ورىس تىلدىلەر كوشەدەگى قازاقشا سوزدەردىڭ جانىنا ورىسشالاپ اۋدارۋدىڭ رەتى جوق ەكەنىن العا تارتۋدا - دوس كوشىم
بۇل تۋرالى بۇگىن استانادا «قازاقستاننىڭ بولاشاعى - قازاق تىلىندە» اتتى مەملەكەتتىك ءتىلدى ناسيحاتتاۋ شاراسىنىڭ قورىتىندىسىنا ارنالعان باسپا ءسوز ءماسليحاتىندا ساياساتتانۋشى دوس كوشىم ءمالىم ەتتى.
بۇل جوبا اياسىندا ەلىمىزدىڭ سولتۇستىك وڭىرلەرىندە ورىس ءتىلدى ازاماتتارعا مەملەكەتتىك ءتىلدى ناسيحاتتاۋ شارالارى قامتىلدى.
وسى ورايدا ءبىرقاتار اۋدانداردا جەرگىلىكتى تۇرعىنداردىڭ، بەلگىلى قوعام قايراتكەرلەرىنىڭ، تىلدەردى دامىتۋ باسقارمالارى وكىلدەرىنىڭ قاتىسۋىمەن پىكىر الماسۋلار ۇيىمداستىرىلدى. جوبانىڭ بارلىق شارالارىنا بەلگىلى قوعام قايراتكەرى د. كوشىم جەتەكشىلىك ەتتى.
«وسى تالقىلاۋلار كەزىندە شىندىعىندا مەن كۇتپەگەن تاماشا ۇسىنىستاردى ەستىدىم. ماسەلەن، وزگە ۇلت وكىلى پىكىر الماسۋلار كەزىندە «نەگە ۇ ب ت (مەملەكەتتىك جوعارلاپ وقۋ ەمتيقانى) تاپسىرعان كەزدە قازاق تىلىنەن العان بالل وقۋعا تۇسكەن كەزدە ەسەپتەلمەيدى؟» دەگەن ساۋال قويدى. ونىڭ ايتۋىنشا، بالاسى قازاق ءتىلىن جاقسى مەڭگەرگەن جانە تەستىلەۋ كەزىندە جوعارى بالل جيناعان ەكەن»، - دەيدى ساياساتتانۋشى.
د. كوشىمنىڭ سوزىنە قاراعاندا، شارا اياسىنداعى جيىندار كەزىندە ورىس ءتىلدى ازاماتتار كوشەدەگى جازۋلاردى تەك قازاق تىلىندە عانا جازۋ تۋرالى ۇسىنىستار جاساعان.
«ەلىمىزدىڭ سولتۇستىك وڭىرلەردى ارالاعان كەزدە ورىس ۇلتىنىڭ وكىلى «نەلىكتەن دۇكەندەردە «نان» دەگەن ءسوزدىڭ جانىنا ورىسشالاپ «حلەب» دەگەن اۋدارماسىن جازىپ قوياسىڭدار» دەگەن رەنىشىن ايتتى. بۇل تۇرعىدا ول كوپتەگەن جىلدار بويى قازاقستاندا تۇرعاندىقتان، بۇنداي قاراپايىم سوزدەردى كەز كەلگەن وزگە ۇلت وكىلدەرى بىلەتىندىگىن العا تارتىپ وتىر. سونىمەن قاتار ولار كوشە اتاۋلارى جازىلعان تاقتاشالار ماسەلەسىن كوتەردى. مىسالى، كوشەدەگى تاقتاشادا «مۇحتار اۋەزوۆ» اتاۋى جازىلىپ تۇرسا، ونىڭ استىندا ورىسشالاپ جازىلعان نۇسقاسى بەرىلەدى. وسى ورايدا ورىس تىلدىلەر «ءبىز وسىنشا اقىماق ەمەسپىز، مۇحتار اۋەزوۆتىڭ كىم ەكەنىن بىلەمىز» دەگەن ۋاجدەرىن ايتىپ جاتتى»، - دەدى ساياساتتانۋشى.
اۆتور: رۋسلان عابباسوۆ
