ر. ەردوعانعا ق. ا. ياسساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ قۇرمەتتى پروفەسسورى اتاعى بەرىلدى - فوتو
دەپ حابارلايدى اقوردانىڭ باسپا ءسوز قىزمەتى.
بۇدان بۇرىن حابارلانعانداي، قازاقستان مەن تۇركيا باسشىلارى - نۇرسۇلتان نازاربايەۆ پەن رەدجەپ تايىپ ەردوعان بۇگىن تۇركىستان قالاسىنداعى قوجا احمەت ياسساۋي اتىنداعى حالىقارالىق قازاق- تۇرىك ۋنيۆەرسيتەتىندە بولدى.
وقۋ ورنىنا كەلگەن نۇرسۇلتان نازاربايەۆ پەن رەدجەپ ەردوعان ۋنيۆەرسيتەت قالاشىعىنىڭ ماكەتىمەن تانىستى جانە مۋزەيدى ارالاپ كوردى. سونداي- اق ەكى ەل پرەزيدەنتتەرى قۇرمەتتى قوناقتار كىتابىنا قولتاڭبا قالدىردى.
تۇركيا پرەزيدەنتى ۋنيۆەرسيتەتتىڭ وقىتۋشى- پروفەسسورلار قۇرامى الدىندا ءسوز سويلەدى.
ر. ەردوعان كورسەتىلگەن قۇرمەت ءۇشىن العىس ءبىلدىرىپ، تۇركى تىلدەس ەلدەردىڭ اراسىنداعى بايلانىستى نىعايتۋداعى وقۋ ورنى قىزمەتىنىڭ ماڭىزدىلىعىن اتاپ ءوتتى.
تۇركيا پرەزيدەنتى قوجا احمەت ياسساۋيدىڭ بۇكىل تۇركى دۇنيەسىنە قالدىرعان رۋحاني مۇراسىنىڭ ورنى ايرىقشا ەكەنىن ايتتى.
ر. ەردوعان تۇركيانىڭ ءاربىر تۇرعىنى ءۇشىن ورتالىق ازيا، سونىڭ ىشىندە قازاقستان زور مانگە يە ەكەنىنە نازار اۋداردى.
- سوڭعى 20 جىلدا ەلدەرىمىزدىڭ ساياسي، الەۋمەتتىك جانە مادەني ومىرىندە زور وزگەرىستەر بولدى. قازاقستان تاۋەلسىزدىك العاننان كەيىنگى ەمتيحاننان جاقسى ءوتتى. بارلىق سىناقتاردى ەڭسەرىپ، ۇلكەن تابىستارعا جەتتى. بۇل كوبىنە كوپ ءوز ەلىن جوعارى دەڭگەيگە شىعارۋ ءۇشىن ونىڭ گەوگرافيالىق قونىسىن پايدالانا بىلگەن نۇرسۇلتان نازاربايەۆتىڭ ارقاسىندا مۇمكىن بولدى، - دەدى تۇركيا پرەزيدەنتى.
قوجا احمەت ياسساۋي اتىنداعى حالىقارالىق قازاق- تۇرىك ۋنيۆەرسيتەتى تۇركى تىلدەس مەملەكەتتەر ىشىندە حالىقارالىق مارتەبەسى بار بىردەن- ءبىر جوعارى وقۋ ورنى سانالادى. وندا الەمنىڭ تۇركى حالىقتارى تۇرىپ جاتقان 32 ەلىنەن كەلگەن ستۋدەنتتەر وقيدى. ساباق قازاق، تۇرىك، ورىس جانە اعىلشىن تىلدەرىندە جۇرەدى.
