ن. نازاربايەۆ قىتايدىڭ قازاقستانداعى ەلشىسىن قابىلدادى

استانا. قازاقپارات - مەملەكەت باسشىسى نۇرسۇلتان نازاربايەۆ قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى جاڭ حانحۋيدى قابىلدادى.

بۇل تۋرالى اقوردانىڭ باسپا ءسوز قىزمەتى حابارلادى.

كەزدەسۋ بارىسىندا قازاقستان- قىتاي قارىم-قاتىناسىنىڭ ودان ءارى دامۋىنىڭ نەگىزگى باعىتتارى، سونداي-اق قىتاي حالىق رەسپۋبليكاسىنىڭ ءتوراعاسى شي جينپيڭنىڭ الداعى مەملەكەتتىك ساپارىنىڭ دايىندىعىنا قاتىستى ماسەلەلەر تالقىلاندى.

ەلباسى ەكى ەل اراسىنداعى دوستىق جانە سەنىمگە قۇرىلعان قاتىناستاردىڭ دەڭگەيى جوعارى ەكەنىن اتاپ ءوتتى.

- ق ح ر مەملەكەتتىك كەڭەسىنىڭ پرەمەرى لي كىشياڭنىڭ بىلتىرعى ساپارى تابىستى بولدى، ءبىز ءبىرقاتار ماڭىزدى ۋاعدالاستىقتارعا قول جەتكىزدىك. قىتايدىڭ «ءبىر بەلبەۋ، ءبىر جول» باستاماسى مەن ءبىزدىڭ «نۇرلى جول» باعدارلامامىزدىڭ ۇقساستىقتارى كوپ. ءبىزدىڭ ەلدەرىمىزدىڭ ءىس-قيمىلى «باتىس ەۋروپا - باتىس قىتاي» اۆتوماگيسترالىنىڭ قۇرىلىسىندا دا توعىسادى، گاز قۇبىرى مەن تەمىرجولدار سالۋدامىز، - دەدى نۇرسۇلتان نازاربايەۆ.

ق ح ر ەلشىسى قازاقستان- قىتاي قارىم-قاتىناستارى وركەندەپ وتىرعانىن، ءوزىنىڭ دامۋ تاريحىندا ەڭ جوعارى دەڭگەيگە كوتەرىلگەنىن اتاپ ءوتتى.

- «قازاقستان-2050» ستراتەگياسى جانە «قىتاي ارمانى» باعدارلاماسى دا ماقساتى مەن مەرزىمى جاعىنان ۇقساس. قازاقستان مەن قىتاي تاتۋ كورشى عانا ەمەس، ستراتەگيالىق سەرىكتەس تە بولىپ سانالادى. ءبىز قازاقستاننىڭ ەل ىشىندەگى جانە وڭىردەگى تۇراقتىلىقتى ساقتاۋعا باعىتتالعان ۇمتىلىسىن قولدايمىز. قىتاي تاراپى دوستىق پەن ەكىجاقتى قارىم-قاتىناستاردى جوعارى باعالايدى، - دەدى ج. حانحۋي.