مەملەكەت باسشىسى اۋىل شارۋاشىلىعى مينيسترىنە ءبىرقاتار تاپسىرمالار بەردى

استانا. قازاقپارات - مەملەكەت باسشىسى نۇرسۇلتان نازاربايەۆ اۋىل شارۋاشىلىعى ءمينيسترى اسىلجان مامىتبەكوۆتى قابىلدادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

ا. مامىتبەكوۆ مينيسترلىكتىڭ قازىرگى قىزمەتى، كوكتەمگى ەگىس جۇمىستارىنا دايىندىق بارىسى، سونداي-اق الداعى كەزەڭگە ارنالعان جوسپارلار تۋرالى باياندادى.

نۇرسۇلتان نازاربايەۆ رەسپۋبليكا الدىندا اۋىل شارۋاشىلىعى سالاسىنا قاتىستى ءبىرقاتار ماڭىزدى مىندەتتەر تۇرعانىنا نازار اۋداردى.

«اۋىل شارۋاشىلىعى كاسىپورىندارىنىڭ قارجىلىق جاعدايىن تارتىپكە كەلتىرۋ كەرەك. كاسىپورىندار وسى ماقساتقا بولىنگەن مەملەكەتتىك قاراجاتتىڭ ناتيجەسىن كورسەتۋى ءتيىس. باسىمدىعى بار تاعى ءبىر ماسەلە - نەگىزگى ازىق-تۇلىك ونىمدەرىمەن قامتاماسىز ەتۋ كەزىندەگى يمپورت الماستىرۋ. قازىرگى ۋاقىتتا يمپورتتالىپ وتىرعان قۇس ەتى، شۇجىق ونىمدەرى، الما سياقتى ءونىم تۇرلەرى بويىنشا ءوز ءوندىرىسىمىزدى جولعا قويۋ قاجەت. جالپى، قايتا وڭدەۋدى ۇلعايتىپ، اۋىل شارۋاشىلىعى ونىمدەرىنىڭ قوسىلعان قۇنىن ارتتىرۋ كەرەك»، - دەدى مەملەكەت باسشىسى.

قازاقستان پرەزيدەنتى كوكتەمگى ەگىس جۇمىستارىن ساپالى ءارى دەر كەزىندە جۇرگىزۋ قاجەتتىگىن دە اتاپ ءوتتى.

«كۇزگى ىلعال ءسىڭىرۋ جاقسى بولدى. توپىراق ىلعالىنىڭ جوعارى بولعانى ءبىر جاعىنان پايدالى، ءبىراق كوكتەمدە قىزىلسۋ مول بولادى دەپ بولجانۋدا. بۇعان ءتيىستى قىزمەتتەر دايىن بولۋى كەرەك. سولتۇستىك قازاقستان، قاراعاندى جانە اقمولا وبلىستارىنا ايرىقشا نازار اۋدارا وتىرىپ، حالىققا ۋاقىتىلى ەسكەرتكەن ءجون»، - دەدى نۇرسۇلتان نازاربايەۆ.

ا. مامىتبەكوۆ كوكتەمگى ەگىستىك جۇمىستارى ەلدىڭ وڭتۇستىك وڭىرلەرىندە باستالىپ كەتكەنىن، سولتۇستىك وبلىستاردا دايىندىق ءجۇرىپ جاتقانىن ايتتى. بۇل شارالارعا قاجەتتى تەحنيكا بار، اگرارشىلار جانار-جاعار مايمەن جانە رەسپۋبليكالىق بيۋدجەتتەن 60 ميلليارد تەڭگە كولەمىندەگى نەسيەلەرمەن قامتاماسىز ەتىلگەن. سونداي-اق وزگە دە كوزدەردەن قارجىلاندىرۋ جۇزەگە اسىرىلۋدا.

اۋىل شارۋاشىلىعى ءمينيسترى 2013-جىلدىڭ كورسەتكىشتەرىمەن سالىستىرعاندا، 2014-جىلى ءبىرىنشى رەت يمپورتتىڭ 6 پايىزعا، سونىڭ ىشىندە كەدەن وداعى ەلدەرىنەن كەلەتىن يمپورت 10 پايىزعا تومەندەگەنى بايقالعانىن اتاپ ءوتتى. جالپى، سىرتتان اكەلىنەتىن اۋىل شارۋاشىلىعى شيكىزاتى مەن وڭدەلگەن ونىمدەردىڭ كولەمى 4 ميلليارد دوللاردى قۇرايدى. سونىڭ 1 ميللياردقا جۋىعى ەلىمىز وندىرە المايتىن تاۋارلارعا تيەسىلى.

«ءبىزدىڭ ماقسات - ەل ىشىندە شىعارۋعا قاجەتتى بارلىق مۇمكىندىگى بار ونىمدەردىڭ ءوندىرىسىن قامتاماسىز ەتۋ»، - دەدى ا. مامىتبەكوۆ.

ا. مامىتبەكوۆ سونداي-اق اۋىل شارۋاشىلىعى تاۋارىن وندىرۋشىلەردى ىنتالاندىرۋ ماقساتىندا جۇيەلى جۇمىس جۇرگىزىلىپ جاتقانىن، سونىڭ اياسىندا سالىق زاڭناماسىنا وزگەرىستەر ەنگىزىلگەنىن ايتتى.

كەزدەسۋ قورىتىندىسى بويىنشا مەملەكەت باسشىسى قارالعان ماسەلەلەرگە قاتىستى ءبىرقاتار ناقتى تاپسىرما بەردى.