قۇزىرلى ورگاندار كالاچي مەن بەرەزوۆكاداعى جاعدايدى انىقتاي الماسا، شەتەلدىكتەرگە تاپسىرۋى كەرەك ەدى - ەلباسى
بۇگىن اقوردادا وتكەن قاۋىپسىزدىك كەڭەسىنىڭ كەزەكتى وتىرىسىندا ەلباسى نۇرسۇلتان نازاربايەۆ وسىلاي ءمالىم ەتتى.
بۇل تۋرالى اقوردانىڭ باسپا ءسوز قىزمەتىنەن حابارلادى.
وتىرىس بارىسىندا ەكولوگيالىق قاۋىپسىزدىك ماسەلەلەرى، قورشاعان ورتانى قورعاۋ سالاسىنداعى قابىلدانىپ جاتقان شارالار تالقىلاندى.
نۇرسۇلتان نازاربايەۆ اقمولا وبلىسىنداعى كالاچي جانە باتىس قازاقستان وبلىسىنداعى بەرەزوۆكا اۋىلدارى تۇرعىندارىنىڭ دەنساۋلىعىن قورعاۋعا قاتىستى ماسەلەلەردى تەزدەتىپ رەتتەۋ قاجەتتىگىن ايتتى. وسىعان بايلانىستى حالىقتىڭ وزدەرى تۇراتىن وڭىردەگى ەكولوگيالىق احۋال تۋرالى اقپاراتقا ەركىن قولى جەتۋىن قامتاماسىز ەتۋدىڭ ماڭىزدىلىعى اتاپ ءوتىلدى.
- كالاچي اۋىلىنداعى قۇبىلىستىڭ سەبەبى نەدەن ەكەنىن ءالى ەشكىم دۇرىستاپ تۇسىندىرگەن جوق. قۇزىرلى ورگاندار جاعدايدى انىقتاي الماسا، قاجەتتى ساراپشىلارى جوق بولسا، وندا شەتەلدىكتەردى شاقىرىپ، بۇل ءىستى سولارعا تاپسىرۋى كەرەك ەدى، - دەدى مەملەكەت باسشىسى.
قازاقستان پرەزيدەنتى ەكولوگيالىق قاتەرلەردى بولجاپ، الدىن الۋدىڭ ءتيىمدى تەتىكتەرىن جاساۋ تەحنوگەندى جانە تابيعي سيپاتتاعى توتەنشە جاعدايلاردان بولاتىن شىعىندى مەيلىنشە ازايتۋعا مۇمكىندىك بەرەتىنىنە نازار اۋداردى.
