ق ر پرەزيدەنتى: قازاقستاننىڭ باسەكەلەستىككە توتەپ بەرە الاتىن باستى ەرەكشەلىگى - كەن بايلىعى
بۇل تۋرالى ەلىمىزدىڭ جەتەكشى تەلەارنالار جۋرناليستەرىنە بەرگەن سۇحباتىندا ق ر پرەزيدەنتى نۇرسۇلتان نازاربايەۆ ايتتى.
«قازاقستاننىڭ مۇنايى، گازى، ءتۇستى جانە قارا مەتالدارى، باسقا دا مينەرالدارى ەڭ ءبىرىنشى بايلىعى، ەكىنشى - ءبىزدىڭ كەڭ دالامىز، وندا وسەتىن استىق پەن مال. قازىر ءبىز دۇنيە جۇزىندە ۇن ساتۋدان ءبىرىنشى- ەكىنشى ورىندامىز. ۋران بويىنشا دا ءبىرىنشى- ەكىنشى ورىندامىز. حروم ساتۋدا ەڭ ۇزدىك ەلدەردىڭ اراسىندامىز. ءبىزدىڭ ەرەكشەلىكتەرىمىز قازىرگى ۋاقىتتا - وسى» ، - دەدى مەملەكەت باسشىسى.
مۇنىمەن قاتار، پرەزيدەنت ەلىمىز بولاشاقتا قانداي باعىتتا دامۋ كەرەكتىگىن تىلگە تيەك ەتتى.
«ءبىزدىڭ يندۋستريالاندىرۋ باعدارلاماسىن، وڭدەۋ ءوندىرىسىن شىعارىپ وتىرعانىمىز نەلىكتەن؟ بولاشاقتا باسقا دا تاۋارلاردى سىرتقا شىعارۋىمىز قاجەت. اۋىل شارۋاشىلىعىنا كەلەر بولساق، ءبىز ءبيدايدى وڭدەپ، تەك ءبيداي مەن ۇندى عانا ساتپاي، ناندى دا، كەسپەنى دە، باسقانى دا شەتەلدەرگە شىعاراتىن بولساق، ال ەتتى جاي ەت تۇرىندە عانا ساتپاي، نەشە ءتۇرلى شۇجىقتار مەن ەت تاعامدارىن جاساپ ساتاتىن بولساق؛ كيىم تىگەتىن بولساق؛ وندىرىستە نەشە ءتۇرلى ماشينالار جاسايتىن بولساق، سوندا عانا پايدا كورەمىز. سوندىقتان، يندۋستريالىق باعدارلامادا ەڭ الدىمەن مۇناي مەن گازدى وڭدەۋ زاۋىتتارىن سالۋ كەرەك» ، - دەپ ءتۇسىندىردى ن. نازاربايەۆ.
مەملەكەت باسشىسىنىڭ ايتۋىنشا، بۇگىننىڭ وزىندە ەلىمىزدە قۇراستىرىلعان اۆتوكولىكتەر، تەپلوۆوزدار ەكسپورتتالا باستادى. سونىمەن قاتار، قىتاي حالىق رەسپۋبليكاسىمەن بىرلەسكەن 15-20 شاقتى زاۋىتتار سالۋعا كەلىسسوزدەر جۇرگىزىلىپ جاتىر جانە ولاردىڭ بارلىعى وڭدەۋ ونەركاسىبى سالاسىندا بولماق.
