ن. نازاربايەۆ تۇرىك كاسىپكەرلەرىن ينۆەستيتسيالىق جوبالارعا بەلسەنە قاتىسۋعا شاقىردى
بۇل تۋرالى بۇگىن قازاقستان- تۇركيا بيزنەس فورۋمىندا ەلباسى نۇرسۇلتان نازاربايەۆ ايتتى.
«بۇگىندە الماتى، باتىس قازاقستان، وڭتۇستىك قازاقستان وبلىستارىندا قازاق- تۇرىك يندۋستريالىق ايماعىن قۇرۋ جۇمىستارى جۇرگىزىلۋدە. انكارانىڭ تۇبىندەگى وسىنداي ايماقتى مەن ءوزىم بارىپ كورىپ، ول جەردە جۇمىس ىستەپ جاتقان تۇرىكتىڭ ازاماتتارىن قازاقستانعا شاقىرىپ، ءبىز قازىر بىرنەشە وبلىستا سونداي ەركىن ايماق قۇرىپ جاتىرمىز. ولاردا قۇرىلىس ماتەريالدارىن، توقىما، تۇرمىستىق حيميا ونىمدەرىن جانە وزگە دە بۇيىمداردى ءوندىرۋ جۇزەگە اسىرىلادى» ، - دەدى مەملەكەت باسشىسى.
سونىمەن قاتار ەلباسى قازاقستاننىڭ الەمنىڭ دامىعان وتىز ەلىنىڭ قاتارىنا قوسىلۋ ءورشىل ماقساتىن الدىنا قويىپ وتىرعانىن باسا ايتتى. «وعان جەتۋ ءۇشىن قولايلى ينۆەستيتسيالىق احۋال قالىپتاستىرىلاتىن بولادى» ، - دەدى ق ر پرەزيدەنتى.
مەملەكەت باسشىسى ەلىمىزگە شەتەل ينۆەستيتسياسىن مولىنان تارتۋ ءۇشىن ەڭ تومەنگى سالىق بەلگىلەنىپ، اكىمشىلىك كەدەرگىلەردىڭ جويىلعانىن اتاپ ءوتتى.
«تۇرىكتىڭ ىسكەر توپتارىن نەگىزى ينۆەستيتسيالىق باعىتتارعا، جوبالارعا بەلسەنە اتسالىسۋعا شاقىرامىن» ، - دەدى ەلباسى.
اۆتور: مارلان جيەمباي
