الماتىنىڭ الاتاۋ اۋدانى بولاشاقتا قالا ورتالىعىنا اينالادى - ن. نازاربايەۆ

الماتى. قازاقپارات - الماتىنىڭ الاتاۋ اۋدانى بولاشاقتا قالا ورتالىعىنا اينالادى. بۇل تۋرالى بۇگىن الاتاۋ اۋدانىنىڭ تۇرعىندارىمەن بولعان كەزدەسۋ بارىسىندا ەلباسى نۇرسۇلتان نازاربايەۆ مالىمدەدى.

«الماتىنىڭ الاتاۋ اۋدانى بولاشاقتا قالا ورتالىعىنا اينالادى . ويتكەنى بۇل جەر كەڭ جانە جازىق. ال قالا ورتالىعىندا جاياۋ جۇرگىنشىلەر جۇرەتىن كوشەلەر كوپتەپ سالىناتىن بولادى. مەن كەزىندە قازاقستاننىڭ جاڭا استاناسىنا لايىق ورىن ىزدەگەن كەزدە، مىنا ىلە وزەنىنە قاراي، جەل سوعاتىن جەرگە الماتىنى كوشىرۋ تۋرالى وي بولدى. ەندى مىنا الاتاۋ اۋدانى قازىر سول باعىتتا دامىپ جاتىر. سوندىقتان بولاشاقتا الاتاۋ اۋدانى الماتىنىڭ ورتالىعىنا اينالىپ كەتۋى ابدەن ىقتيمال. ويتكەنى، قانشا ايتقانمەن قالا ورتالىعىنداعى عيماراتتار ەسكىرەدى. ال بۇل جەرگە قالاداعى بارلىق ءوندىرىس ورىندارى كوشىرىلەدى. سايكەسىنشە، اۋدان بۇدان ءارى قارقىندى داميتىن بولادى. جۇمىس ورىندارى اشىلادى.

مەملەكەت الماتى قالاسىن ەشقاشاندا نازاردان تىس قالدىرعان ەمەس. جۇمىس ورىندارىن اشىپ جاتىر. قالعاندارى ءوز قولدارىڭىزدا. جۇمىس ىستەۋ كەرەك. جۇمىس ىستەگەن ادام جاقسى ءومىر سۇرەدى. جالقاۋلار قاي زاماندا دا جاعدايلارىن تۇزەي الماعان. سوندىقتان مەملەكەت حالىق ءۇشىن بارلىق جاعدايدى جاساپ جاتىر»، - دەدى ەلباسى.

اۆتور: جاپپاربەرگەن ايبوتا