ۇلتتىق بايقاۋلاردىڭ جەڭىمپازدارى، جاڭا كاسىپورىنداردىڭ ەڭبەك ۇجىمدارى - جالپىعا ورتاق ەڭبەك قوعامىنىڭ العاشقى قارلىعاشتارى - ەلباسى
بۇل تۋرالى اقوردانىڭ باسپا ءسوز قىزمەتىنەن حابارلادى.
تەلەكوپىر بارىسىندا ەلدىڭ بارلىق وڭىرلەرىمەن 30 عا تارتا بايلانىس جۇزەگە استى، جۇمىس ىستەپ تۇرعان كاسىپورىندار تانىستىرىلىپ، يندۋستريالاندىرۋ كارتاسىنداعى ءىرى جوبالار ىسكە قوسىلدى.
مەملەكەت باسشىسى ءوز سوزىندە يندۋستريالاندىرۋدىڭ جۇيەلى قايتارىمى بولا باستاعانىن اتاپ ءوتتى.
- ءبىزدىڭ جۇمساعان شىعىستارىمىز الدەن- اق ەل بيۋدجەتىنە تريلليونداعان تەڭگە تۇرىندە قايتىپ جاتىر. شىن مانىسىندە، وندىرىستىك جانە الەۋمەتتىك- ەڭبەك قاتىناستارىنىڭ ХХІ عاسىر سۇرانىسىنا ساي جاڭا ۇلگىسى قالىپتاسۋدا. ءبىز بۇكىل ەكونوميكانىڭ قۇرىلىمىن وزگەرتۋ باعىتىندا باتىل قادام جاسادىق. قازاقستانداعى ءارتاراپتاندىرۋ ءسوز جۇزىندە ەمەس، ءىس جۇزىندە باستالدى. ءبىز وڭدەۋشى ونەركاسىپ كولەمىنىڭ ءوسۋ قارقىنىنىڭ ءداستۇرلى ءوندىرۋشى سالالارعا قاراعاندا الدەقايدا جوعارى بولۋىنا قول جەتكىزدىك، - دەدى قازاقستان پرەزيدەنتى.
نۇرسۇلتان نازاربايەۆ باعدارلاما قورىتىندىلارىنىڭ ساندىق كورسەتكىشتەرىنە توقتالدى.
- تاۋ- كەن ءوندىرۋ سالاسىنىڭ ءى ج ءو- دەگى ۇلەسى 16,5 پايىزعا ازايدى. 5 -جىلدا بۇعان دەيىن قازاقستاندا وندىرىلمەگەن، مۇلدە جاڭا 400 ءونىم ءتۇرى يگەرىلدى. وڭدەۋشى سەكتور قازاقستان تاۋەلسىزدىگىن العاننان بەرگى ۋاقىتتا ەكونوميكاعا سالىنعان بارلىق شەتەلدىك ينۆەستيتسيانىڭ 70 پايىزىن دەرلىك ءبىرىنشى بەسجىلدىقتا الدى. بارلىعى 770 تەن استام جاڭا كاسىپورىن ىسكە قوسىلدى. جۇمىسشىلارى جوعارى بىلىكتى، ەڭبەكاقىسى لايىقتى، مۇلدە جاڭا دەڭگەيدەگى 75 مىڭ تۇراقتى جۇمىس ورنى قۇرىلدى. بۇگىندە ونەركاسىپتىك سەكتوردا جۇمىس ىستەيتىن قازاقستاندىقتاردىڭ جالپى سانى 1 ميلليوننان اسادى، - دەدى مەملەكەت باسشىسى.
قازاقستان پرەزيدەنتى وتاندىق ەكونوميكا جاھاندىق داعدارىستىڭ كۇردەلى جاعدايىندا تيىمدىلىك كورسەتكەنىن ايتتى.
- وڭدەۋشى ونەركاسىپتە ەڭبەك ونىمدىلىگى 60 پايىزعا جۋىق ءوستى. ءاربىر ەڭبەككەر جىلىنا ورتا ەسەپپەن 20 مىڭ دوللارعا ارتىق ءونىم وندىرەتىن بولدى. ەكونوميكامىزدىڭ ەنەرگيا اۋقىمدىلىعى 19 پايىزعا دەرلىك تومەندەدى، - دەدى نۇرسۇلتان نازاربايەۆ.
رەسپۋبليكادا جاڭا سالا قالىپتاسىپ، زاماناۋي ينفراقۇرىلىم جاسالدى، بۇل جالپى يندۋسترياعا سەرپىن بەرەدى.
