قازاقستاندا جاسالعان: جامبىلدىق كومپانيالار قازاقستانعا جاڭا ءونىم تۇرلەرىن ۇسىنباق - فوتو

تاراز. قازاقپارات - جامبىلدىق كومپانيالار جاڭا ءونىم تۇرلەرىن شىعارۋدى قولعا الدى، دەپ اتاپ ءوتتى وبلىستىق اكىمدىكتىڭ كەزەكتى وتىرىسىندا ءوڭىر باسشىسى كارىم كوكىرەكبايەۆ.

 «ءۇ ي ي د مەملەكەتتىك باعدارلاماسىنىڭ اياسىندا التى كومپانيا قازاقستاندا بۇرىن شىعارىلماعان جاڭا ءونىم تۇرلەرىن يگەردى. بۇلار - ەنەرگيا ۇنەمدەيتىن ديودتى شامدار، توپس ءوندىرىسى، پارفيۋمەريالىق وندىرىسكە ارنالعان سافلورلىق ماي، ءبىر رەتتىك مەديتسينالىق بۇيىمدار، گەكسامەتافوسفات ناتريي، سيانيد ناتريي»، - دەدى جامبىل وبلىسىنىڭ اكىمى.

تۇتاستاي، ءۇ ي ي د  م ب اياسىندا وڭىردە جالپى سوماسى 2 ميلليارد تەڭگەگە 41 ينۆەستيتسيالىق جوبا ىسكە اسىرىلۋدا، ول 8,2 مىڭ جاڭا جۇمىس ورنىن قۇرۋعا مۇمكىندىك بەردى.

جامبىل وبلىسىنىڭ ونەركاسىپتىك وندىرىسىندە 2014 - جىلدىڭ قورىتىندىسى بويىنشا 274,3 ميلليارد تەڭگەگە ءونىم شىعارىلدى.

 يندۋستريالاندىرۋ كارتاسىنىڭ جوبالارىن ىسكە اسىرۋدىڭ قارقىنى دا قۋانتارلىقتاي. 2010 - جىلدان باستاپ، ءۇ ي ي د مەملەكەتتىك باعدارلاماسىن ىسكە اسىرۋ كەزىندە سوماسى 123,3 ميلليارد تەڭگەگە 33 جوبا ىسكە اسىرىلدى، 5 مىڭ تۇراقتى جۇمىس ورنى قۇرىلدى. 2015-2019 - جىلدار كەزەڭىندە وسى باعدارلاما اياسىندا 527,2 ميلليارد تەڭگەگە تاعى دا 14 ينۆەستيتسيالىق جوبانى ىسكە اسىرۋ كوزدەلگەن بۇل رەتتە 4 مىڭنان استام تۇراقتى جۇمىس ورنى قۇرىلدى، - دەپ اتاپ ءوتتى اكىمدىكتىڭ باسپا ءسوز قىزمەتىنەن.