدى. ۇيلەردى ساتۋ «سامۇرق- قازىنا» جىلجىمايتىن مۇلىك قورى ارقىلى جۇزەگە اسپاق. جاڭا تۇرعىن ءۇي كەشەنى جىلۋ ەنەرگياسىن ۇنەمدەۋ تەحنولوگياسىمەن سالىنادى. جىلۋ قۋاتىن ۇنەمدەيتىن شىنى پاكەتتەرىن قولدانۋ 30 پايىزعا دەيىن ەنەرگيا شىعىنىن ازايتۋعا مۇمكىندىك بەرەدى. بۇل - ەنەرگيا ۇنەمدەيتىن ۇيلەر سالۋ بويىنشا الماتىداعى قانات قاقتى جوبا بولماق.
اۆتور: گۇلميرا عوسمانالي
