جاڭا يندۋستريالاندىرۋ: «اگران» ج ش س ءوندىرىس ورنىن كەڭەيتە تۇسپەك - فوتو

ورال. قازاقپارات - ءۇي قۇرىلىسىنا قاجەتتى ونىمدەردى وندىرۋمەن اينالىساتىن ورالداعى كاسىپورىنداردىڭ ءبىرى «اگران» ج ش س مەملەكەتتىڭ قولداۋىمەن ءوندىرىس ورنىن كەڭەيتە تۇسپەك.

«اگران» ج ش س كومەرتسيالىق ديرەكتورىنىڭ مىندەتىن اتقارۋشى ۆاسيلي بالاكيريەۆتىڭ ايتۋىنشا، «كاز كومەرتس بانك» ا ق ورال فيليالىنان تومەن پايىزبەن نەسيە الىنىپ، جىل اياعىنا دەيىن جاڭا سەحتاردى ىسكە قوسۋ كوزدەلۋدە. جاڭا جەرگە توبە جابىندارى جانە قابىرعا ماتەريالدارى ءوندىرىسى كوشىرىلىپ، بۇرىنعى ورىندار شيكىزات پەن دايىن ونىمدەر قويماسى ەسەبىندە پايدالانىلماق.

2002-جىلى قۇرىلعان كاسىپورىن نەگىزىنەن مىرىشتالعان جانە بويالعان شاتىرلار مەن قابىرعالاردى، باسقا دا قوسىمشا ماتەريالداردى شىعارادى. 2012-جىلدان باستاپ پروفناستيل مەن مەتال جابىندارعا قوسا اينا مەن اينەك پاكەتتەرىن وندىرەتىن «اگران» ج ش س- نىڭ كورشىلەس اقتوبە مەن اتىراۋ قالالارىندا بولىمشەلەرى بار. سول جىلى كومپانيا ورال مەن اقتوبەدەگى ءوندىرىس الاڭدارىندا اۆستريالىق «Lisec»  فيرماسىنىڭ جوعارى تەحنولوگياسىنا سايكەس ءارقايسىسى اۋىسىمىنا 700 شارشى مەتر اينەك پاكەتتەرى مەن اينا وندىرەتىن جەلىنى ىسكە قوستى. بۇل نەگىزگى ءوندىرىس بولماسا دا، كومپانيا ايماقتاعى اينەك پاكەتتەردىڭ 40 پايىزدايىن شىعارادى. بۇعان سەحتى كەڭەيتۋ ناتيجەسىندە قول جەتتى. الداعى ۋاقىتتا اينەكتى شىڭداي ءتۇسۋ دە ويلاستىرىلماق.

كومپانيادا بارلىعى 150 دەن استام ادام ەڭبەك ەتسە، سونىڭ تەڭ جارتىسى ورالدا ءناپاقاسىن تاۋىپ كەلەدى. بۇلاردىڭ ءبارى جەرگىلىكتى تۇرعىندار. جاڭا ءوندىرىس ورىندارى اشىلعان كەزدە جۇمىس ورىندارى دا كوبەيمەكشى.

كاسىپورىن ءۇي قۇرىلىسىنا قاجەتتى تەمىر قۇرامالار مەن قالىڭ قابىرعالار (سەندۆيچ- پانەلدەر)، اينەك پاكەتتەردى ءوندىرىپ قانا قويماي، ولاردى جوبالاۋ، قۇراستىرۋ جانە جەتكىزۋمەن دە اينالىسادى. بارلىق ونىمدەر تاپسىرىس بەرۋشىلەردىڭ ولشەمى بويىنشا شىعارىلادى. كومپانيا قويمالارىندا شاتىرلاردىڭ جيىرمادان استام ءتۇرىن وندىرۋگە جەتەتىن 2 مىڭ توننادان استام بولات ساقتالادى. شيكىزاتتى وتاندىق جانە شەتەلدىك كاسىپورىندار تۇراقتى جەتكىزىپ وتىرادى. قۇرىلىس ماتەريالدارىن ورالدان شىعارۋ جەرگىلىكتى فيرمالار ءۇشىن دە ءتيىمدى. ولاردىڭ تاپسىرىس بەرۋدەن باستاپ بارلىق تىلەك-تالاپتارى ەسكەرىلەدى، ءونىم باعاسى دا وڭتايلى.

ەڭ باستىسى، ەلباسى وتاندىق كاسىپورىندارعا قولداۋ كورسەتىپ وتىرعان كەزدە ەلدى يندۋستريالاندىرۋعا «اگران» ج ش س دا ءوز ۇلەسىن قوسا بەرمەك.

ەسكە سالا كەتەيىك، يندۋستريالاندىرۋ كارتاسى اياسىندا باتىس قازاقستان وبلىسىندا 303,5 ميلليارد تەڭگەنى قۇرايتىن 38 جوبا جۇزەگە اسىرىلىپ جاتسا، سونىڭ ىشىندە بيىل 43,7 ميلليارد تەڭگەنىڭ قوس جوباسىن (100 جۇمىس ورنى) ىسكە قوسۋ كوزدەلۋدە.

اۆتور: ەلجان ەرالى