- قازاقستانعا الەمنىڭ ءىرى يندۋستريالىق الپاۋىتتارى - Airbus, General Electric, Alstom, Eurocopter، Toyota, Ssang Yong, LG جانە باسقالارى كەلدى. قازاقستاننىڭ تيتانى قازىردىڭ وزىندە ەۋروپالىق Airbus اۆياقۇراستىرۋشى كونتسەرنى سۇرانىسىنىڭ 15 پايىزىن وتەۋى - ايتارلىقتاي كورسەتكىش. سونىمەن قاتار، يندۋستريالاندىرۋدىڭ ينفراقۇرىلىمدىق بازاسى ەداۋىر ۇلعايدى. 4 مىڭ شاقىرىمعا جۋىق اۆتوكولىك جولى جانە 1700 شاقىرىم تەمىرجول قايتا جوندەلدى نەمەسە سالىندى. سوڭعى بىرنەشە جىل كولەمىندە الەمنىڭ ەشبىر جەرىندە وسىنشاما ۇزاق كولىك كوممۋنيكاتسيالارى سالىنعان جوق، - دەدى قازاقستان پرەزيدەنتى.
نۇرسۇلتان نازاربايەۆ ءبىرىنشى ونەركاسىپتىك بەسجىلدىقتى تابىستى جۇزەگە اسىرۋ جاڭا دەڭگەيدەگى مىندەتتەردى شەشۋدى قاجەت ەتكەنىن، سونىڭ بارىسىندا تاجىريبە جيناقتالعانىن ايرىقشا اتاپ ءوتتى.
- ءبارى بىردەي ىسكە اسىپ جاتپاعانىن دا بىلەمىن. ءوزىم دە مينيسترلەردى، اكىمدەردى، ۇلتتىق كومپانيالاردى تالاي رەت سىنعا الدىم. ءبىراق «جەڭىل بولادى» دەپ تە ەشكىم ۋادە بەرگەن جوق. الەمدىك تاجىريبە تابىستى يندۋستريالاندىرۋ بەلگىلى ءبىر ۋاقىت الاتىن اۋىر ءۇردىس ەكەنىن كورسەتىپ وتىر. بۇل ءۇشىن جاڭا كادرلار، جاڭا ماماندىقتار قاجەت، - دەدى مەملەكەت باسشىسى.
نۇرسۇلتان نازاربايەۆ بارلىق ازاماتتاردىڭ اسىرەسە قازىرگىدەي جاعدايدا ەكونوميكانى دامىتۋعا ەڭبەگىمەن ۇلەس قوسۋى ماڭىزدى ەكەندىگىن ايتتى.
- جاھاندىق داعدارىس كەزەڭى - ماسىلداردىڭ ۋاقىتى ەمەس. ءبىز - ەڭبەك ەلىمىز. ءبىزدىڭ مىندەتىمىز حالىقتى جۇمىسپەن قامتاماسىز ەتۋ بولىپ سانالادى. مەن ەڭبەگىمەن دارالانعان جۇمىسشىلار مەن شارۋالارعا عانا ارنالعان، ءۇش دارەجەدەن تۇراتىن ارنايى ەڭبەك داڭقى وردەنىن تاعايىنداۋعا شەشىم قابىلدادىم. ونىڭ ءۇش دارەجەسىن العان ادامنىڭ مارتەبەسى ەڭبەك ەرىنە تەڭەسەتىن بولادى، - دەدى قازاقستان پرەزيدەنتى.
نۇرسۇلتان نازاربايەۆ ەڭ دامىعان 30 ەلدىڭ قاتارىنا ۇمتىلۋشى مەملەكەت رەتىندە قازاقستانعا الەۋمەتتىك سىن- قاتەرلەرگە توتەپ بەرۋ كەرەك بولاتىنىن اتاپ ءوتتى.
