قازاقستان مەن تۇركيا: ىسكەرلىك ءھام ساياسي ديالوگ اۋقىمى كەڭەيىپ كەلەدى - اپتالىق شولۋ
تۇركيا بيلىگىن سوڭعى 12 جىل بويى تىزگىندەپ ۇستاعان رەدجەپ ەردوعان ەلىمىزگە بۇعان دەيىن دە بىرنەشە دۇركىن كەلگەن. الايدا ەردوعان بۇل جولى تۇركيانىڭ پرەزيدەنتى لاۋازىمىندا استاناعا العاش رەت مەملەكەتتىك ساپارمەن كەلىپ وتىر. ساپار ءساتتى دەۋگە بولادى، ويتكەنى، بۇنىڭ بارىسىندا قازاقستان مەن تۇركيا اراسىنداعى ستراتەگيالىق ارىپتەستىكتىڭ جاڭا ءبىر پاراعى اشىلعانداي ەدى.
ەلباسى نۇرسۇلتان نازاربايەۆ پەن مارتەبەلى مەيماننىڭ اقوردادا وتكەن كەزدەسۋىندە قازاق- تۇرىك قارىم- قاتىناسىن ودان ءارى نىعايتۋ، بۇگىنگە دەيىن قالىپتاسقان بايلانىستاردى تەرەڭدەتىپ، سان ءتۇرلى سالا بويىنشا ءوزارا ىقپالداستىقتى ارتتىرۋ ماسەلەلەرى تالقىلاندى. ەكەۋارا كەزدەسۋىندە نازاربايەۆ پەن ەردوعان حالىقارالىق جانە وڭىرلىك دەڭگەيدەگى كۇن تارتىبىندەگى وزەكتى ماسەلەلەردى اڭگىمەگە ارقاۋ ەتكەن. «قازاقستان مەن تۇركيا اراسىندا ورناعان دوستىق جانە باۋىرلاستىق قارىم- قاتىناس وتە جوعارى دەڭگەيدە. ءسىزدىڭ باسشىلىعىڭىزبەن تۇركيا سوڭعى 12 جىلدا زور تابىستارعا جەتتى. ول ەكونوميكالىق كورسەتكىشتەرى جاعىنان الەمدە 16-ورىندا، بۇل - بۇكىل حالىقتىڭ ەڭبەگى جانە ءسىزدىڭ كۇش- جىگەرىڭىزدىڭ ناتيجەسى. سىزبەن بىرگە ۇلكەن دەلەگاتسيا كەلدى، ولار بۇگىن ەكىجاقتى بيزنەس- فورۋمعا قاتىسادى. ءسىزدىڭ ساپارىڭىز ءبىزدىڭ قارىم- قاتىناستارىمىزدى جاڭا دەڭگەيگە كوتەرۋگە سەپتىگىن تيگىزەتىنىنە سەنىمدىمىن» ، - دەدى ەلباسى كەزدەسۋ بارىسىندا. ءوز كەزەگىندە مەيمان ەردوعان الدىمەن قازاقستان باسشىسىن وتكەن جىلى تۇركياعا ساپارمەن كەلىپ، ءوزىنىڭ ۇلىقتاۋ راسىمىنە قاتىسقانى ءۇشىن ريزاشىلىعىن ءبىلدىردى. سوسىن تۇركىنىڭ اتا جۇرتىنداعى قازاق ەلىنىڭ بۇگىنگى تابىسىنا شىن مەرەيلى ەكەنىن بىلدىرگەن تۇركيا باسشىسى، الداعى ماڭىزدى ساياسي ناۋقانعا قاتىستى اڭگىمەنى دە تىلگە تيەك ەتىپ ءوتتى. «الەمدەگى كۇردەلى ەكونوميكالىق احۋال جاعدايىندا قازاقستان قارقىندى دامىپ، ەلەۋلى تابىستارعا جەتۋدە. بۇل ءبىزدى قۋانتادى. سونداي- اق، مۇندا تاياۋدا پرەزيدەنتتىك سايلاۋ وتەدى. مەن سىزگە زور تابىس تىلەيمىن» ، - دەدى رەدجەپ ەردوعان.
