قازاق حاندىعى تۋرالى سەريالدىڭ كەيىپكەرلەرىن تەك قازاقستان ازاماتتارى وينايدى
قازاق حاندىعى تۋرالى سەريالدىڭ كەيىپكەرلەرىن تەك قازاقستان ازاماتتارى وينايدى.
«قازىر قوعامدا وسى فيلمگە قاتىستى قىزۋ پىكىرتالاس بولىپ جاتىر. ءبىراق، كينو يندۋستريا سالاسىنداعى ءار قادامىمىز جوعارى دەڭگەيدە بولۋى بارىمىزگە ورتاق ارمان. ەندى، قازاق حاندىعى تۋرالى سەريال 20 بولىمنەن نەگە 10 بولىمگە دەيىن قىسقاردى دەگەن ماسەلەگە كەلسەك، ءبىز سەريال ءتۇسىرۋ ءۇشىن ناقتى قازاق حاندىعىنىڭ قۇرىلعان كەزەڭىن الدىق. بۇعان دەيىن ءبىز قازاق حاندىعىنا دەيىنگى ءداۋىردى، قازىرگى ۋاقىتقا دەيىنگى وزگەرىستەردى قامتۋدى ويلاعان ەدىك»، - دەدى ارىستانبەك مۇحامەدي ۇلى.
«سوندىقتان، سەريال 10 نەمەسە 12 سەريا بولۋى مۇمكىن، بۇل ماسەلە قازىر تالقىلانىپ جاتىر. ياعني، ءبىز وسى 10 نەمەسە 12 سەريادا كەرەي، جانىبەك حانداردان باستاپ كەنەسارى حانعا دەيىنگى كەزەڭدى الىپ وتىرمىز. ارينە، سوندىقتان فيلم 20 بولىمنەن 10-12 بولىمگە قىسقارىپ قالدى»، - دەپ ءتۇسىندىردى مينيستر.
سونداي-اق، سەريالدىڭ رەجيسسەرى رۇستەم ءابدىراش بولۋى مۇمكىن.
«ناقتى ايتسام، بۇل فيلمگە ءبىز شەتەلدەن سەناري ماماندارىن عانا شاقىرىپ جاتىرمىز. شەتەلدىك رەجيسسەر مامانداردى دا تارتۋىمىز مۇمكىن. ءبىراق، باس رەجيسسەر، باس سەناريست، باس كەيىپكەرلەردىڭ بارلىعى قازاقستاندىق ماماندار. سەناريدى اتاقتى جازۋشى سماعۇل ەلۋبايەۆ، تيمۋر جاقسىلىقوۆتار جازۋدا. بۇلاردان وزگە، «شىڭعىس حان» فيلمىنىڭ سەناريىن جازعان ازاماتتى كونسۋلتانت رەتىندە شاقىردىق»، - دەدى مينيستر.
جالپى، قازاقستاندا ەڭ ءبىرىنشى رەت وسىنداي اۋقىمدى تاريحي سەريال تۇسىرىلمەك. باستى كەيىپكەلەردى سومدايتىن تاماشا اكتەرلەرىمىز دە بار.
«قازىر سەريالدىڭ رەجيسسەرى رەتىندە رۇستەم ابدىراشيەۆتىڭ كانديداتۋراسىن قاراستىرىپ جاتىرمىز. رۇستەمدى وزدەرىڭىز دە جاقسى بىلەسىزدەر، ونىڭ شىعارماشىلىعىمەن تانىسسىزدار. ونىڭ ۇستىنە، رۇستەم تاريحي تۋىندى تۇسىرگىسى كەلەتىنىن ايتقان بولاتىن. رۇستەم ابدىراشپەن بىرگە، اقان ساتايەۆتا ءوز ۇسىنىسىن ءبىلدىرىپ جاتىر»، - دەدى مينيستر.
جالپى، ءمينيستردىڭ سوزىنە سەنسەك، قازاق حاندىعى تۋرالى بۇل تاريحي تۋىندىنىڭ باس كەيىپكەرلەرى دە، باس رەجيسسەرى مەن سەناري اۆتورلارى دا قازاق ەلىنىڭ ازاماتتارى بولادى.
bnews.kz
