ق ر ۇكىمەتىنىڭ وتىرىسىندا سۋ تاسقىنى ماسەلەسى قارالدى

ىشكى ىستەر ءمينيسترى قالمۇحانبەت قاسىموۆتىڭ اقپاراتىنا سۇيەنسەك، «سۋ تاسقىنى كەزەڭىندە رەسپۋبليكا وبلىستارىندا  2434 ءۇي سۋ استىندا قالىپ، ۇزىندىعى 25 شاقىرىم 164 اۆتوجول شايىلىپ، 9 كوپىر قيراعان».

سۋ تاسقىنى سالدارىن جويۋعا ەلدىڭ ون وڭىرىنەن ت ج كۇشتەرى مەن قۇرالدارى جەتكىزىلدى. 6,5 مىڭنان استام ادام، 1780 بىرلىك تەحنيكا، 130 سۋ ايداۋ قۇرىلعىسى، 115 ءجۇزۋ قۇرالدارى جۇمىلدىرىلدى.

 «بۇگىندە قابىلدانعان شارالاردىڭ ارقاسىندا سۋدان 2173 ءۇي تازارتىلدى، 10 مىڭنان استام ادام ۇيلەرىنە ورالدى. 22 شاقىرىم ۋاقىتشا دامبا سالىنىپ، 3,5 شاقىرىم بوگەت قالپىنا كەلتىرىلدى»، - دەپ حابارلادى مينيستر.

ول «مۇنداي اۋقىمداعى سۋ تاسقىنى ەلدە سوڭعى ون جىلدا ورىن الماعانىن» اتاپ ءوتتى.

«قازىر قاۋىپ سەيىلدى. جاعداي بىرتىندەپ تۇراقتالىپ كەلەدى. سۋ ەلدى مەكەندەردە ازايا باستادى. وزەندەردە تاسۋ دەڭگەيى تومەندەدى. بارلىق وڭىرلەردەگى جاعداي ءجىتى باقىلاۋدا. داعدارىس ورتالىعى جۇمىس ىستەۋدە. اعىمداعى جاعداي بويىنشا تۇراقتى اقپارات الىپ وتىرمىز»، - دەپ تۇيىندەدى ق. قاسىموۆ.

پرەمەر- مينيستر مەملەكەتتىك ورگاندارعا سۋ تاسقىنىنىڭ سالدارىن جويۋ بويىنشا شارالاردى قارجىلاي جانە ماتەريالدىق قامتاماسىز ەتۋگە قاتىستى ءبىرقاتار تاپسىرما بەردى.

ۇكىمەت مۇشەلەرى سونداي- اق اپاتتان زارداپ شەككەندەرگە كومەك قورىنا وزدەرىنىڭ ءبىر كۇندىك جالاقىلارىن اۋدارۋ شەشىمىن قابىلدادى، دەپ جازادى primeminister.kz.