ءا. جاقسىبەكوۆ استانانى دامىتۋدىڭ باسىم باعىتتارىن اتادى

استانا. قازاقپارات - استانا قالاسىنىڭ اكىمى ادىلبەك جاقسىبەكوۆ اپپاراتتىق كەڭەستە ەلوردانىڭ تاياۋ بولاشاقتاعى دامۋىنىڭ نەگىزگى باعدارلارىن انىقتادى، دەپ حابارلايدى ەلوردا اكىمدىگىنىڭ باسپا ءسوز قىزمەتىنەن.

- استانانى دامىتۋدىڭ باستى باعدارى «نۇرلى جول» جاڭا ەكونوميكالىق ساياساتى بولماق. ءبىزدىڭ قىزمەتىمىزدە مەملەكەت باسشىسىنىڭ ەلىمىزدىڭ دامىعان 30 مەملەكەتتىڭ قاتارىنا قوسىلۋى تۋرالى باستاماسىنا ەرەكشە نازار اۋدارىلۋى كەرەك. بۇل ءۇشىن بىزگە ەكونوميكانىڭ ءوسىمىنىڭ قاجەتتى قارقىنى قاجەت، - دەدى قالا باسشىسى.

ادىلبەك جاقسىبەكوۆ استانانى دامىتۋدىڭ ماڭىزدى باعىتتارىنىڭ ءبىرى رەتىندە قۇرىلىس سەكتورىن اتاپ ءوتتى. قالا اكىمى باس جوسپاردى جۇيەلى جۇزەگە اسىرۋ بويىنشا جۇمىستاردى جالعاستىرۋدى، سونىمەن قاتار كرەديتتىك جانە جالعا بەرىلەتىن تۇرعىن ءۇي قۇرىلىسىن اياقتاۋدى تاپسىردى. ەلوردادا ينۆەستيتسيالىق بيزنەس-كليماتتى جاقسارتۋ ءۇشىن ينۆەستيسيالىق جوبالاردى جۇزەگە اسىرۋ بويىنشا جۇمىستاردى بەلسەندىرۋ قاجەت، سونىڭ ىشىندە يندۋستريالىق پاركتە، سونىمەن قاتار كاسىپكەرلىكتى جان-جاقتى قولداۋ، ازيالىق جانە ەۋروپالىق قارجى ينستيتۋتتارىنىڭ نەسيەلىك رەسۋرستارىن ىزدەۋ جانە ءتيىمدى پايدالانۋ بويىنشا كەشەندى شارالار قابىلداۋ كەرەك.

تاعى ءبىر ماڭىزدى ماسەلە - استانانىڭ ەنەرگەتيكالىق ينفراقۇرىلىمىن دامىتۋ بولىپ تابىلادى. باسىم باعىتتاردىڭ ءبىرى - جىلۋ ەلەكتر ورتالىعى(ج ە و)-1 جانە ج ە و-2 قۋاتتىلىقتارىن ارتتىرۋ، سونداي-اق ج ە و-3 قۇرىلىسى بويىنشا جوبانى جۇزەگە اسىرۋ مەرزىمدەرىن ساقتاۋ.

ەلوردا اكىمى استانانىڭ زياتكەرلىك لوگيستيكالىق ستراتەگياسىن جاساۋعا دا باسا نازار اۋداردى. الەۋمەتتىك سالادا جۇمىسسىز جۇرگەن ازاماتتاردى جۇمىسقا ورنالاستىرۋ، حالىقتىڭ الەۋمەتتىك ءالجۋاز توپتارىنا كومەك كورسەتۋ تاپسىرىلدى.

كەڭەس سوڭىندا قالا اكىمى ادىلبەك جاقسىبەكوۆ جىلىتۋ ماۋسىمىنىڭ بارىسىن، اۋلا اۋماقتارىن اباتتاندىرۋدى، قار تازالاۋ مەن جول قوزعالىسى قاۋىپسىزدىگىن تۇراقتى باقىلاۋدى ۇيىمداستىرۋدى تاپسىردى.