كەزدەسۋدەن سوڭ مەملەكەت باسشىلارى قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ەكىنشى وتىرىسىنا قاتىستى. وندا ءتۇرلى سالالارداعى ەكىجاقتى ىقپالداستىقتى نىعايتۋ ماسەلەلەرى، سونداي- اق، «جاڭا سينەرگيا» بىرلەسكەن ەكونوميكالىق باعدارلاماسىن جۇزەگە اسىرۋدىڭ نەگىزگى باعىتتارى قاراستىرىلدى.
كەيىننەن بىرلەسكەن بريفينگ بارىسىندا قازاقستان پرەزيدەنتى نۇرسۇلتان نازاربايەۆ ەلىمىزدىڭ تاۋەلسىزدىگىن ەڭ ءبىرىنشى بولىپ تانىعان باۋىرلاس تۇرىك ەلىنە قازاقستان حالقىنىڭ قۇرمەتى ەرەكشە ەكەنىن ءبىلدىردى. «بيىل ءبىز قازاق حاندىعىنىڭ 550 جىلدىعىن اتاپ وتەمىز. سوندىقتان، ءتۇبى ءبىر تۇرىك ەلى باسشىسىنىڭ بۇل ساپارىنىڭ سيمۆولدىق ءمانى بار. تۇركيا - قازاقستاننىڭ ەڭ جاقىن ءارى سەنىمدى ساياسي جانە ەكونوميكالىق ارىپتەستەرىنىڭ ءبىرى. ورتاق تاريحي تامىردان ءنار الاتىن بايىرعى بايلانىستارىمىز قازىر ستراتەگيالىق سيپات الىپ وتىر» ، - دەدى ەلباسى. سونىمەن قاتار، پرەزيدەنت قازاقستاننىڭ تۋىسقان تۇرىك ەلىنىڭ باستامالارىن تولىق قولدايتىنىن، ەكى ەل اراسىندا كوپتەگەن سالا بويىنشا ىنتىماقتاستىقتى ودان ءارى ارتتىرۋ جولدارى قاراستىرىلعانىن اتاپ ءوتتى. «تۇتاستاي العاندا، قازاق- تۇرىك ساياسي ءۇنقاتىسۋىنىڭ اۋقىمى ۇدايى كەڭەيىپ كەلەدى. ءبىز ساياسي ىنتىماقتاستىق پەن بارىس- كەلىس باعىتىنداعى جۇمىستاردى جۇيەلەي تۇسۋگە كەلىستىك. ونداعى باستى ماقسات - حالىقتاردىڭ دوستىعىن ودان ءارى تەرەڭدەتۋ» ، - دەدى ەلباسى.
ايتا كەتەرلىگى، قازاقستان مەن تۇركيانىڭ ساۋدا- ەكونوميكالىق بايلانىسى قارقىندى دامىپ كەلەدى. ايتالىق، قازاقستاندا كوپتەگەن تۇرىك كومپانيالارى تابىستى قىزمەت ەتسە، قازىرگى تاڭدا تۇرىك كاپيتالىنىڭ ۇلەسىمەن ەلىمىزدە جۇمىس ىستەيتىن كاسىپورىندار سانى 1600 دەن اسقان. تۇرىك بيزنەسىنىڭ قازاقستاندا اتقارعان مەردىگەرلىك جۇمىسىنىڭ جالپى قۇنى 20 ميلليارد دوللارعا جۋىقتايدى. بۇگىندە 1,5 ميلليارد دوللاردى قۇرايتىن ينۆەستيتسيالىق 14 جوبا بويىنشا جۇمىس جاسالىپ جاتىر. ال ەكى ەلدىڭ تاۋار اينالىمى وتكەن جىلى 3,3 ميلليارد دوللاردى قۇراپتى. ەلباسىنىڭ ايتۋىنشا، بۇل الدىڭعى كورسەتكىشتەردەن ءبىرشاما ازىراق، ويتكەنى، الەمدە بايقالىپ وتىرعان داعدارىستىق