قازاقستان مەن ءۇندىستان مۇناي ۇڭعىماسىن بۇرعىلاۋ بويىنشا بىرلەسكەن جوبانى ىسكە قوسادى
بۇل تۋرالى استانادا ءۇندىستاننىڭ پرەمەر- ءمينيسترى نارەندرا مودي ءمالىم ەتتى.
«مەن ءدارىس وقۋ ءۇشىن نازاربايەۆ ۋنيۆەرسيتەتىنەن ارتىق لايىقتى ورىن تابا المادىم»، - دەدى قازاقستانعا ساپارمەن كەلگەن نارەندرا مودي اتالعان ۋنيۆەرسيتەتتە ءسوز سويلەگەن كەزىندە.
«مەن ورتالىق ازياداعى ءبىزدىڭ ءوزارا قارىم- قاتىناسىمىزدىڭ جاڭا ءداۋىرىن باستاۋ ءۇشىن كەلدىم. ءۇندىستان قازاقستانمەن جاڭا تابىستى ارىپتەستىكتە ينۆەستيتسيا سالۋعا دايىن. ءبىز تەك مينەرالدار، ەنەرگەتيكادا عانا ەمەس، ونەركاسىپ، فارماتسيەۆتيكا، توقىما، ينجەنەريا، شاعىن جانە ورتا بيزنەس سالاسىندا دا جۇمىس ىستەيمىز»، - دەپ قوستى ول.
ونىڭ ايتۋىنشا، ءۇندىستان اۋىل شارۋاشىلىعى جانە ءسۇت ونىمدەرىن ءوندىرۋ، سونداي- اق ءداستۇرلى مەديتسينادا دا ىنتىماقتاستىققا نيەت تانىتىپ وتىر.
«ءبىز مۇناي وڭدەيتىن، مۇناي حيميا ونىمدەرىن شىعاراتىن جانە مينەرالدى تىڭايتقىشتار زاۋىتىنا، سونداي- اق جاستارعا قولايلى جاعداي جاساۋ ءۇشىن اقپاراتتىق جانە بايلانىس تەحنولوگيالارىنا ينۆەستيتسيا سالا الامىز. بۇگىن مەن استانادا ءۇندىستاندىق سۋپەركومپيۋتەرمەن جابدىقتالعان الدىڭعى قاتارلى تەحنولوگيا ورتالىعىن اشامىن»، - دەپ مالىمدەدى ءۇندىستان پرەمەر- ءمينيسترى.
«ءۇندىستان سونىمەن قاتار، عارىش سالاسىندا ىنتىماقتاستىقتى كەڭەيتۋگە مۇددەلى»، - دەپ اتاپ ءوتتى نارەندرا مودي.
ءبىزدىڭ ىنتىماقتاستىعىمىز قورعانىس جانە قاۋىپسىزدىك سالاسىندا دامىپ كەلەدى. ەنەرگەتيكالىق سەكتورداعى ساۋدا دا كەڭەيۋدە. ءبىراز ۋاقىتتان سوڭ قازاقستانداعى ءۇندىستان ينۆەستيتسياسىنىڭ قاتىسۋىمەن ءبىرىنشى مۇناي ۇڭعىماسىن بۇرعىلاۋدى ىسكە قوسامىز. ءبىز سونداي- اق، ارىپتەستىكتى دامىتۋ مەن رەسۋرستاردى باسقارۋدا عارىش تەحنولوگيالارىنداعى جەتىستىكتەردى پايدالانۋعا مۇمكىندىگىمىز بار»، - دەپ ءسوزىن تۇيىندەدى ءۇندىستان ۇكىمەتىنىڭ باسشىسى.
