حالىقارالىق قاۋىمداستىقتا «قازاقستاندىق جول» مەن «نازاربايەۆ مودەلى» ۇعىمدارى بەرىك قالاندى - ق. جاقىپوۆ

استانا. قازاقپارات - حالىقارالىق ساياسات جانە ساراپشىلار قاۋىمداستىعىندا «قازاقستاندىق جول» مەن «نازاربايەۆ مودەلى» ۇعىمدارى بەرىك قالاندى.

بۇگىن پارلامەنت ءماجىلىسىنىڭ سپيكەرى قابيبوللا جاقىپوۆ استانادا ءوتىپ جاتقان قازاقستان حالقى اسسامبلەياسىنىڭ 20 جىلدىعىنا ارنالعان «قازاقستاندىق جول: بىرلىك. پاتريوتيزم. رەفورمالار» اتتى حالىقارالىق كونفەرەنسيادا وسىلاي مالىمدەدى.

«جاھاندانۋ جاعدايىندا كەز كەلگەن جەرگىلىكتى قاقتىعىستار ولاردىڭ كەڭەيۋى ىقتيمالدىعىنا، اسكەري جانە ەكولوگيالىق كاتاستروفالار، حالىقتىڭ جاپپاي كوشۋى مۇمكىندىگىنە بايلانىستى بۇكىل الەمدىك قاۋىمداستىققا قاتەر توندىرەتىنى بەلگىلى. وسى تۇرعىدان الساق بەيبىتشىلىك پەن كەلىسىمدى قامتاماسىز ەتۋ - بۇل كەز كەلگەن مەملەكەتتىڭ بولاشاعى ءۇشىن اسا ماڭىزدى، اسا جاۋاپكەرشىلىكتى ساياسي قۇندىلىق، ەڭ اقىرى بۇل - بارشا ادامزات وركەنيەتى ءۇشىن وزەكتى. سوندىقتان دا، ەلىمىزدى جەدەل جاڭعىرتۋ جاعدايىنداعى ەتنيكاارالىق جانە كونفەسسياارالىق بەيبىتشىلىكتى قامتاماسىز ەتۋدىڭ قازاقستاندىق تاجىريبەسىن حالىقارالىق قاۋىمداستىق جوعارى باعالاپ وتىر»، - دەدى ق. جاقىپوۆ.

بۇل رەتتە ءماجىلىس ءتوراعاسى حالىقارالىق ساياسات جانە ساراپشىلار قاۋىمداستىعىندا «قازاقستاندىق جول» جانە «نازاربايەۆ مودەلى» سەكىلدى ۇعىمدار بەرىك قالانعانىن اتاپ ءوتتى. ونىڭ ايتۋىنشا، بۇل ەڭ الدىمەن «الدىمەن - ەكونوميكا، سونان سوڭ - ساياسات» قاعيداتى بويىنشا جۇيەلى ەكونوميكالىق رەفورمالار مەن حالىقتىڭ ءال اۋقاتىن جاقسارتۋدى قامتاماسىز ەتۋ ەسەبىنەن جۇزەگە اسىپ وتىر.

«قازاقستاندىق جولدىڭ» ەكىنشى اجىراماس بولىگى ەلدىڭ ىشكى جاعىندا بەيبىتشىلىك پەن كەلىسىمدى ساقتاۋ، جالپىادامزاتتىق جانە جالپى ۇلتتىق ءداستۇرلى قۇندىلىقتاردى نىعايتۋ. ال «قازاقستاندىق جولدى» ەرەكشەلەندىرەتىن ءۇشىنشى ماڭىزدى ماسەلە - بۇل پراگماتيكالىق جانە جاۋاپكەرشىلىكپەن جۇزەگە اسىرىلىپ جاتقان سىرتقى ساياسات»، - دەدى ق. جاقىپوۆ.

اۆتور: قانات مامەتقازى ۇلى