ەڭ تومەنگى الەۋمەتتىك ستاندارتتار تۋرالى زاڭ قابىلداندى
ەسكە سالا كەتەيىك، اتالعان قۇجاتقا ءبىرقاتار ءماجىلىس دەپۋتاتتارى باستاماشىلىق جاساعان بولاتىن.
زاڭ جوباسى الەۋمەتتىك سالادا نورماتيۆتىك قادامداردى دامىتۋ ءۇشىن قۇقىقتىق نەگىز قالىپتاستىرادى. وسى باعىتتاعى قولدانىستاعى نورمالار مەن نورماتيۆتەردى ەلدەگى الەۋمەتتىك- ەكونوميكالىق احۋالدىڭ وزگەرىستەرىنە سايكەستەندىرۋ كوزدەلەدى، ەلىمىزدىڭ ءار وڭىرلەرىنە ءبىرىڭعاي الەۋمەتتىك ساياسات ەنگىزۋگە جاعداي جاسايدى، الەۋمەتتىك سالانى مەملەكەتتىك رەتتەۋدەگى باستى قۇرالى رەتىندەگى الەۋمەتتىك ستاندارتتارى ايقىندالادى.
«مەملەكەت اسىرەسە جاھاندىق داعدارىس كەزەڭىندە ازاماتتارعا ەڭ تومەنگى الەۋمەتتىك ستاندارتتاردى كەپىلدەندىرۋى كەرەك. بۇل ەكونوميكا ءوسىمى مەن بيۋدجەتتىڭ مۇمكىندىگىنە تىكەلەي بايلانىستى بولماق. ەڭ تۇپكى مىندەت - قازاقستاندىقتاردىڭ ءومىرىن جاقسارتۋ. زاڭ جوباسىنىڭ تۇجىرىمداماسى وسى ماسەلەلەردى وزەك ەتىپ وتىر»، - دەدى ءماجىلىس دەپۋتاتى سۆەتلانا فەرحو.
وسىلايشا، قۇجاتتىڭ تۇجىرىمدامالىق نەگىزىن قۇرايتىن قاعيداتقا سايكەس، مەملەكەت ازاماتتارعا ەڭ تومەنگى الەۋمەتتىك ستاندارتتاردى كەپىلدىك ەتەدى. ياعني، كونستيتۋتسيادا بەكىتىلگەن ازاماتتاردىڭ الەۋمەتتىك قۇقىقتارىن جۇزەگە اسىرۋدى قامتاماسىز ەتەتىن الەۋمەتتىك قىزمەتتەر مەن اقشالاي تولەمدەردىڭ ەڭ تومەنگى مولشەرى كەپىلدەندىرىلەدى. مۇنداي قاعيدات شاپشاڭ وزگەرىسكە ۇشىراپ جاتقان ەكونوميكالىق جاعدايعا سايكەس، جاڭارتىلاتىن جانە ءتيىمدى الەۋمەتتىك ساياساتقا قاتىستى قازاقستاندىق قوعامنىڭ ارتىپ وتىرعان سۇرانىستارىنا جاۋاپ بەرەدى.
تۇتاستاي العاندا، قۇجات بويىنشا ەڭ تومەنگى الەۋمەتتىك ستاندارتتار ءبىرقاتار سالالاردا قولدانىلاتىن بولادى. بۇلاردىڭ قاتارىندا ءبىلىم بەرۋ، دەنساۋلىق ساقتاۋ جانە مەديتسينالىق كومەك، الەۋمەتتىك قامسىزداندىرۋ، تۇرعىن ءۇي ماسەلەسى مەن باسپاناعا كومەك، بىلىكتى زاڭگەر كومەگى، ەڭبەك جانە جۇمىسپەن قامتۋ، مادەنيەت جانە سپورت مەملەكەتتىك ۇيىمدارى قىزمەتىنە قولجەتىمدىلىك سەكىلدى سالالار بار.
اۆتور: قانات مامەتقازى ۇلى
