ەڭبەككە قابىلەتتى بىردە- ءبىر ايەل جۇمىسسىز قالماۋى ءتيىس - گۇلشارا ءابدىقالىقوۆا

استانا. قازاقپارات - بۇگىن ق ر مەملەكەتتىك حاتشىسى، ق ر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گ. ن. ءابدىقالىقوۆانىڭ توراعالىعىمەن سەلەكتورلىق رەجىمدە استانا، الماتى قالالارى مەن وبلىس اكىمدەرىنىڭ ورىنباسارلارى، اكىمدەر جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا ءتوراعالارىنىڭ قاتىسۋىمەن كەڭەس ءوتتى.

بۇل تۋرالى ۇلتتىق كوميسسيا حاتشىلىعىنان حابارلادى.

كەڭەستە ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيا جۇمىسىنداعى مەملەكەت باسشىسىنىڭ «نۇرلى جول - بولاشاققا باستار جول» جولداۋىنىڭ نەگىزگى ەرەجەلەرىن ىسكە اسىرۋعا ارنالعان 2015 - جىلدىڭ نەگىزگى باعىتتارى بەلگىلەندى.

مەملەكەتتىك حاتشى كەڭەسكە قاتىسۋشىلاردىڭ نازارىن ايەلدەردىڭ جۇمىسپەن قامتىلۋى، بيزنەستىڭ الەۋمەتتىك جاۋاپكەرشىلىگىن ارتتىرۋ، ايەلدەر كاسىپكەرلىگىنە قولداۋ كورسەتۋ ماسەلەلەرىنە اۋداردى. «ەڭبەككە قابىلەتتى جانە جۇمىس ىستەۋگە مۇمكىندىگى بار بىردە-ءبىر ايەل جۇمىسسىز قالماۋعا ءتيىس!»، - دەدى گۇلشارا ءابدىقالىقوۆا.

گ. ن. ءابدىقالىقوۆا اسسامبلەيا جىلى، قازاقستان كونستيتۋتسياسىنىڭ 20 جىلدىعى، قازاق حاندىعىنىڭ 550 جىلدىعى، جەڭىستىڭ 70  جىلدىعى اياسىندا وتەتىن بارلىق كاسىبي مەرەكەلەردى، قوعامدىق- بۇقارالىق ءىس- شارالاردى «ءبىزدىڭ كۇشىمىز - بىرلىكتە!» ۇرانىن قولدانا وتىرىپ، وتكىزۋدى قامتاماسىز ەتۋدى تاپسىردى.

مەملەكەتتىك حاتشى ءوڭىر اكىمدەرىنىڭ ورىنباسارلارىنا جەڭىستىڭ 70 جىلدىعىن مەرەكەلەۋ اياسىندا پرەزيدەنتتىڭ ۇلى وتان سوعىسىنىڭ ارداگەرلەرىنە قولداۋ كورسەتۋ جونىندەگى باستامالارىن ىسكە اسىرۋدى قامتاماسىز ەتۋدى، سونىڭ ىشىندە ايەلدەردەن شىققان سوعىس ارداگەرلەرىنىڭ، مايدانگەرلەر ايەلدەرىنىڭ، تىلداعى ەڭبەكشى ايەلدەردىڭ سىڭىرگەن ەڭبەكتەرىن اتاپ ءوتۋدى تاپسىردى.

سەلەكتورلىق كەڭەستىڭ قورىتىندىسى بويىنشا مەملەكەتتىك حاتشى گ. ن. ءابدىقالىقوۆا ءبىرقاتار ناقتى تاپسىرمالار بەردى.