اسكەري قاقتىعىستاردىڭ يسلام الەمىنىڭ بەسىگى - مەككە مەن ءمادينا ماڭىندا ورىن الىپ جاتقانى الاڭداتادى - ن. نازاربايەۆ
بۇگىن استانادا الەمدىك جانە ءداستۇرلى دىندەر ليدەرلەرىنىڭ سەزى اياسىنداعى ءدىن ليدەرلەرى كەڭەسىنىڭ Ⅱوتىرىسىندا ءسوز سويلەگەن ق ر پرەزيدەنتى نۇرسۇلتان نازاربايەۆ وسىلاي مالىمدەدى.
ەڭ الدىمەن ەلباسى الەمدىك جانە ءداستۇرلى دىندەر ليدەرلەرىنىڭ 5- سەزىنە قاتىسۋعا كەلگەن بارشا دەلەگاتسيا باسشىلارىنا العىسىن ايتىپ، ونىڭ اياسىنداعى كەڭەستىڭ جالپى الەمدىك رۋحاني ادامگەرشىلىك قۇندىلىقتاردى ارتتىرىپ، دىندەر مەن مادەنيەتتەر اراسىنداعى ءوزارا تۇسىنىستىك پەن كەلىسىمدى نىعايتاتىنىنا سەنىم ءبىلدىردى.
«بۇگىنگى جاھاندىق دامۋ الەمدىك كونفەسسياارالىق ديالوگتىڭ وسىنداي تەتىگىنە سۇرانىستىڭ ارتىپ وتىرعانىن كورسەتىپ وتىر. وتكەن سوڭعى سەزدەن بەرگى ءۇش جىلدا الەم ادامدار اراسىندا ءدىني ەرەكشەلىكتەر بويىنشا الاۋىزدىق تۋدىراتىن جاڭا قاتەرلەرمەن بەتپە- بەت كەلىپ جاتىر. بىرىنشىدەن، اسكەري ىشكى قاقتىعىستار سانى ارتتى. وندا تاراپتار ادامداردىڭ دىندىك ايىرماشىلىق فاكتورلارىن بەلسەندى تۇردە قولدانىپ جاتىر. وسىنداي قاقتىعىستاردىڭ ءبىرى - يەمەندە، مۇسىلماندار ءۇشىن قاسيەتتى سانالاتىن، يسلام الەمىنىڭ بەسىگى - مەككە مەن ءمادينا ماڭىندا ورىن الىپ جاتقانى الاڭداتپاي قويمايدى. ءبىرقاتار ەكسترەميستىك توپتاردىڭ اكتسيالارى ءتۇرلى كونفەسسيانى ۇستانۋشىلار اراسىندا دا جانجالدار تۋدىرۋدا. ازيا مەن افريكاداعى قوعامداردى جىككە ءبولىپ جاتىر. ۋكراينا شىعىسىنداعى قالا مەن اۋىلدارداعى اتىستاردا حرامداردىڭ ءبۇلىنۋى تۋرالى حابارلار دا الاڭداتپاي قويمايدى. «يسلام مەملەكەتى» اتالىپ جۇرگەن جاھاندىق تەرروريزم فورماسى دا قاتەرىن ورشىتۋدە. لاڭكەستەر يراك پەن سيرياداعى مادەني قۇندىلىق پەن مۇرالاردى، مىڭجىلدىق وركەنيەتتەر ەسكەرتكىشتەرىن قيراتۋدا. ولار ينتەرنەت ارقىلى ايۋاندىق ارەكەتتەرىن تاراتۋدا» ، - دەدى ن. نازاربايەۆ.
اۆتور: قانات مامەتقازى ۇلى
