الماتى - تاۋەلسىزدىگىمىزدىڭ «التىن بەسىگى» - نازاربايەۆ

استانا. قازاقپارات - مەملەكەت باسشىسى نۇرسۇلتان نازاربايەۆ الماتى قالاسىنىڭ ورتالىق ستاديونىندا وتكەن «الماتى كوكتەمى» فەستيۆالىنە قاتىستى، دەپ حابارلايدى اقوردانىڭ باسپا ءسوز قىزمەتىنەن.

ءىس- شاراعا 20 مىڭنان استام ادام قاتىستى.

مەملەكەت باسشىسى قالا جۇرتشىلىعى مەن جاستارعا ارناعان سوزىندە كوكتەم مەزگىلى الماتىنى ايرىقشا كورىكتى ەتە ءتۇستىنىن اتاپ ءوتتى.

- الماتى - ماڭگىلىك كوكتەم قالاسى، ورتالىق ازيانىڭ ءىنجۋ-مارجانى. الماتىدا تۇرعان نەمەسە وعان كەلىپ كەتكەن ادام عاجاپ تاۋلارى مەن تاماشا كليماتىن ەشقاشان ۇمىتپايدى. بۇل مەگاپوليس قازاقستان تاۋەلسىزدىگىنىڭ التىن بەسىگى - رەسپۋبليكامىزدىڭ جاڭا تاريحى باستالعان جەر. قالا ەلىمىزدىڭ مادەنيەت، قارجى جانە سپورت ورتالىعى بولىپ سانالادى. ەل ەكونوميكاسىنىڭ 20 پايىزى الماتىعا تيەسىلى. مەن مۇندا كەلگەن سايىن وڭ وزگەرىستەردى كورەمىن. قالانىڭ دامۋى ءاردايىم مەنىڭ جەكە نازارىمدا جانە مەملەكەتتىڭ باسىمدىعى بولىپ سانالادى، - دەدى قازاقستان پرەزيدەنتى.

نۇرسۇلتان نازاربايەۆ الماتىنىڭ تارتىمدى پەرسپەكتيۆالارىنا دا توقتالدى. مۇندا 2017 -جىلى دۇنيەجۇزىلىك ۋنيۆەرسيادا وتەدى، قالانى تۋريزم ورتالىعىنا اينالدىرۋ جۇمىستارى جۇرگىزىلىپ، ينفراقۇرىلىمى مەن ەكولوگيالىق احۋالى جاقسارۋدا.

قازاقستان پرەزيدەنتى جاستاردىڭ سالاماتتى ءومىر سالتىن ۇستانۋى دا ماڭىزدى ەكەنىن ايتتى.

 - سپورت - دەنساۋلىق. ادام باقىتىنىڭ 95 پايىزى دەنساۋلىعىنا بايلانىستى، سوندىقتان بۇل بايلىقتى ساقتاپ، سپورتپەن اينالىسۋ كەرەك. بۇگىندە وتاندىق سپورتشىلار ءوز جەتىستىكتەرىمەن قازاقستاندى قۋانتىپ، كۇش- قۋاتىمىزدى ايگىلەۋدە. ستۋدەنتتەرىمىز الەمنىڭ ءتۇرلى وقۋ ورىندارىندا وقيدى، ءوزىمىز دە ۇزدىك ۋنيۆەرسيتەتتەر، مەكتەپتەر مەن ستاديوندار سالىپ جاتىرمىز. ەلدى دامىتۋ جونىندەگى بارلىق كۇش- جىگەر جاستار مەن ولاردىڭ بولاشاعى ءۇشىن جۇمسالۋدا، - دەدى مەملەكەت باسشىسى.

ءىس- شارادا ءسوز العان قالا جۇرتشىلىعىنىڭ وكىلدەرى مەملەكەت باسشىسىنا ەلدەگى مادەنيەتتى، عىلىم مەن ءبىلىمدى دامىتۋ ماسەلەلەرىنە ۇدايى كوڭىل ءبولىپ، جان- جاقتى قولداۋ كورسەتىپ وتىرعانى ءۇشىن العىس ايتتى.

ءىس- شارا كونسەرتتىك باعدارلاماعا ۇلاستى.