اقتاۋدا ىسكەر ايەلدەر كەڭەسى جۇمىسقا كىرىستى

اقتاۋ. قازاقپارات - اقتاۋدا ماڭعىستاۋ وبلىسى كاسىپكەرلەر پالاتاسى جانىنان قۇرىلعان ىسكەر ايەلدەر كەڭەسىنىڭ العاشقى وتىرىسى ءوتتى.

ونى «DeSali» ديزاين اۋماعى» ستۋدياسىنىڭ ديرەكتورى، وڭىرلىك كاسىپكەرلەر پالاتاسىنىڭ مۇشەسى ساۋلە ساليحوۆا باسقارادى.

«كەڭەس وبلىستىڭ قالالارىنداعى، اۋداندارىنداعى جانە ءتىپتى شالعاي اۋىلدارىنداعى ايەلدەر بيزنەسىن دامىتۋدى قولداۋعا باعىتتالعان ايەلدەردىڭ بيزنەس-باستامالارىن قولداۋمەن اينالىسادى. تۇراقتى نەگىزدە ترەنينگىلەر، سەمينارلار، شەبەرلىك ساباقتارى، فورۋمدار، ىسكەرلىك كەزدەسۋلەر جانە باسقا دا ماڭىزدى شارالار وتكىزىلەتىن بولادى»، - دەدى س. ساليحوۆا.

«كاسىپكەرلەر پالاتاسى وڭىرلىك كەڭەسىنىڭ قۇرامىندا «بازيس-ماڭعىستاۋ» ج ش س ديرەكتورى رۋحان المامبەتوۆا، «اگروروست» فەرمەرلەر قاۋىمداستىعىنىڭ ءتورايىمى نۇرساۋلە جيەنبايەۆا، «ۆولنا» اقتاۋ كونديتەر فابريكاسىنىڭ باسشىسى نادەجدا كاراس، «جامال-اي» ج ش س ديرەكتورى ءزىبيرا حاسانوۆا، «مەديكال فارم «چ ا-كۋر» ج ش س نەگىزىن قالاۋشى سارالتىن قۇرمانوۆا، «بەرەكەت-ف» ج ش س باس ديرەكتورى زارەتا فاتاليەۆا بار.

ايەلدەر قۇرىلعان كەڭەس جۇمىسىن جاڭادان باستاعان بيزنەستەگى كاسىپكەر ايەلدەرگە اقپاراتتىق قولداۋ كورسەتىپ، كاسىبي بايلانىستار جەلىسىن كەڭەيتۋگە كومەكتەسەتىنىنە سەنىمدى. تۇتاستاي العاندا كەڭەس جۇمىسى ماڭعىستاۋ وبلىسىندا ايەلدەر كاسىپكەرلىگىن دامىتۋ سالاسىنداعى احۋالدى جاقسارتۋعا باعىتتالعان.