مەملەكەتتىك قىزمەتتە كوماندامەن «كوشۋ» ازايتىلادى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگى ءتوراعاسىنىڭ ورىنباسارى سايان احمەتجانوۆ ءمالىم ەتتى.
«ءبىر مەملەكەتتىك قىزمەتتەن ەكىنشى مەملەكەتتىك قىزمەتكە كوشۋ ازايتىلادى. تولىعىمەن الىنىپ تاستالادى دەۋگە دە بولادى. دەگەنمەن ساياسي مەملەكەتتىك قىزمەتتەگى ءبىرىنشى تۇلعالارعا قىزمەت ەتەتىن لاۋازىمدار عانا كوشە الادى. ولار: كەڭەسشىلەر، كومەكشىلەر، باسپا ءسوز حاتشىلارى. وزگە مەملەكەتتىك قىزمەتتەگى ىشكى اۋىسۋلار مەملەكەتتىك قىزمەتكەرلەر اراسىنداعى اشىق بايقاۋ ارقىلى وتكىزىلەدى. جالپى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگى جاساقتاعان بارلىق تەتىكتەردى جاڭعىرتۋ بويىنشا ۇلتتىق كوميسسيا ماقۇلدادى»، - دەپ اتاپ ءوتتى ول.
س. احمەتجانوۆتىڭ مالىمدەۋىنشە، جاڭا جۇيە الەمدەگى مەملەكەتتىك قىزمەت قۇرىلىمى ەڭ وزىق 30 ەلدىڭ تارتىبىنە جاقىن كەلەدى. مۇنداي قادام قازىرگى جاھاندانۋ داۋىرىندە زاماناۋي تالاپتاردىڭ دەڭگەيىنەن تابىلادى.
سونىمەن بىرگە شەنەۋنىكتەر اراسىنداعى سىبايلاس جەمقورلىقتى دا تومەندەتىپ، مەملەكەتكە شىنايى، ادال قىزمەت ەتۋ ۇلگىسىن قالىپتاستىرۋ كوزدەلۋدە. بۇرىنعىداي باستىق دەگەن ءسوز دە قولدانىستان الىنادى دا، تەك قانا پرەزيدەنت اكىمشىلىگى مەن قۇقىق قورعاۋ ورگاندارىندا عانا ساقتالىپ قالادى.
اۆتور: جاسۇلان جولدىبايەۆ
