ەلباسى: نازاربايەۆ ۋنيۆەرسيتەتىنىڭ تۇلەكتەرى ەڭ الدىمەن قازاقستانعا قىزمەت ەتۋى ءتيىس
«قازىر ەندى بولاشاقتارىڭ ءوز قولدارىڭدا. كەيبىرىڭ شەتەلدىك ۋنيۆەرسيتەتتەرگە باراسىڭدار، باسقا بىرەۋىڭ وسىندا قالاسىڭدار، قالعاندارىڭ دۇنيەجۇزىلىك كومپانيالارعا جۇمىسقا ورنالاسىپ جاتىرسىڭدار. ءبىراق، مەنىڭ ايتايىن دەگەنىم، ەڭ الدىمەن وتانعا قىزمەت ەتىڭدەر. قازاقستاننىڭ كومپانيالارى قازىر سىزدەردىڭ ارالارىڭنان بىلىكتى مامانداردى الىپ، ەلىمىزدىڭ يگىلىگىنە جۇمىس ىستەتۋى كەرەك. قازاقستاننىڭ وركەندەۋىنە قىزمەت ەتۋ كەرەكسىڭدەر. وتاننىڭ بەرگەنىن ون ەسە قايتارۋلارىڭ كەرەك. سولاي ەمەس پە؟» - دەدى مەملەكەت باسشىسى.
ايتا كەتەيىك، 2010 - جىلى قازاقستان پرەزيدەنتىنىڭ باستاماسىمەن قۇرىلعان بۇل وقۋ ورنى وتاندىق ءبىلىم بەرۋدىڭ ۇزدىك ۇلگىسى بولىپ تابىلادى. بيىل ۋنيۆەرسيتەتتى 446 ستۋدەنت ءتامامداپ وتىر. تاراتىلعان مالىمەتتەرگە قاراعاندا، جالپى وقۋ ورنى اشىلعاننان بەرى جەتى مەكتەپتەگى ستۋدەنتتەر سانى 2800 گە دەيىن جەتتى. جىل سايىن 500 ادام وقۋ گرانتىنا يە بولۋدا. ماگيسترانتتار مەن دوكتورانتتار دا مەملەكەتتىك ءبىلىم بەرۋ تاپسىرىسى بويىنشا ءبىلىم الادى.
ايتا كەتەيىك، بۇگىن سونىمەن قاتار نازاربايەۆ ۋنيۆەرسيتەتىنىڭ جاڭا بەس قاباتتى عيماراتى اشىلدى. بۇل نىسان ەلوردانىڭ تۇران كوشەسى بويىندا ورنالاسقان.
«سىزدەرگە ومىرگە جولداما بەرە وتىرىپ، ءبىز ءوزىمىزدىڭ اسقاق ماقساتىمىزعا ءبىرشاما جاقىنداي تۇسەمىز. بۇل - ءبىزدىڭ سىزدەرمەن بىرلەسكەن ورتاق جەڭىسىمىز. قىمباتتى دوستار، بۇگىن ءبىز بارلىعىمىز بىرلەسىپ، سالتاناتتى ساتتەردى باستان كەشىرۋدەمىز. بىرىنشىدەن، مەنىڭ استانادا عىلىم- ءبىلىم ورتالىعىن قۇرۋ ارمانىم ورىندالدى. ءبىز ۋنيۆەرسيتەتتىڭ ەندىگى ۋاقىتتا قالىپتاسقانىن كورىپ وتىرمىز» ، - دەدى ەلباسى.
ن. نازاربايەۆ ءدال وسى كۇن ۋنيۆەرسيتەت تاريحىندا قالاتىندىعىن ءارى العاشقى تۇلەكتەرمەن ۋنيۆەرسيتەتتىڭ دايىندىق دەڭگەيى باعالاتىندىعىن باسا ايتتى.
«ۋنيۆەرسيتەت ءىزاشارلارى سىزدەردىڭ سوڭدارىڭىزدان كەلەسى تۇلەكتەر جاڭا ومىرگە اتتاناتىن بولادى. دەگەنمەن، ءبىرىنشى بولۋ باقىتى سىزدەرگە بۇيىردى»، - دەدى مەملەكەت باسشىسى.
اۆتور: مارلان جيەمباي
