ەلباسى: قازاقستان مەن تۇركيا اراسىنداعى دوستىق جانە باۋىرلاستىق قارىم- قاتىناس وتە جوعارى دەڭگەيدە

استانا. قازاقپارات - ەلباسى نۇرسۇلتان نازاربايەۆ قازاقستانعا مەملەكەتتىك ساپارمەن كەلگەن تۇركيا رەسپۋبليكاسىنىڭ پرەزيدەنتى رەدجەپ تايىپ ەردوعانمەن كەزدەستى.

بۇل تۋرالى اقوردانىڭ باسپا ءسوز قىزمەتىنەن حابارلادى.

كەزدەسۋ بارىسىندا قازاق- تۇرىك قارىم- قاتىناستارىن ودان ءارى نىعايتۋ، ءوزارا ءىس- قيمىلداردى بايلانىستاردىڭ كەڭ اۋقىمىندا دامىتۋ ماسەلەلەرى تالقىلاندى.

نۇرسۇلتان نازاربايەۆ پەن رەدجەپ تايىپ ەردوعان ساۋدا- ەكونوميكالىق، ينۆەستيتسيالىق، ونەركاسىپتىك، كولىك- ترانزيتتىك جانە مادەني- گۋمانيتارلىق سالالارداعى بايلانىستاردى تەرەڭدەتۋ جولدارىن قارادى.

 مەملەكەتتەر باسشىلارى حالىقارالىق جانە وڭىرلىك كۇن تارتىبىندەگى وزەكتى جايتتاردى دا قوزعادى.

قازاقستان پرەزيدەنتى ەكى ەلدىڭ اراسىندا ورناعان دوستىق جانە باۋىرلاستىق قارىم- قاتىناس وتە جوعارى دەڭگەيدە ەكەنىن اتاپ ءوتتى.

«ءسىزدىڭ باسشىلىعىڭىزبەن تۇركيا سوڭعى 12 جىلدا زور تابىستارعا جەتتى. ول ەكونوميكالىق كورسەتكىشتەرى جاعىنان الەمدە 16 - ورىندا، بۇل - بۇكىل حالىقتىڭ ەڭبەگى مەن ءسىزدىڭ كۇش- جىگەرىڭىزدىڭ ناتيجەسى. سىزبەن بىرگە ۇلكەن دەلەگاتسيا كەلدى، ولار بۇگىن ەكىجاقتى بيزنەس فورۋمعا قاتىسادى. ءسىزدىڭ ساپارىڭىز ءبىزدىڭ قارىم- قاتىناستارىمىزدى جاڭا دەڭگەيگە كوتەرۋگە سەپتىگىن تيگىزەتىنىنە سەنىمدىمىن»، - دەدى قازاقستان پرەزيدەنتى.

ر. ەردوعان قازاقستان پرەزيدەنتىنە بىلتىر تۇركياعا ساپارمەن كەلىپ، يناۋگۋراتسيا راسىمىنە قاتىسقانى ءۇشىن ريزاشىلىعىن ءبىلدىردى.

 «الەمدەگى كۇردەلى ەكونوميكالىق احۋال جاعدايىندا قازاقستان قارقىندى دامىپ، ەلەۋلى تابىستارعا جەتۋدە. بۇل ءبىزدى قۋانتادى. سونداي- اق مۇندا تاياۋدا پرەزيدەنتتىك سايلاۋ وتەدى. مەن سىزگە زور تابىس تىلەيمىن»، - دەدى تۇركيا پرەزيدەنتى.