احۋال بىزگە دە كەرى ىقپال ەتكەن. دەگەنمەن، بۇل كورسەتكىشتى الداعى ۋاقىتتا ءۇش ەسەدەن استامعا ارتتىرۋعا الەۋەتتىڭ بار ەكەندىگىنە ەكى ەل باسشىلارى دا نازار اۋدارتادى. بۇل رەتتە پرەزيدەنت نازاربايەۆ: «ءبىز 2012 -جىلى «جاڭا سينەرگيا» باعدارلاماسىن قابىلدادىق. سوعان سايكەس، ەكىجاقتى تاۋار اينالىمىن 10 ميلليارد دوللارعا جەتكىزۋ جوسپارلانۋدا. ال ينۆەستيتسيا كولەمىن جىل سايىن 500 ميلليون دوللارعا دەيىن ۇلعايتۋ كوزدەلۋدە» ، - دەي كەلە قازاقستاندا «نۇرلى جول» باعدارلاماسى قابىلدانعانىن، بۇل ەكى ەل بيزنەسمەندەرىنىڭ الدىنان ۇلكەن مۇمكىندىكتەر اشاتىنىن ايتتى. «قازاقستان مەن تۇركيا - ەجەلدەن ۇلى جىبەك جولىنىڭ بويىندا تىرشىلىگى توعىسقان ەلدەر. قازىر دە مەملەكەتتەرىمىز شىعىس پەن باتىس اراسىنداعى دانەكەرلىكتى جالعاستىرىپ كەلەدى. مەن ءبىزدىڭ تۇرىك سەرىكتەستەرىمىزدى «نۇرلى جول» باعدارلاماسى مەن ينۆەستيتسيالىق جوبالارعا قاتىسۋعا شاقىرامىن. ءبىز ينفراقۇرىلىمدىق، ينۆەستيتسيالىق بىرلەسكەن قورلار قۇرۋ ماسەلەسىن زەردەلەۋگە كەلىستىك. بۇل جوبالاردى جۇزەگە اسىرۋ تۇركيانىڭ قازاقستان ارقىلى قىتايعا، شىعىس جانە وڭتۇستىك- شىعىس ازياعا شىعۋىنا مۇمكىندىك بەرەدى، ال ءبىزدىڭ ەل تۇركيا ارقىلى ەۋروپا مەن تاياۋ شىعىسقا شىعا الادى» ، - دەدى نۇرسۇلتان نازاربايەۆ.
ءوز كەزەگىندە تۇركيا پرەزيدەنتى رەدجەپ ەردوعان مىرزا قازاقستان مەن تۇركيا اراسىنداعى دوستىق قارىم- قاتىناستاردى دامىتۋدا سوڭعى جىلدارى ايتارلىقتاي ىلگەرىلەۋگە قول جەتكىزىلگەنىن اتاپ ءوتتى. «بۇگىنگى كەزدەسۋ بارىسىندا ءبىز ءبىرقاتار وڭىرلىك جانە حالىقارالىق، سونىڭ ىشىندە سيريا، يراك، يەمەن، ەگيپەت جانە ۋكرايناعا قاتىستى ماسەلەلەردى تالقىلادىق. ءبىزدىڭ كوزقاراستارىمىز كوپ ماسەلە بويىنشا سايكەس كەلەدى» ، - دەدى رەدجەپ ەردوعان. تۇرىك ەلىنىڭ باسشىسى قازاقستان مەن تۇركيا ءبىر- ءبىرىن حالىقارالىق ۇيىمدار اياسىندا دا قولداپ كەلە جاتقانىن اتاپ ءوتتى. ماسەلەن، تۇركيا ب ۇ ۇ قاۋىپسىزدىك كەڭەسىنىڭ 2017-2018 -جىلدارداعى تۇراقتى ەمەس مۇشەلىگىنە ۇسىنىلعان قازاقستاننىڭ كانديداتۋراسىن قولدايدى. سوسىن تۇركيا 2017 -جىلى استانادا وتەتىن ەكسپو كورمەسىنە دە بەلسەنە قاتىسۋدى جوسپارلاپ وتىر.
