ك. ءماسىموۆ: الداعى بەس جىلدا شيكىزات تاۋارلارىنا الەمدىك باعانىڭ جوعارىلاۋى كۇتىلمەيدى
بۇگىن ق ر پارلامەنتى پالاتالارىنىڭ بىرلەسكەن وتىرىسىندا ق ر ۇكىمەتىنىڭ جانە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ 2014 - جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن تالقىلاۋ بارىسىندا دەپۋتاتتار ساۋالىنا جاۋاپ بەرگەن ۇكىمەت باسشىسى كارىم ءماسىموۆ وسىلاي ءمالىم ەتتى.
«بىلتىرعى جىلدىڭ ەكىنشى جارتىسىندا ءبىرقاتار ەكونوميكالىق پروتسەستەر كۇرت باياۋلادى. ءبىزدىڭ نەگىزگى ەكسپورتتىق تاۋارلارىمىزعا، مۇناي مەن باسقا دا شيكىزاتتارعا باعا وزگەردى. بۇل بيۋدجەتتىڭ اتقارىلۋىنا دا اسەر ەتتى، ءبىز سودان تۋىنداعان قاجەتتىلىككە وراي، بيۋدجەتتى تۇزەتتىك. ءبىزدىڭ ويىمىزشا، تاياۋداعى 3-5 جىلدا ءبىز رەسۋرستارعا، شيكىزاتتىق تاۋارلارعا باعانىڭ تومەندەۋ داۋىرىندە ءومىر سۇرەتىن بولامىز. سوندىقتان دا، الداعى بيۋدجەتتى قالىپتاستىرۋ بارىسىندا شيكىزاتتىق تاۋارلارعا باعانىڭ تومەندىگى ەسكەرىلەدى»، - دەدى كارىم ءماسىموۆ.
ۇكىمەت باسشىسىنىڭ ايتۋىنشا، بۇنداي جاعداي ءبىرقاتار باعدارلامالاردى قايتا قاراۋدى دا تالاپ ەتەدى. «باعدارلامالار عانا ەمەس، بيۋدجەتتىك شىعىستار دا قايتا قارالۋعا جاتادى. وسىعان وراي، ءبىز دەپۋتاتتىق كورپۋستىڭ قولداۋىنا سەنەمىز»، - دەدى پرەمەر- مينيستر.
اۆتور: قانات مامەتقازى ۇلى
