ەلباسى: سەمەي ونكولوگيالىق ديسپانسەرى - ەلىمىزدەگى يادرولىق مەديتسينا ەلەمەنتتەرىن قولداناتىن بىرەگەي مەكەمە

استانا. قازاقپارات - ەلباسى نۇرسۇلتان نازاربايەۆ سەمەي قالاسىنداعى وڭىرلىك ونكولوگيالىق ديسپانسەردە بولدى.

 بۇل تۋرالى اقوردانىڭ باسپا ءسوز قىزمەتىنەن حابارلادى.

مەملەكەت باسشىسى نىسان جۇمىسىمەن تانىسىپ، جاڭا مەديتسينالىق قۇرالدارمەن جابدىقتالعان ورىنجايلاردى ارالاپ كوردى.

قازاقستان پرەزيدەنتى سونداي- اق ەڭبەك ۇجىمى وكىلدەرىمەن اڭگىمەلەسىپ، قالانىڭ مەديتسينالىق مەكەمەلەرى قاجەتتى ەمحانالىق جانە دياگنوستيكالىق جابدىقتارمەن قامتاماسىز ەتىلىپ وتىرعانىن ايتتى.

- بۇل كەشەنگە مەملەكەت 7,2 ميلليارد تەڭگە ءبولدى، سونىڭ 4 ميللياردى زاماناۋي جابدىقتار الۋعا ارنالعان. بۇل - يادرولىق مەديسينا ەلەمەنتتەرىن قولداناتىن قازاقستان ءۇشىن بىرەگەي مەكەمە. ەندى وسى جابدىقتاردى حالىققا كاسىبي كومەك كورسەتۋ ءۇشىن بارىنشا ءتيىمدى قولدانۋ سىزدەرگە بايلانىستى. بۇكىل ەل بويىنشا دەنساۋلىق ساقتاۋ سالاسىن دامىتۋدىڭ ارقاسىندا ازاماتتاردىڭ ورتاشا ءومىر جاسى سوڭعى ون جىلدا 64 تەن 71 گە دەيىن ۇلعايدى، - دەدى مەملەكەت باسشىسى.

***

ديسپانسەردە ونكولوگيالىق ناۋقاستارعا امبۋلاتورلىق- ەمحانالىق، ستاتسيونارلىق جانە ستاتسيونار الماستىرۋ فورماسىندا مامانداندىرىلعان ءارى جوعارى بىلىكتى مەديتسينالىق جاردەم كورسەتىلەدى. مەديتسينالىق مەكەمەدە 413 ادام قىزمەت ەتەدى.