پاۆلودارلىق كاسىپكەر قۇرعاق بيە ءسۇتىن ەۋروپا جانە رەسەي نارىعىنا شىعارماق
قازىرگى تاڭدا «التاي» شارۋا قوجالىعىنا لاتۆيا ەلى مەن رەسەيدىڭ سانكت-پەتەربۋرگ قالاسىنان قۇرعاق بيە سۇتىنە ءىرى كولەمدەگى تاپسىرىستار تۇسكەن.
كاسىپكەر ساتبەك مۋكين جاڭا جوبانىڭ قۋاتتىلىعى تاۋلىگىنە 180 ليتردى قۇرايتىنىن ايتادى.
«قازىرگى تاڭدا ەۋروپالىق تۇتىنۋشىلار ۇلتتىق سۋسىننىڭ كەپتىرىلگەن تۇرىنە زور قىزىعۋشىلىق تانىتىپ وتىر. بيەنىڭ قۇرعاق ءسۇتىن وندىرەتىن جاڭا سەحتى 2016-جىلدىڭ قاڭتار-اقپان ايىندا ىسكە قوسۋدى جوسپارلاۋدامىن. جوبانىڭ قۋاتتىلىعى تاۋلىگىنە 180 ليتر بيە سۇتىنەن 18 كەلى قۇرعاق ءونىم الۋعا مۇمكىندىك بەرەدى. ءبىر كەلى ۇنتاقتىڭ الەمدىك نارىقتاعى باعاسى شامامەن 360-400 ەۋرو تۇرادى. جۋىردا قاراعاندى وبلىسىنداعى 500 جىلقى وسىرىلەتىن قوجالىققا بارىپ، قۇرعاق بيە ءسۇتىن شىعارۋ تەحنولوگياسىنىڭ قىر-سىرىن مەڭگەردىم»، - دەيدى س. مۋكين.
شارۋا قوجالىعى يەسىنىڭ ايتۋىنشا، ستاندارتتىق تالاپتارعا ساي ءونىم الۋ ءۇشىن «چەچەل» ىرىمشىگىن شىعارۋمەن اينالىساتىن پاۆلودارلىق كاسىپكەر ولەگ تولماچيەۆپەن بىرىگىپ، ارنايى قوندىرعى ساتىپ الۋ بويىنشا كەلىسىم-شارت جاسالعان. ۇلى بريتانيادان ساتىپ الىناتىن كەپتىرۋ جابدىعىنىڭ قۇنى - 370 مىڭ ەۋرو.
«مامانداردىڭ ايتۋىنشا، ۇنتاقتالعان قۇرعاق بيە ءسۇتى پايداسى جاعىنان انا سۇتىمەن تەڭ دەسە بولادى. جالپى، قۇرعاق بيە ءسۇتىن فارماتسيەۆتيكالىق، كوسمەتولوگيالىق ونەركاسىپتە پايدالانۋعا بولادى. اسىرەسە، قۇرعاق بيە ءسۇتى بالالار مەن سپورتتىق تاعامداردى ءوندىرۋ سالاسىندا تاپتىرمايتىن دۇنيە. سوندىقتان، ونىمىمىزگە سۇرانىس ءاردايىم جوعارى بولادى دەگەن سەنىم جوق ەمەس. «التاي» ش ق- نىڭ قىمىزى حالىقارالىق ساپا سەرتيفيكاتىنا يە. 2009-جىلى قازاقستاننىڭ اتىنان بەرليندە وتكەن «زەلەنايا نەدەليا» اتتى حالىقارالىق كورمەگە قاتىستىق»، - دەيدى ساتبەك مۋكين.
ايتا كەتەرلىگى، قازىرگى تاڭدا اۋىل شارۋاسى قىمىزدى شولمەككە قۇيىپ ساتۋدا. فەرماداعى 1000 عا جۋىق ساۋىندى بيە وسىرىلەدى. تاۋلىگىنە 400-دەن استام ليتر سۋسىن شىعارىلىپ، استانالىق تۇتىنۋشىلارعا جەتكىزىلەدى.
اقمارال ەسىمحانوۆا
Bnews.kz
