ن. نازاربايەۆ رەسەي مەن ۋكراينانى تەرريتوريالىق تۇتاستىقتى ساقتاي وتىرىپ، ىمىرا جول تابۋعا شاقىردى
«ماعان ۋكراينانىڭ ناقتى ۇستانىمى، رەسەي مەن ەۋروپانىڭ ۇستانىمى بەلگىلى. ەندىگى ۋاقىتتا مەن مۇنىڭ بارلىعىن دا تۇسىنەمىن. وسى ورايدا سىزدەرگە بۇل جاعدايدان شىعۋدىڭ جولى بار ەكەندىگىن ايتا الامىن. ويتكەنى، تايتالاسۋ، سانكتسيا - بۇل تۇيىققا تىرەر جول» ، دەدى ق ر پرەزيدەنتى.
سونىمەن قاتار ەلباسى ورىن الىپ وتىرعان بۇل جايتتان شىعار جول تابۋعا بولاتىنىن، ەلدەر اراسىنداعى، ونىڭ ىشىندە ۋكراينانىڭ باستى ساۋدا سەرىكتەسى بولىپ كەلگەن رەسەيمەن اراداعى ءوزارا قارىم- قاتىناستى قالپىنا كەلتىرۋ كەرەكتىگىن باسا ايتتى.
«مەن جاسىم ءارى ساياسي ءوتىلىم ۇلكەن ادام رەتىندە رەسەيگە دە، ۋكرايناعا دا وسىناۋ جاعدايدان ۋكراينانىڭ تەرريتوريالىق تۇتاستىعىن ساقتاپ، قازىرگى ۇستانىمداردى جاقىنداتا وتىرىپ شىعاتىن ىمىرا جول تابۋدى ويلاستىرۋعا ۇندەيمىن. ويتكەنى، بۇل جايت نونسەنس، ول دۇرىس ەمەس» ، - دەدى ن. نازاربايەۆ.
«ۋكراينا حالقى ءۇشىن سۇمدىق جايت ورىن الدى. ەشكىم دە ىشكى قاقتىعىستىڭ، ازاماتتىق سوعىستىڭ بولارىن ويلاپ كورگەن ەمەس. جالپى، سوڭعى جىلداردا مايداندا وقيعالار تولاسسىز ورىن الۋدا. ەكونوميكانى كوتەرىپ، ادامداردىڭ ءومىرىن جاقسارتۋدىڭ ورنىنا سىزگە وسىمەن اينالىسۋعا تۋرا كەلدى»، - دەدى ق ر پرەزيدەنتى پ. پوروشەنكوعا قاراتا.
وسى رەتتە ەلباسى قازاقستاننىڭ سوڭعى جيىرما جىلداعى جەتىستىكتەرىنە كەڭىنەن توقتالىپ، وسى ۋاقىتتا ەڭبەك ونىمدىلىگى جان باسىنا شاققاندا 600 دوللاردان 14 مىڭ دوللارعا دەيىن كوتەرىلگەنىن باسا ايتتى.
«ءبىز وسى ارالىقتا استانانى سالدىق، ەلىمىزدىڭ بارلىق ءوڭىرىن كوتەردىك. يندۋستريالاندىرۋ اياسىندا ءتورت جىل ىشىندە 700 كاسىپورىن سالدىق. مۇنىڭ بارلىعى دا كوپ ۇلتتى قازاقستانداعى بەيبىتشىلىكتىڭ، تىنىشتىقتىڭ ارقاسى. ۋكرايناعا دا سونى تىلەيمىن. تەك بەيبىتشىلىك، تۇراقتىلىق بولعاندا عانا ءومىر ءۇشىن جايلى جاعداي جاساۋعا بولادى»، - دەدى مەملەكەت باسشىسى.
اۆتور: مارلان جيەمباي
