جەمقورلىق قىلمىستارىندا اكىمدىك قىزمەتكەرلەرىنىڭ ۇلەسى باسىم

 استانا. قازاقپارات - سوڭعى ءتورت جىلدا جەمقورلىق قىلمىستارىندا اكىمدىك قىزمەتكەرلەرىنىڭ ۇلەسى باسىم.

بۇل تۋرالى بۇگىن «نۇر وتان» پارتياسى جانىنداعى جەمقورلىققا قارسى ءىس- قيمىل رەسپۋبليكالىق قوعامدىق كەڭەسىنىڭ وتىرىسىندا 2015-2025 - جىلدارعا ارنالعان سىبايلاس جەمقورلىققا قارسى ءىس- قيمىل باعدارلاماسىنىڭ ورىندالۋىن تالقىلاۋ كەزىندە ق ر پارلامەنتى ءماجىلىسىنىڭ دەپۋتاتى، اتالعان كەڭەستىڭ مۇشەسى تولەگەن يبرايەۆ ءمالىم ەتتى.

«جەرگىلىكتى اتقارۋ ورگاندارىنداعى سىبايلاس جەمقورلىق الاڭداتادى. سوڭعى ءتورت جىلدا اكىمدىك قىزمەتكەرلەرى جاساعان قىلمىستار جالپى سىبايلاس جەمقورلىق قىلمىستارىنىڭ جارتىسىنا جۋىعىن قۇراپ وتىر»، - دەدى كەڭەس مۇشەسى.

ساراپشىلاردىڭ 4 جىل بۇرىنعى «سىبايلاس جەمقورلىقپەن كۇرەس بويىنشا قابىلدانعان شارالار ءتيىستى ناتيجە بەرمەي وتىر» دەگەن پىكىرى بۇگىن دە وزەكتى ەكەنىنە توقتالعان ول، «2012-2014 - جىلدارى سىبايلاس جەمقورلىق قىلمىستارىن تىركەۋدىڭ ورتاشا جىلدىق دەڭگەيى 2218 گە تەڭ، بۇل ءوز كەزەگىندە 2011 -جىلعى كورسەتكىشتەن 200 قىلمىسقا ارتىق. ياعني، 2011 - جىلمەن سالىستىرعاندا ءوسىم 10 پايىزدى قۇرادى»، - دەدى.

 ونىڭ سوزىنە قاراعاندا، كەدەن ورگاندارىندا تىركەلگەن جەمقورلىق قىلمىستارى ەكى ەسەگە جۋىق ارتتى (2011 -جىلى - 23, 2013 -جىلى - 44). بەس جىل بۇرىنعىداي سىبايلاس جەمقورلىقتىڭ ەڭ جوعارى ۇلەسى مەملەكەتتىك ساتىپ الۋلار، جەر قاتىناستارى جانە ءبىلىم بەرۋ سالاسىنا تيەسىلى.

اۆتور: رۋسلان عابباسوۆ