«ءبىز تاياۋ ارادا قازاقستاننىڭ دۇنيەجۇزىلىك ساۋدا ۇيىمىنا كىرۋى جونىندەگى كەلىسسوزدەر اياقتالادى دەپ ۇمىتتەنەمىز. ءبىز باۋىرلاس حالىقتىڭ بارلىق ۇمتىلىستارىن بۇدان ءارى دە قولداۋ نيەتىندەمىز. ءبىز ىنتىماقتاستىعىمىزدى ساۋدا- ەكونوميكا، ەنەرگەتيكا، قورعانىس جانە كولىك سالالارىندا نىعايتۋعا نيەتتىمىز. قازاقستان مەن تۇركيانىڭ قارىم- قاتىناستارىن ودان ءارى دامىتۋعا زور الەۋەتى بار. ورتالىق ازيانىڭ كاسپي تەڭىزى ارقىلى حالىقارالىق نارىقتارعا شىعۋى ءۇشىن قازاقستان ماڭىزدى ءرول اتقارادى. وسى سالادا ءبىز جۇزەگە اسىرۋدى جوسپارلاپ وتىرعان جوبالار بۇكىل ءوڭىردىڭ ءال- اۋقاتىن ارتتىرۋعا باعىتتالعان» ، - دەدى رەدجەپ ەردوعان.
مەملەكەتتىك ساپاردىڭ ەكىنشى كۇنىندە تۇركيا باسشىسى رەدجەپ تايىپ ەردوعان بۇكىل تۇركى جۇرتىنىڭ بەسىگى، رۋحاني ورتالىعى سانالاتىن - قاسيەتتى تۇركىستان قالاسىنا بارعان ەدى. بۇل ساپاردا ەلباسى نۇرسۇلتان نازاربايەۆ ارىپتەسىمەن بىرگە بولدى. وندا ەلباسىلار قوجا احمەت ياساۋي كەشەنى جانىنداعى تۇرىك قاراجاتىنا سالىنعان جاڭا مەشىتتە، سونداي- اق، قازاق- تۇرىك حالىقارالىق ۋنيۆەرسيتەتىنىڭ جاڭا وقۋ كورپۋسى، كىتاپحانا مەن جاتاقحانا عيماراتىن ارالادى. ايتا كەتەرلىگى، تۇركى الەمىنىڭ بەسىگى سانالاتىن تۇركىستان اۋماعىنداعى بۇل جوبالار - باۋىرلاس ەكى ەل اراسىندا جۇزەگە اسىپ جاتقان يگىلىگى مول ورتاق جوبالار.
سونىمەن قاتار، قازاقستان مەن تۇركيا باسشىلارى - نۇرسۇلتان نازاربايەۆ پەن رەدجەپ تايىپ ەردوعان تۇركىستان قالاسىنداعى قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىندە بولعان ەدى. وندا تۇركيا پرەزيدەنتى ۋنيۆەرسيتەتتىڭ وقىتۋشى- پروفەسسورلار قۇرامى الدىندا ءسوز سويلەپ، كورسەتىلگەن قۇرمەت ءۇشىن العىس ءبىلدىرىپ، تۇركى تىلدەس ەلدەردىڭ اراسىنداعى بايلانىستى نىعايتۋداعى وقۋ ورنى قىزمەتىنىڭ ماڭىزدىلىعىن اتاپ ءوتتى. «قوجا احمەت ءياساۋيدىڭ بۇكىل تۇركى دۇنيەسىنە قالدىرعان رۋحاني مۇراسىنىڭ ورنى ايرىقشا. سونىمەن قاتار، تۇركيانىڭ ءاربىر تۇرعىنى ءۇشىن ورتالىق ازيا، سونىڭ ىشىندە قازاقستان زور مانگە يە. سوڭعى 20 -جىلدا ەلدەرىمىزدىڭ ساياسي، الەۋمەتتىك جانە مادەني ومىرىندە زور وزگەرىستەر بولدى. قازاقستان تاۋەلسىزدىك العاننان كەيىنگى «ەمتيحاننان» جاقسى ءوتتى. بارلىق سىناقتاردى ەڭسەرىپ، ۇلكەن تابىستارعا جەتتى. بۇل كوبىنە كوپ ءوز ەلىن جوعارى دەڭگەيگە شىعارۋ ءۇشىن ونىڭ گەوگرافيالىق قونىسىن پايدالانا بىلگەن نۇرسۇلتان نازاربايەۆتىڭ ارقاسىندا مۇمكىن بولدى» ، - دەدى تۇركيا پرەزيدەنتى.
جيىن بارىسىندا تۇركيا پرەزيدەنتى رەدجەپ تايىپ ەردوعانعا قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ قۇرمەتتى پروفەسسورى اتاعى بەرىلدى.