- قازاقستان ەكونوميكاسىنىڭ ءوسىمىن 6 پايىز دەڭگەيىندە قامتاماسىز ەتۋ ءۇشىن جىل سايىن شامامەن 100 مىڭ جۇمىس ورنىن قۇرۋ كەرەك. وڭدەۋشى يندۋستريا جوعارى كاسىبي قىزمەتتىڭ 80 پايىزىن تۇتىنادى. يندۋستريالىق سەكتورداعى ءبىر جۇمىس ورنى ءىس جۇزىندە قىزمەت كورسەتۋ سەكتورىنداعى 3 تەن 5 كە دەيىن جۇمىس ورنىن قۇرادى. سول سەبەپتى يندۋستريالاندىرۋ باعدارلاماسى ارقىلى جىل سايىن 30 مىڭنان 50 مىڭعا دەيىن ساپالى جۇمىس ورنى قۇرىلۋى ءتيىس. سونىمەن قاتار، ەكونوميكالىق ءوسىم دەگەنىمىز جۇمىس ورىندارىنىڭ ونىمدىلىگىن كوتەرۋ بولىپ سانالادى، - دەدى مەملەكەت باسشىسى.
قازاقستان پرەزيدەنتىنىڭ اتاپ وتكەنىندەي، ەلىمىز جاھاندىق ەكونوميكا كەزىگىپ وتىرعان قيىندىقتارعا قاراماستان، 2015 - جىلعا وسىممەن قادام باسادى.
- بىرنەشە كۇننەن كەيىن يندۋستريالىق- يننوۆاتسيالىق دامۋدىڭ ەكىنشى بەسجىلدىعىن جۇزەگە اسىرۋ باستالادى. سوعان وراي، ۇكىمەت يننوۆاتورلاردى مەملەكەتتىڭ قالاي كوتەرمەلەي الاتىنىن قاراستىرعانى ءجون. ولاردى وقىتۋ كەرەك، ناتيجەسى جەمىستى بولادى. بالكىم، لايىقتى يننوۆاتسيا ازىرلەگەندەرگە ارنايى مەملەكەتتىك سىيلىق تاعايىنداپ، ماراپاتتاۋ ارقىلى ۇلگى ەتۋ كەرەك شىعار، - دەدى نۇرسۇلتان نازاربايەۆ.
مەملەكەت باسشىسى ەكونوميكا سالاسىندا ءورشىل مىندەتتەردى جۇزەگە اسىرۋعا ۇمتىلعان ءجون ەكەنىن ايتتى.
- 2020 -جىلعا قاراي جوعارى تەحنولوگيالىق ءونىم ۇلەسى ءى ج ءو- ءنىڭ 1,5 پايىزىنان 5 پايىزىنا دەيىن ءوسۋى ءتيىس. كاسىبي، عىلىمي جانە تەحنيكالىق قىزمەتتەر سەكتورى بۇگىنگى 8 دەن 20 پايىزعا دەيىنگى ءوسىمدى قامتاماسىز ەتۋى قاجەت، ەڭ باستىسى - ول جەكەمەنشىك سەكتورداعى يننوۆاتسيانى دامىتۋ ەسەبىنەن جاسالعانى ءجون. بۇل مىندەتتەرگە جەتۋ جولىنداعى نەگىزگى تۇعىر نازاربايەۆ ۋنيۆەرسيتەتىنىڭ «استانا بيزنەس كامپۋس» عىلىمي پاركى مەن «الاتاۋ» يننوۆاتسيالىق تەحنولوگيالار پاركى بولادى، - دەدى قازاقستان پرەزيدەنتى.
نۇرسۇلتان نازاربايەۆ رەسپۋبليكادا جاڭا وڭدەۋشى كاسىپورىندار قۇرۋ قاجەتتىگىنە، وعان شەتەلدىك كاپيتالدىڭ قاتىستىرىلۋ جايىنا توقتالدى.
- ءسىرا، بىزگە جاڭا مۇناي وڭدەۋ زاۋىتىن جانە مۇناي- گاز سالاسىنىڭ بىرنەشە ءىرى كاسىپورنىن سالۋ قاجەت بولار. قىمباتقا تۇسەتىندىگىنە قاراماستان، ولار حيميا ءونىمىنىڭ بارلىق باعىتىن قامتىپ، گازدان ءدارى- دارمەككە، كيىمنەن پوليەتيلەنگە دەيىنگىنىڭ ءبارىن شىعارادى. سونداي- اق قازاقستاندا بۇكىل الەمگە قاجەت كابەل ءونىمىنىڭ تولىق تسيكلىن قامتيتىن جاڭا مىس قورىتۋ كومبيناتىن سالۋعا تىرىسۋ كەرەك. جالپى العاندا شارۋا كوپ، يندۋستريا وسى جولمەن جۇرۋگە ءتيىس. ۇكىمەت الدىنا قوياتىن مىندەتىم - جاڭا 5 وڭدەۋ زاۋىتىن سالۋ ءۇشىن قازاقستانعا ەڭ كەمى 5 ءىرى ترانسۇلتتىق كورپوراتسيانى تارتۋ، - دەدى مەملەكەت باسشىسى.
