ن. نازاربايەۆ: جاھاندىق الەمدە ءبىزدىڭ بالالارىمىز «پلانەتا ازاماتى» بولادى
«كەز كەلگەن مەملەكەتتىڭ وزەگى - ونىڭ بىرەگەي مەملەكەتتىك ءتىلى. بۇگىن مەن قازاق ءتىلىن مەڭگەرىپ، وقىپ جۇرگەندەرگە شىنايى العىسىمدى بىلدىرگىم كەلەدى. ءوز بالالارىن وتانىنىڭ مەملەكەتتىك تىلىندە وقىتىپ، قازاق ءتىلىن ءبىلۋى ءۇشىن بالاباقشالارعا بەرىپ جاتقان اتا- انالارعا دا العىسىم شەكسىز. بۇل ءبىزدىڭ بىرەگەي ازاماتتىعىمىزدى بىلدىرەدى. قازاق ءتىلىنىڭ دامۋى تاريحتا وسىنداي اۋقىمدى قارقىنمەن جۇرگىزىلگەن ەمەس» ، - دەدى ن. نازاربايەۆ.
سونىمەن قاتار ەلباسى قازاقستاندا بارلىق ەتنيكالىق توپتاردىڭ تىلدەردى دامىتۋىنا جاعداي جاساپ وتىرعانىن اتاپ ءوتتى.
«ءبىز ءۇش تىلدىلىكتى دامىتۋ قارقىنىن ۇدەتىپ وتىرمىز. بۇل ويدان شىعارعان دۇنيە ەمەس، قاجەتتىلىك. قازىردىڭ وزىندە قازاقستاندىقتاردىڭ 20 پايىزى اعىلشىن ءتىلىن مەڭگەردى. ياعني، ءۇش ءتىلدى مەڭگەرۋ، ءبىلۋ - بۇل جاھاندىق الەمگە جولداما دەگەن ءسوز. بۇل ادامنىڭ ومىردەگى تابىستىلىق، جەتىستىك ءپرينتسپى. جاھاندىق الەمدە ءبىزدىڭ بالالارىمىز «پلانەتا ازاماتى» بولادى. سوندىقتان دا ولار الەمنىڭ كەز كەلگەن وڭىرىندە جۇمىس ىستەپ، كۇنىن كورە الاتىن بولادى. ياعني، بۇگىنگى كۇردەلى الەمدە ءبىزدىڭ بالالارىمىز وزدەرىن «سۋداعى بالىقتاي» سەزىنۋى كەرەك، ءبىز سوعان جاعداي جاساپ جاتىرمىز» ، - دەدى ن. نازاربايەۆ.
ەلباسى ءوز سوزىندە ەتنيكالىق كەلىسىمنىڭ قازاقستاندىق تاجىريبەسىن قولدانعان ەلدەردىڭ قاتارىنا كوبەيە تۇسسە، الەمنىڭ قاۋىپسىزدىگى ارتا تۇسەتىندىگىنە سەنىمدى ەكەنىن باسا ايتتى.
«ءبىز يسلامنىڭ قاسيەتتى قۇندىلىقتارىن كەلەكەگە اينالدىرعان ەۋروپاداعى يسلاموفوبيانىڭ ارتا ءتۇسۋىن بايقاپ وتىرمىز. وسى جانە وزگە دە وقيعالار تاريحشىلار قالاي تۇسىندىرسە دە ۇلتارالىق جانە كونفەسسياارالىق قارىم- قاتىناس سالاسىنداعى نازىك پروبلەمالار مەن قازىرگى سىن- قاتەرلەردىڭ جاھاندىق كەلبەتىن قۋاتتاي تۇسەدى. كەز كەلگەن ەلدىڭ كۇش- قۋاتى - ونىڭ حالقىنىڭ بىرلىگىندە» ، - دەدى مەملەكەت باسشىسى.
اۆتور: قانات مامەتقازى ۇلى