قاراعاندى وبلىسىنداعى سۋ تاسقىنى زاردابىن جويۋ ءۇشىن قازىنادان ءبىر ميلليارد تەڭگە بولىنەدى
كوكتەمگى كۇن جىلۋىنان قار سۋىنىڭ كۇرت ەرۋى ەلىمىزدىڭ ءبىرقاتار ايماعىندا سۋ تاسقىنىنان كەلەتىن توتەنشە قاۋىپتەردى ارتتىرىپ جىبەردى. بۇگىندە تاسقىن جاعدايى قاراعاندى، اقمولا، قوستاناي، پاۆلودار، سولتۇستىك قازاقستان وبلىستارىنىڭ بارلىق اۋداندارىندا، سونداي- اق شىعىس قازاقستان، اقتوبە وبلىستارىنىڭ ءبىرقاتار اۋداندارىندا ساقتالىپ وتىر.
اپات ايتىپ كەلمەيتىنى ايتپاسا دا تۇسىنىكتى. دەگەنمەن، كوكتەم شىعار ۋاقىتتا قاردىڭ شامادان كوپ ءتۇسۋى، كۇننىڭ كۇرت جىلىنۋى سەكىلدى قۇبىلىستارعا توتەنشە ورگاندارى ساقاداي ساي بولۋى شارت. سوعان وراي، اپاتتاردىڭ تەرىس زارداپتارىن بولدىرماۋ ءۇشىن رەسپۋبليكانىڭ بارلىق ايماقتارىندا ەسكەرتۋ جانە قۇتقارۋشى ۇيىمداستىرۋشىلىق- تەحنيكالىق شارالار وتكىزىلگەن دە بولاتىن. ماسەلەن، وبلىستاردا سۋ تاسقىندارى كەزەڭىندە قاجەتتى بولۋى ىقتيمال 10,37 مىڭ توننا جانار- جاعارماي، 188 مىڭ توننا ينەرتتىك ماتەريالدار، 1 ميلليون 84 مىڭ قاپ، 89,4 توننا جارىلعىش زات دايىندالعان. ەلدى مەكەندەردى سۋ باسۋ قاۋپى بولعان جاعدايدا اپاتتىق- قۇتقارۋ بولىمشەلەرىنىڭ جالپى سانى 23972 ادام، 7361 تەحنيكا بىرلىگى، ءجۇزۋ قۇرالدارىنىڭ 982 بىرلىگى جانە 16 تىكۇشاقتان قۇرىلعان كۇش- قۇرال توپتارى قۇرىلعان بولاتىن. الايدا، بۇنىڭ ءبارى دۇلەي سۋ تاسقىنىنا توتەپ بەرە المادى.
ىشكى ىستەر ءمينيسترىنىڭ ورىنباسارى ۆلاديمير بوجكونىڭ ايتۋىنشا، سۋ تاسقىنىنىڭ قاۋپى تۋىنداعان ايماقتاردان 11 مىڭ 172 ادام كوشىرىلگەن. 25 ادام قۇتقارىلسا، اقمولا، قاراعاندى، قوستاناي، شىعىس قازاقستان، پاۆلودار، سولتۇستىك قازاقستان وبلىستارىنىڭ 17 اۋدانىندا 50 ەلدى مەكەندى سۋ باسقان. بۇدان بولەك، ون شاقتى ەلدى مەكەندە توتەنشە جاعدايلار قاتەرى سەيىلمەگەن. توتەنشە جاعدايلار تۋىنداعان ايماقتاردا 4515 قۇتقارۋشى، ءورت سوندىرۋشىلەر مەن ۇلتتىق گۆارديا اسكەريلەرى، 1221 ارنايى جانە قۇتقارۋ تەحنيكالارى، 74 ءجۇزۋ قۇرالى اپاتتىق- قۇتقارۋ جۇمىستارىنا جۇمىلدىرىلعان. سۋ سوراتىن 106 قۇرىلعى ورناتىلدى. «وزەندەر مەن بوگەتتەردەگى سۋ دەڭگەيىنە تاۋلىكتىك مونيتورينگ جۇرگىزىلىپ جاتىر، قالىپتاسقان جاعدايلار تۋرالى جەرگىلىكتى جۇرتشىلىق ۋاقتىلى اقپاراتتاندىرىلۋدا» ، - دەيدى مينيستر ورىنباسارى.
