جاستاردى پاتريوتتىق رۋحتا تاربيەلەيتىن تىڭ دۇنيەلەر جاساۋعا شاقىرار ەدىم - ب. ساپاربايەۆ

استانا. قازاقپارات - بۇگىن استاناداعى ۇلتتىق اكادەميالىق كىتاپحانادا قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ساپاربايەۆ ەلىمىزدەگى ءبىرقاتار شىعارماشالىق ۇيىم وكىلدەرىمەن كەزدەستى. جيىنعا پارلامەنت دەپۋتاتتارى دا قاتىستى.

شارا بارىسىندا بۇگىنگى تاڭداعى شىعارماشىلىق وداقتاردىڭ، ونەر ۇجىمدارىنىڭ وزەكتى ماسەلەرى تالقىلاندى. سونىمەن قاتار، زيالى قاۋىم ساناتىنداعى ءبىرقاتار ازاماتتارعا، شىعارماشىلىق ۇيىمدار مۇشەلەرىنە «مادەنيەت سالاسىنىڭ ۇزدىگى» توسبەلگىلەرى تابىس ەتىلدى.

«ءاسىلى وتاندى جىرلاۋدان اسقان مىندەت جوق. سوندىقتان دا ەلىمىزدەگى شىعارماشىلىق وداقتارعا، ونەر ۇجىمدارىنا قازىرگى زامان تالابىنا ساي، قازاقستاننىڭ جەتىستىكتەرىن جىرلايتىن، جاستاردى پاتريوتتىق رۋحتا تاربيەلەيتىن تىڭ دۇنيەلەر جاساۋعا شاقىرار ەدىم. سونداي-اق شىعارماشىلىق ورتا، زيالى قاۋىم، جازۋشىلار مەن ونەر ادامدارى بيىلعى جىلى تويلاناتىن قازاق حاندىعىنىڭ 550 جىلدىعىن، قازاقستان رەسپۋبليكاسى كونستيتۋتسياسى مەن قازاقستان حالقى اسسامبلەياسىنىڭ 20 جىلدىقتارىن، ۇلى جەڭىستىڭ 70 جىلدىعىن اتاپ وتۋگە بەلسەنە قاتىسۋلارى كەرەك»، دەدى ب. ساپاربايەۆ.

ءسوز اراسىندا پرەمەر-ءمينيستردىڭ ورىنباسارى مادەنيەت جانە سپورت مينيسترلىگىنە شىعارماشىلىق وداقتارمەن تىعىز بايلانىستا جۇمىس جاساپ، ەلباسىنىڭ «ماڭگىلىك ەل» يدەياسى جانە «نۇرلى جول» باعدارلاماسى اياسىندا جۇكتەلگەن مىندەتتەردى بىرلەسە اتقارۋدى تاپسىردى.

اۆتور: قانات مامەتقازى ۇلى