قازاقستاندىقتار ۇلتتىق قۇندىلىقتارىمىزدىڭ اينالاسىندا بىرىگۋى قاجەت - دەپۋتات و. اسانعازى
و. اسانعازىنىڭ ايتۋىنشا، قازىرگى «100 ناقتى قادامدا» دا، بەس ينستيتۋتسيونالدى رەفورمادا دا كوتەرىلىپ وتىرعان ماسەلە - ءبىزدىڭ بىرتەكتى مادەنيەتىمىز.
«ەلباسىنىڭ تاۋەلسىزدىك العاننان بەرگى ارمانى - ەلدىڭ بىرلىگى. وسى بىرلىك جۇيەلى مەملەكەتتىك ساياساتتان جانە ورتاق مادەنيەتتەن تۇرادى.
ياعني، ساياساتىمىزدىڭ سارابدال بولۋى، تاۋەلسىزدىك العاننان بەرى الەۋمەتتىك- ساياسي جاعدايدا جەتكەن جەتىستىگىمىزدىڭ دۇرىس ەكەنىنە كوزىمىز جەتتى»، - دەيدى ول.
دەپۋتاتتىڭ ايتۋىنشا، قازاقتىڭ بايىرعى، باياندى، عاسىردان عاسىرعا ۇزىلمەي كەلە جاتقان مادەنيەتى - بۇكىل قازاقستاندىقتاردى بىرىكتىرە الاتىن مادەنيەت.
«سوندىقتان، ءبىز، قازاقستاندىقتار بىرتەكتىلىك جاعدايىنا كەلگەن كەزدە، وسىنىڭ ىرگەتاسىن قالايتىن ۇلتتىق قۇندىلىقتارىمىز تۋرالى ايتا كەتۋىمىز كەرەك. بىرتەكتىلىككە كەلەتىن بولساق، ناۋرىز مەيرامى - ناعىز بىرلىكتىڭ مەرەكەسى، ارازداسقاندى دوستاستىراتىن، بارلىق وكپەنى ۇمىتتاندىراتىن مەرەكە. جالپى، سىرعا سالۋدان باستاپ قىز ۇزاتۋ، ۇيلەنۋ تويى سياقتى قازاقتىڭ كەز- كەلگەن ءداستۇرى جاڭا زامانعا لايىقتالىپ، بۇرىنعىنى جاڭارتا وتىرىپ، وتە كەرەمەت مادەنيەتكە اينالدى. ايتىس ونەرىنىڭ ءوزى - بۇرىنعى تاريحىمىزدى ءتىرىلتتى جانە ناعىز دەموكراتياعا اينالدى. وسىنىڭ بارلىعى، قازاقتىڭ مادەنيەتى بۇكىل قازاقستاندىقتاردى بىرىكتىرە الاتىنىن كورسەتىپ وتىر. سوندىقتان، بىرتەكتىلىك دەگەندە، بىرتەكتى مادەنيەت دەگەندە، ءبىز قايدا بىرىگەمىز دەسەك، ءبىز ۇلتتىق قۇندىلىقتارىمىزدىڭ، قازاق مادەنيەتىنىڭ اينالاسىندا بىرىگۋىمىز كەرەك»، - دەپ اتاپ ءوتتى ول.
«مەملەكەتتى قۇرايتىن ۇلت - قازاق ۇلتى. دەگەنمەن، قازاقستاننىڭ جەرىن مەكەندەپ وتىرعان كەز- كەلگەن ەتنوسقا راقمەتتەن باسقا ايتارىمىز جوق. قانداي بيىك مىنبەر بولسىن، قانداي مادەني جارىس بولسىن، كەز- كەلگەن ۇلتتىڭ وكىلى قازاقتىڭ سالتىن سىيلايتىنىن دالەلدەيدى. جالپى، ۇلتتى ۇلت ەتىپ قورعايتىن، مەملەكەتتى مەملەكەت ەتىپ الما- عايىپ كەزەڭنەن الىپ شىعاتىن ونىڭ رۋحاني قورعانىسى دەيتىن بولساق، ءبىزدىڭ قازاقستاندىقتارعا ءوز مادەنيەتىن وقۋعا كەلگەندە كەم قالىپ جاتقان تۇس - مەملەكەتتىك ءتىلىمىزدىڭ جاعدايى»، - دەدى دەپۋتات.
اۆتور: جاسۇلان جولدىبايەۆ