سۋ تاسقىنى اسىرەسە ارقا وڭىرىندە توتەنشە قاۋىپتىڭ دەڭگەيىن دە ارتتىرا تۇسكەن. توپان سۋ قاراعاندى وبلىسىنىڭ جۇرتشىلىعىن تۇتاستاي ابىگەرگە ءتۇسىردى دەسەك تە بولادى. ماسەلەن، توتەنشە جاعدايلار جونىندەگى كوميتەتتىڭ حابارلاۋىنشا، قاراعاندى وبلىسىنداعى جۇزدەن استام ەلدى مەكەندى توپان سۋ باسۋ قاۋپى سەيىلمەي تۇر. العاش قار ەرىپ، ساي- سالاعا سۋ جايىلعاندا قاراعاندى وبلىسىنداعى 30 اۋىلدى توپان سۋ باسىپ، 350 دەن استام مال قىرىلعان. مىڭنان استام ادام قاۋىپسىز جەرگە شىعارىلعان.
وسى اپتادا ق ر پرەمەر- ءمينيسترىنىڭ ءبىرىنشى ورىنباسارى باقىتجان ساعىنتايەۆ پەن ىشكى ىستەر ءمينيسترىنىڭ ورىنباسارى ۆلاديمير بوجكو قاراعاندى وبلىسىندا بولىپ، ونداعى جاعدايمەن تانىسىپ، سوڭىنان ايماقتارداعى سۋ تاسقىنىنا قاتىستى جانە ولاردىڭ سالدارىن جويۋ بويىنشا سەلەكتورلىق كەڭەس وتكىزدى. وتىرىس بارىسىندا ق ر پرەمەر- ءمينيسترىنىڭ ءبىرىنشى ورىنباسارى ۇكىمەت بيۋدجەتىنەن قاراعاندى وبلىسىنداعى سۋ تاسقىنى سالدارلارىن جويۋعا جانە زارداپ شەككەن حالىققا العاشقى كومەك كورسەتۋگە 1 ميلليارد تەڭگە ءبولۋدى تاپسىرعان بولاتىن.
سونىمەن قاتار، وسى اپتادا سۋ تاسقىنى ماسەلەسى ۇكىمەتتە دە تالقىلاندى. ول بويىنشا بارلىق وڭىرلەردە دەن قويۋ جوسپارى ازىرلەنىپ، سۋ تاسقىنى كەزەڭىندەگى ءىس- قيمىل جوسپارىنا تۇزەتۋلەر ەنگىزىلدى. ايتا كەتەرلىگى، سۋ تاسقىنى باستالعان ساتتەن باستاپ 12 شاقىرىمعا ۋاقىتشا دامبا سالىنىپ، 3,2 شاقىرىم بوگەت قالپىنا كەلتىرىلدى، 51 مىڭنان استام قۇم تولتىرىلعان قاپ قويىلدى. 140,6 مىڭ تەكشە مەتر سۋ ايدالدى. سۋ باسۋى مۇمكىن ەلدى مەكەندەردەن الدىن الا 11172 ادام قاۋىپسىز جەرگە كوشىرىلدى. وڭىرلەردە دەن قويۋ جۇمىستارى بويىنشا اۆاريالىق- قۇتقارۋ بولىمشەلەرىنىڭ كۇشتەرى مەن قۇرالدارى قۇرىلدى: جالپى سانى 23 972 ادام، 7361 بىرلىك تەحنيكا، 982 ءجۇزۋ قۇرالدارى، 16 تىكۇشاق جۇمىلدىرىلدى. جيىن قورىتىندىسى بويىنشا باقىتجان ساعىنتايەۆ وبلىستار، استانا مەن الماتى قالالارىنىڭ اكىمدىكتەرىنە مۇددەلى مەملەكەتتىك ورگاندارمەن بىرلەسىپ كۇندەلىكتى مونيتورينگ جۇرگىزۋدى، جاعدايدى تۇراقتى باقىلاۋدا ۇستاۋدى، قالىپتاسقان جاعدايعا جەدەل دەن قويۋدى تاپسىردى.
اۆتور: قانات مامەتقازى ۇلى