قازاقستان پرەزيدەنتى بۇگىندە جالپى ۇلتتىق جانە جەرگىلىكتى دەڭگەيدە ناقتى ينفراقۇرىلىمدىق دامۋ نىساندارى ايقىندالىپ، ءتيىستى قاراجات بولىنگەنىن اتاپ ءوتتى.
- ءاربىر جاۋاپتى مينيستر مەن ۆيتسە- پرەمەردىڭ، اۋماق اكىمىنىڭ، مەردىگەر كومپانيا باسشىسىنىڭ جۇمىس كۇنى قۇرىلىس جۇمىستارىنىڭ جانە قاراجاتتى ءتيىمدى پايدالانۋدىڭ ينسپەكتسياسىن جاساۋدان باستالۋى ءتيىس. ينفراقۇرىلىمدىق جوبالار جونىندەگى بارلىق كەڭەستەردى شەنەۋنىكتەردىڭ جىلى كابينەتىندە ەمەس، قۇرىلىس الاڭدارىندا وتكىزۋ قاجەت. تەك سوندا عانا ناتيجە بولادى جانە قازاقستاندىقتاردىڭ بيلىككە سەنىمى ارتادى، - دەدى نۇرسۇلتان نازاربايەۆ.
سونىمەن قاتار قازاقستان پرەزيدەنتى «التىن ساپا» جانە «پارىز» ۇلتتىق بايقاۋلارىنىڭ بارلىق قاتىسۋشىلارىن قۇتتىقتاپ، ولار پاتريوتيزمنىڭ ارتا تۇسكەنىن، قازاقستان بيزنەسىنىڭ تابىسىن، كەلەشەگى بار ەكەنىن كورسەتىپ وتىرعانىن اتاپ ءوتتى.
- بۇل - ەلدىڭ ۇدەمەلى ەكونوميكالىق ءوسىمىن ناقتى كومپانيالار مەن بيزنەسمەندەردىڭ ۇلەسىن باعالاۋ ارقىلى ءدال كورسەتىپ بەرەتىن بارومەتر، - دەدى قازاقستان پرەزيدەنتى.
نۇرسۇلتان نازاربايەۆ وتاندىق كاسىپورىندار ءوز جۇمىسى، يندۋستريالاندىرۋعا قاتىسۋى ارقىلى ەل ەكونوميكاسىنىڭ دا، الەۋمەتتىك سالاسىنىڭ دا نىعايۋىنا ۇلەس قوسىپ وتىرعانىنا توقتالدى.
- تەك «پارىز» جۇلدەسى بايقاۋىنا قاتىسۋشىلاردىڭ ءوزى جالپى سوماسى 152 ميلليارد تەڭگە بولاتىن 440 الەۋمەتتىك جوبانى ىسكە اسىردى. «التىن ساپا» جۇلدەسى تاعايىندالعان كۇننەن بەرگى نەبارى 9 -جىلدا بايقاۋعا قاتىسۋشىلاردىڭ جالپى سانى 6 ەسە ءوستى. بۇگىندە ۇلتتىق بايقاۋلاردىڭ بارلىق جەڭىمپازدارى مەن قاتىسۋشىلارى، جاڭا كاسىپورىنداردىڭ قۇرىلىسشىلارى مەن ەڭبەك ۇجىمدارى - ناعىز جالپىعا ورتاق ەڭبەك قوعامىنىڭ العاشقى قارلىعاشتارى، - دەدى مەملەكەت باسشىسى.
ءىس- شارا اياسىندا مەملەكەت باسشىسى «پارىز» بايقاۋىنىڭ باس جۇلدەسىن «قازگەرمۇناي» ب ك» ج ش س- عا تاپسىردى. بۇدان بولەك، «التىن ساپا» بايقاۋىنىڭ «2014 - جىلدىڭ وندىرىستەگى ۇزدىك يننوۆاتسيالارى» ارناۋلى جۇلدەسىنە شىعىس قازاقستان وبلىسىنداعى «پوسۋك تيتانيۋم» ج ش س، «2014 - جىلدىڭ ۇزدىك يندۋستريالىق جوباسى» جۇلدەسىنە «اقتوبە رەلستى ارقالىق زاۋىتى» ج ش س يە بولدى.
