كەلەسى اپتادا استانا- نيۋ- يورك جاڭا اۋە رەيسىن اشۋ بويىنشا كەلىسسوزدەر باستالادى - پ. فوستەر

 استانا. قازاقپارات - «ەير استانا» ۇلتتىق كومپانياسىنىڭ باسشىلىعى كەلەسى اپتادا ا ق ش- قا بارىپ، استانا- نيۋ- يورك اۋە باعىتىن اشۋ جولدارىن تالقىلايتىن بولادى. بۇل تۋرالى استانادا وتكەن باسپا ءسوز ءماسليحاتىندا اۋە كومپانياسىنىڭ پرەزيدەنتى پيتەر فوستەر ايتتى.

ايتا كەتەيىك، استانا مەن نيۋ- يورك اراسىن جالعايتىن اۋە قاتىناسىن اشۋ تۋرالى تاپسىرمانى پرەزيدەنت نۇرسۇلتان نازاربايەۆ «100 ناقتى قادام» ۇلت جوسپارىندا بەرگەن بولاتىن.

«100 ناقتى قادام» ۇلت جوسپارىن ورىنداۋ ماقساتىندا اۋە كومپانياسى وسى قىستا دۋبايعا، شياڭگاڭعا جانە 2016 - جىلدىڭ سوڭىنا قاراي توكيوعا اۋە قاتىناستارىن اشادى. سونىمەن قاتار، وسى جىلى استانادان پاريجگە اۋە جولىن اشۋدى جوسپارلاپ وتىرمىز. 2019 - جىلى اقپان ايىندا بوينگ 787 ۇشاقتارىن العان سوڭ نيۋ- يورك باعىتىن اشامىز. ءدال قازىر بۇل رەيستىڭ جيىلىگى قانداي بولاتىنىن ايتا المايمىز، دەگەنمەن كەلەسى اپتادا اقش- قا بارىپ، امەريكا تاراپىنان بىزبەن جۇمىس ىستەگىسى كەلەتىن سەرىكتەستەرمەن العاشقى كەلىسسوزدەردى جۇرگىزە باستايمىز »، - دەدى پ. فوستەر.

سونىمەن قاتار، اۋە كومپانياسى 2 - ماۋسىمدا استانادان سەۋل جانە تبيليسي باعىتتارىن اشتى. استانا- تبيليسي رەيسى بويىنشا اپتاسىنا ەكى رەت «Embraer-190»  لاينەرى ۇشادى. وسىلايشا، الماتىدان اپتاسىنا بەس رەت اتالعان قالاعا قاتىنايتىن رەيستەردى قوسقاندا قازاقستان مەن گرۋزيا اراسىنداعى اۋە قاتىناسى كۇن سايىن جۇزەگە اسىرىلاتىن بولادى.

استانا- سەۋل رەيسى بويىنشا  «Boeing 767-300ER» ۇشاعى اپتاسىنا ءبىر رەت ۇشادى. بۇل اپتاسىنا ءۇش رەت جاسالاتىن الماتى- سەۋل رەيسىنە ەداۋىر قوسىمشا سەپ بولادى.

شاراعا قاتىسقان كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چو ەنگچوننىڭ اتاپ وتۋىنشە، تامىز ايىندا سەۋلدەن استاناعا قاتىنايتىن اۋە جولى اشىلادى.

 اۆتور: ءابۋ- اسقار مەكەش ۇلى