قازاقستاندىق دەلەگاتسيا حالىقارالىق كورمەلەر بيۋروسىنىڭ اتقارۋشى كوميتەتىنىڭ جۇمىسىنا قاتىستى
بۇل تۋرالى ق ر س ءى م باسپا ءسوز قىزمەتىنەن حابارلادى.
قازاقستاندىق دەلەگاتسيا «ەكسپو-2017» كورمەسىنە دايىندىق جۇمىسى جانە جوسپارلارى تۋرالى اقپارات بەردى.
«ەكسپو-2017» كوميسسارى حالىقارالىق قاتىسۋشىلاردى جۇمىلدىرۋ بويىنشا جۇمىس بارلىق دەڭگەيدە جانە باعىتتا اتقارالىپ جاتقانىن ايتىپ، ونىڭ ەۋروپا جانە ازيا ەلدەرىنە ساپارلارى، كورمەنىڭ قۇقىقتىق نەگىزدەمەسى مەن كورمە تاقىرىبىن ءىرى حالىقارالىق الاڭداردا ىلگەرىلەتۋدەگى اقپاراتتىق-يميدجدىك ناۋقان تۋرالى اتقارىلعان جۇمىس بويىنشا بايانداما جاسادى.
ر. جوشىبايەۆ كورمەنىڭ دايىندىق جۇمىسى مەملەكەت باسشىسىنىڭ تىكەلەي باقىلاۋىندا ەكەنىن جەتكىزىپ، قازاقستاندىق تاراپتىڭ كورمەنى ساپالى دايىنداۋ مەن وتكىزۋ بويىنشا بارلىق ءتيىستى شارالاردى جۇرگىزىپ جاتقاندىعىن مالىمدەدى.
سونىمەن قاتار، وتىرىس بارىسىندا كورمەنىڭ ماستەر-كونتەنت-جانە كوممۋنيكاتسيالىق جوسپارلارى تانىستىرىلدى. «استانا ەكسپو-2017» ۇ ك» ا ق ءتوراعاسىنىڭ ورىنباسارى ۆەرا كوباليا قۇرىلىس جۇمىستارىنىڭ جاعدايى مەن كومپانيانىڭ الداعى جوسپارلارى تۋرالى اقپارات بەردى.
وتىرىس قورىتىندىسى بويىنشا، اتقارۋشى كوميتەتتىڭ باسشىلىعى مەن مۇشەلەرى «ەكسپو-2017» كورمەسىنىڭ دايىندىق دەڭگەيىنە وڭ باعا بەردى.
اتقارۋشى كوميتەت مۇشەلەرى، سونىمەن بىرگە، 2015-جىلى ميلاندا، 2016-جىلى انتاليادا، 2019-جىلى پەكيندە جانە 2020-جىلى دۋبايدا وتەتىن كورمە وكىلدەرىنىڭ دايىندىق بويىنشا ەسەپتەرىن تىڭدادى.
«ەكسپو-2017» حالىقارالىق مامانداندىرىلعان كورمەسى 2017-جىلى 10- ماۋسىمنان 10- قىركۇيەككە دەيىن 3 ايعا سوزىلادى. كورمەگە 100 دەن اسا مەملەكەت، 10 نان اسا حالىقارالىق بەدەلدى ۇيىمدار مەن يننوۆاتسيالىق تەحنولوگيالار سالاسىنداعى كوشباسشى كومپانيالار قاتىسادى دەپ كۇتىلۋدە. بۇگىنگى كۇنى 21 مەملەكەت جانە 3 حالىقارالىق ۇيىم استاناداعى كورمەگە قاتىساتىندىعىن رەسمي تۇردە راستادى.
