سارىاعاشتا يتاليا الماسى ءوسىپ كەلەدى
شارۋالار الما كوشەتتەرىن كۇنگەي يتاليادان ارنايى الدىردى. كاسىپكەر جومارت ابدىمايەۆتىڭ ايتۋىنشا، بۇل كوشەتتەر ءساۋىر ايىندا ەگىلگەن. ءبىر اي ۋاقىت وتەر-وتپەستە كوشەتتەر ادام بويىمەن بىردەي ءوسىپ، تۇيىندەي باستاعان.
«باۋ ەگۋدى ءبىز العاش بولىپ قولعا الىپ وتىرمىز. يتاليادان اكەلگەن كوشەتتەردى 15 گەكتار جەرگە ەكتىك. وسى تۇستا ءبىزدىڭ كليماتقا نەعۇرلىم جاقىن كەلەتىندەرىن تاڭدادىق. يتالياندىقتاردىڭ وزدەرى كەلىپ، كوردى. ايتۋلارىنشا، ءبىزدىڭ جەر يتالياعا قاراعاندا قۇنارلى دەيدى. ەندى، بۇيىرتسا، كۇزدە تاعى 15 گەكتار جەرگە كوشەت ەگۋدى جوسپارلاپ وتىرمىز»، - دەيدى «ىنتىماق - بەس ارىس» ج ش س ديرەكتورى جومارت ابدىمايەۆ.
سارىاعاشتىق شارۋالار كەلەر جىلدان باستاپ قوماقتى ءونىم جينايتىندارىنا سەنىمدى. اعاشتار نىعايىپ جەتىلگەن سوڭ، جەمىس بەرەدى. وسكىندەردى كۇتىپ-باپتاۋ ارنايى تەحنولوگيا بويىنشا ىسكە اسادى. كاسىپكەر الما باعىن ءوز قارجىسىنا ءوسىرىپ وتىر. ءاربىر گەكتاردىڭ شىعىنى ورتا ەسەپپەن 1 ميلليون ەكى ءجۇز مىڭ تەڭگەگە جۋىقتايدى. جەرگىلىكتى بيلىك بيىل قارجىلاي قولداۋ كورسەتىپ، مەملەكەتتىك سۋبسيدياعا قول جەتكىزۋگە ۋادە بەرىپ وتىر، دەپ حابارلايدى otyrar.kz.
