ن. نازاربايەۆ ش ق و- دا ونەركاسىپ جانە مادەنيەت سالاسىنىڭ دامۋ قارقىنى جوعارى ەكەنىن ايتتى
بۇل تۋرالى اقوردانىڭ باسپا ءسوز قىزمەتىنەن حابارلادى.
مەملەكەت باسشىسى ونەركاسىپ سالاسىنداعى ءوسىمنىڭ جوعارى ەكەنىن، سونداي-اق ءوڭىردىڭ مادەنيەت سالاسى دا جاقسى دامىپ كەلە جاتقانىن ايتتى.
- ساپار بارىسىندا مەن مىرىش، قورعاسىن، مىس، التىن جانە كۇمىس سەكىلدى ەكسپورتتىق ونىمدەردى كوپ كولەمدە وندىرەتىن «قازمىرىش» كاسىپورنىندا بولدىم. وسكەمەن يندۋسترياسى ءۇشىن باستى ماسەلەلەنىڭ ءبىرى ەكولوگيالىق تازالىق بولىپ وتىر.
قازىرگى ۋاقىتتا زاماناۋي ەكولوگيالىق تالاپتارعا ساي كاسىپورىندار سالىنۋدا، بۇل قالانىڭ قاۋىپسىز بولاشاعىن قامتاماسىز ەتەدى. سونىمەن قاتار، جاڭا تەاتر عيماراتى سالىندى، بۇرىنعىسى ⅩⅨ عاسىردا سالىنعان ەسكى عيماراتتا ورنالاسقان ەدى.
ەندى تەاتر ۇجىمى ءتيىستى جابدىقتارى، 600 ورىندىق كورەرمەن زالى، 150 ورىندىق كىشى زالى بار كەرەمەت جاڭا عيماراتقا كىردى. وسكەمەندە تۇرعىندار ونەردى تاماشالاۋ ءۇشىن كەلەتىن جاڭا مادەني ورتالىق پايدا بولدى، - دەدى قازاقستان پرەزيدەنتى.
نۇرسۇلتان نازاربايەۆ ەكولوگيالىق قاۋىپسىزدىكتى قامتاماسىز ەتۋ، دەنساۋلىق ساقتاۋ جۇيەسىن جانە مەديتسينالىق كومەك ساپاسىن جاقسارتۋ باعىتىندا مەملەكەتتىڭ كۇش-جىگەر جۇمساپ جاتقانىنا نازار اۋداردى.
- سەمەي قالاسى قىرىق جىل بويى يادرولىق سىناق وتكىزۋ ورنى بولىپ، سونىڭ سالدارىنان كوپتەگەن ادام زارداپ شەككەن وڭىردە ورنالاسقان. بۇگىندە قالانىڭ مەديتسينالىق مەكەمەلەرى مەن ولاردىڭ جابدىقتالۋى قازاقستانداعى ەڭ ۇزدىكتەردىڭ قاتارىندا سانالادى.
مەن ەلدەگى ونكولوگيالىق اۋرۋلاردى ەمدەۋگە ارنالعان بىردەن-ءبىر راديولوگيالىق ورتالىقتى ارالاپ كوردىم. وسىنداي ورتالىق استانادا دا سالىناتىن بولادى. دياگنوستيكا جانە ەمدەۋ ىسىندە ەنگىزىلىپ جاتقان راديولوگيالىق ءادىس ەلىمىزدىڭ كوپتەگەن ازاماتتارىنا كومەك كورسەتۋگە مۇمكىندىك بەرەدى، - دەدى مەملەكەت باسشىسى.
قازاقستان پرەزيدەنتى رەسپۋبليكانى كولىك جانە ينفراقۇرىلىمدىق تۇرعىدان ودان ءارى دامىتۋ قاجەتتىگىنە توقتالدى.
- قازىرگى ۋاقىتتا ءبىز «قازاقستان-2050» ستراتەگياسىن جۇزەگە اسىرۋدامىز، ونىڭ اياسىندا الەمنىڭ دامىعان 30 مەملەكەتىنىڭ قاتارىنا كىرۋدى جوسپارلاپ وتىرمىز. «نۇرلى جول» باعدارلاماسىن ىسكە اسىرىپ، «ماڭگىلىك ەل» ۇلتتىق يدەياسىن ىلگەرىلەتۋدەمىز. حالىق بۇل باستامالاردى، قازاقستانداعى تۇراقتىلىق پەن بىرلىكتى قولداپ وتىر، - دەدى نۇرسۇلتان نازاربايەۆ.
سوڭىندا مەملەكەت باسشىسى وبلىس تۇرعىندارىنا تابىس جانە باق-بەرەكە تىلەدى.
