قايرات يشانوۆ موڭعوليا ۇلى مەملەكەتتىك حۇرالىنىڭ مۇشەسىمەن كەزدەستى - فوتو
استانا. قازاقپارات - 24 - اقپاندا قازاقستان رەسپۋبليكاسى پارلامەنتى سەناتى ءتوراعاسىنىڭ ورىنباسارى قايرات يشانوۆ موڭعوليا ۇلى مەملەكەتتىك حۇرالىنىڭ مۇشەسى، موڭعوليا- قازاقستان پارلامەنتتىك توبىنىڭ جەتەكشىسى المالىق تىلەيحانمەن كەزدەستى.
مەيمانمەن كەزدەسۋدە ق. يشانوۆ ا. تىلەيحاننىڭ ءبىزدىڭ ەلىمىزگە ساپارى قازاقستان مەن موڭعوليا اراسىنداعى ءوزارا ءتيىمدى ىنتىماقتاستىققا جاڭا سەرپىن بەرەتىنەن اتاپ ءوتتى.
كەزدەسۋ باراسىندا ءتوراعا ورىنباسارى سەناتتىڭ زاڭ شىعارۋ قىزمەتى جانە پارلامەنت ارالىق ءۇنقاتىسۋدى ۇدەتۋ جايىندا ايتتى.
حالىقارالىق كۇن ءتارتىبىن تالقىلاي كەلىپ، ق. يشانوۆ ب ۇ ۇ قاۋىپسىزدىك كەڭەسىنە تۇراقتى ەمەس مۇشەلىگىنە قازاقستاننىڭ كانديداتۋراسىنا ۇلان- باتوردىڭ قولداۋىنا سەنىم ءبىلدىردى جانە موڭعول كومپانيالارىن استانادا وتەتىن «ەكسپو-2017» حالىقارالىق كورمەسىنە قاتىسۋعا شاقىردى.
سەنات ءتوراعاسىنىڭ ورىنباسارى سونىمەن قاتار الەمدىك جانە ءداستۇرلى دىندەر ليدەرلەرىنىڭ V سەزىنە ازىرلىك تۋرالى ا. تىلەيحاندى حاباردار ەتىپ، ءدىني فورۋمعا تۇراقتى قاتىسىپ كەلە جاتقانى ءۇشىن موڭعول جاعىنا ريزاشىلىعىن ءبىلدىردى. «وتكەن ءتورت فورۋم دىندەر مەن وركەنيەتتەر اراسىنداعى ءۇنقاتىسۋدى ىلگەرىلەتۋگە ىقپال ەتتى. سەزد دىندەر مەن مادەنيەتتەر اراسىنداعى قايشىلىقتار تەك ىنتىماقتاستىق پەن ءوزارا سەنىم ارقىلى ەڭسەرۋدىڭ ناقتى كورىنىسى بولدى»، - دەدى ق. يشانوۆ.
كەزدەسۋگە سەناتورلار مۇرات باقتيار ۇلى، باقتىباي شەلپەكوۆ جانە ءماجىلىس دەپۋتاتى اسحات بەكەنوۆ قاتىستى.
اۆتور: سەرىك قاراجان
