استانادا قازاقستان، بەلارۋس جانە رەسەي كوشباسشىلارىنىڭ كەزدەسۋى وتەدى
استانا. قازاقپارات - ق ر پرەزيدەنتى نۇرسۇلتان نازاربايەۆ بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن تەلەفون ارقىلى سويلەستى. بۇل تۋرالى اقوردانىڭ باسپا ءسوز قىزمەتىنەن حابارلادى.
ا. لۋكاشەنكو رەسەي، ۋكراينا، فرانسيا پرەزيدەنتتەرىنىڭ جانە گەرمانيا كانتسلەرىنىڭ مينسكىدە «نورماند فورماتىندا» وتكىزگەن كەلىسسوزدەرىنىڭ قورىتىندىلارى تۋرالى ايتتى.
قازاقستان پرەزيدەنتى ءوزىن حاباردار ەتكەنى ءۇشىن العىس ءبىلدىردى جانە كەزدەسۋدىڭ جاقسى ۇيىمداستىرىلۋىمەن، سونداي-اق كەلىسسوزدەردىڭ تابىستى اياقتالۋىمەن قۇتتىقتادى.
مەملەكەتتەر باسشىلارى بارلىق تاراپتىڭ بەيبىت ۇدەرىستى قامتاماسىز ەتۋگە جۇمساعان كۇش-جىگەرى ۋكرايناداعى داعدارىستى رەتتەۋگە سەپتىگىن تيگىزەدى دەپ ۇمىتتەنەتىندەرىن ءبىلدىردى.
پرەزيدەنتتەر تاياۋ ارادا ءبىزدىڭ ەلىمىزدە قازاقستان، بەلارۋس جانە رەسەي مەملەكەتتەرى باسشىلارىنىڭ كەزدەسۋىن وتكىزۋ تۋرالى ۋاعدالاستى.
تەلەفون ارقىلى سويلەسۋگە بەلارۋس جاعى باستاماشى بولدى.
