اقجايىقتاعى بىرەگەي ەت وڭدەۋ كەشەنى قوزى ەتىن ەكسپورتقا شىعاراتىن بولادى - فوتو
«قاز اگرو قارجى» ا ق- نىڭ قارجىلاي قولداۋىمەن جۇزەگە اسىپ جاتقان بۇل بىرەگەي جوبا مارقا قوزى ەتىن ەكسپورتقا جانە ءوز ەلىمىزگە شىعاراتىن بولادى.
ءوڭىر باسشىسى ونىڭ قوزى سويۋ، توڭازىتقىشتار، ۆاكۋۋمدىق ورامدار جەلىلەرىنىڭ ەرتەڭگى ونىكتىلىگىنە نازار اۋداردى، ۆەتەريناريالىق، زەرتحانالار جۇمىسىنىڭ مۇلتىكسىزدىگى دە اسا ماڭىزدى ەكەنى جايىندا ماماندارمەن اڭگىمەلەستى. يتالياندىق جابدىقتارمەن قالدىقسىز جۇمىس جاسايتىن كەشەننەن قوزى ەتى تۇتىنۋشىلارعا ستەريلدىك تازالىقپەن ۇسىنىلادى. تەحنولوگيا ءونىمنىڭ قاسيەتى 40 كۇن بويى ساقتالۋىنا مۇمكىندىك بەرەدى.
«باتىس مارقا لامب» ج ش س ديرەكتورى باقىتجان كەسكىنبايەۆتىڭ ايتۋىنشا، 6600 شارشى مەتر اۋماقتى الىپ جاتقان كومبيناتتا تاۋلىگىنە 1400 باس مارقا ەتى وڭدەلمەك، ىسكە قوسىلعان سوڭ بىرتىندەپ ەكپىن الا وتىرىپ، جىلىنا 350 مىڭ باس قۋاتتىلىعىنا ءۇشىنشى جىلى جەتپەك. مۇنداي، ياعني سويىلعان بويدا سالقىنداتىلعان مارقا ەتىن شىعاراتىن تەحنولوگيانىڭ باسى - يتاليادا، الىس- جاقىن باسقا ەلدەردە بالاماسى جوق وسىنداي ءىرى جوبا ءۇشىن اقجايىق اۋدانىنىڭ تاڭدالىپ الىنۋى تەگىننەن- تەگىن ەمەس.
رەسپۋبليكادا قوي شارۋاشىلىعىن دامىتۋداعى بۇرىنعى داڭقتى قايتارۋ باعىتىندا جۇمىستار اتقارىلۋدا. ءبىر كەزدە ەلىمىزدە شوپان اتا تۇلىگىنىڭ سانى 40 ميلليونعا تاياعانى بەلگىلى. ەندى سالانىڭ الەۋەتىنە ورالۋعا، الىس جايىلىمداردى قالپىنا كەلتىرۋگە كەزەك جەتتى. ەتتى- مايلى، ەتتى- ءجۇندى قويعا قاتىستى مۇمكىندىك اق جايىق اتىرابىندا دا بارشىلىق. سونىمەن قاتار چاپايەۆتىڭ توعىز جولدىڭ تورابىندا بولۋى ۇتىپ تۇر. سايراپ جاتقان كۇرەجول سويىستىق مالدى جەتكىزۋدە، ايتالىق، اتىراۋ، اقتوبە، ماڭعىستاۋمەن بايلانىستىڭ مىقتى كەپىلى بولىپ تابىلادى. رەسەيدىڭ كورشىلەس وبلىستارىمەن دە ءوزارا ءتيىمدى نەگىزدە قارىم- قاتىناس جاساۋعا بولادى.
سۇيەگىنە دەيىن ۇنتاقتالاتىن، ياعني قالدىقسىز ءوندىرىس تولىق كۇشىنە ەنگەن سوڭ كەشەندە 200 دەن استام ادام ەڭبەك ەتپەك. زاماناۋي تەحنيكا «ءتىلىن» تاباتىن ارنايى ماماندار، سونداي- اق زەرتحاناشىلار، ەنەرگەتيكتەر، زووتەحنيك، ۆەتەريناريا قىزمەتكەرلەرى ماڭدايدان شەرتىپ تۇرىپ جۇمىسقا قابىلداناتىنىن ايتىپ جاتۋ ارتىق شىعار. ويتكەنى، بۇل - تاۋاردىڭ ءبىراز بولىگىن ەكسپورتتايتىن، ستراتەگيالىق باعىتى وراسان ءوندىرىس وشاعى. ونداعان توننالىق سالقىنداتقىشتار، دەزتوسقاۋىلدار، كاناليزاتسيا، 3000 باس قوزى تۇراتىن قورشاۋ، دايىن ونىمدەر قويمالارى - ءبارى دە قاپىسىز جۇمىس جاساۋى ءتيىس.
جۇمىس ساپارى بارىسىندا چاپايەۆ ىرگەسىندە سالىنىپ جاتقان تاعى ءبىر ماڭىزدى نىسان - ءىرى قارا مالىن سوياتىن سەح قۇرىلىسىنىڭ باسىندا بولىپ، جۇمىسشى- قۇرىلىسشىلارمەن تىلدەسكەن وبلىس باسشىسى سونىمەن قاتار اقجايىق اۋدانىنىڭ اكىمى ناريمان تورەعاليەۆتىڭ تۇرعىندارمەن ەسەپتىك كەزدەسۋىنە دە قاتىسىپ، وندا الدا تۇرعان ماقسات- مىندەتتەردى اتاپ كورسەتتى.
