ۇكىمەت كاسىپكەرلىك قىزمەتتى جاقسارتاتىن زاڭ جوباسى بويىنشا دەپۋتاتتارمەن سىندارلى ديالوگقا دايىن - ب. ساعىنتايەۆ

استانا. قازاقپارات - ۇكىمەت كاسىپكەرلىك قىزمەتتى جاقسارتۋعا باعىتتالعان زاڭ جوباسى بويىنشا دەپۋتاتتارمەن سىندارلى ديالوگقا دايىن.

 بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپكەرلىك قىزمەتتى تۇبەگەيلى جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا ق ر پرەمەر- ءمينيستردىڭ ءبىرىنشى ورىنباسارى باقىتجان ساعىنتايەۆ وسىلاي مالىمدەدى.

 ەسكە سالا كەتەيىك، ماجىلىستە اتالعان زاڭ جوباسى بويىنشا جۇمىس كەڭەسى ءوتىپ، وعان ءماجىلىس ءتوراعاسىنىڭ ورىنباسارى، «نۇر وتان» پارتياسى فراكسياسىنىڭ جەتەكشىسى داريعا نازاربايەۆا، پالاتانىڭ كوميتەت ءتوراعالارى، ق ر پرەمەر- ءمينيسترىنىڭ ءبىرىنشى ورىنباسارى باقىتجان ساعىنتايەۆ قاتىستى.

 توقتالا كەتەتىن جايت، قۇجات بۇعان دەيىن ماجىلىستە ءبىرىنشى وقىلىمدا تۇجىرىمدامالىق تۇردە ماقۇلدانعان بولاتىن. ۆيسە- سپيكەر داريعا نازاربايەۆانىڭ سوزىنە قاراعاندا، قازىر زاڭ جوباسى وتە بەلسەندى تالقىلانۋ ۇستىندە. سونىمەن قاتار، ەلباسى تاپسىرماسىنا سايكەس، قۇجات اعىمداعى جىلدىڭ سوڭىنا دەيىن قابىلدانىپ، كەلەسى 2015 - جىلدىڭ 1 - قاڭتارىنان باستاپ كۇشىنە ەنۋى كەرەك. «ۋاقىت تىم از. قازىردىڭ وزىندە دەپۋتاتتاردان 1293 ۇسىنىس كەلىپ ءتۇستى، ولاردىڭ 766 سى قابىلدانسا، 115 قابىلدانعان جوق، ال قالعان 412 ۇسىنىس ءالى تالقىلانىپ جاتىر. زاڭ جوباسى ەكىنشى وقىلىمدا 10 - جەلتوقسان كۇنى قارالادى دەپ جوسپارلانعان. وسىعان وراي، ۇكىمەت باسشىسىنىڭ ءبىرىنشى ورىنباسارىن شاقىرىپ، تۇيتكىلدى ماسەلەلەرگە تۇسىنىك بەرۋدى سۇراعانبىز»، - دەدى د. نازاربايەۆا.

ءوز كەزەگىندە ب. ساعىنتايەۆ زاڭ جوباسىنىڭ تىم كۇردەلى ەكەنىن ايتا كەلە، بۇل باعىتتا دەپۋتاتتارمەن سىنداردى ديالوگقا دايىن ەكەنىن العا تارتتى. «ماعان ارىپتەستەرىم زاڭ جوباسىنىڭ كوميتەتتەردە قالاي تالقىلانىپ جاتقانى تۋرالى كۇن سايىن بايانداپ وتىرادى. وسى باعىتتا دەپۋتاتتارمەن بىرلەسە جۇمىس ىستەپ، بارلىق سۇراقتارعا جاۋاپ بەرۋگە، قۇجاتتى ىلگەرىلەتۋ ءۇشىن ماسەلەلەردى جان- جاقتى قاراستىرۋعا دايىنبىز. مەن ۆيتسە- پرەمەر رەتىندە جاۋاپكەرشىلىكتى ءوز موينىما الامىن: زاڭ جوباسىنىڭ العا قاراي وتۋىنە كەدەرگى ماسەلەنىڭ بارلىعى الىنىپ تاستالادى»، - دەدى ب. ساعىنتايەۆ.

 ەسكە سالا كەتەيىك، زاڭ جوباسى ەلباسىنىڭ پارلامەنتتىڭ ءتورتىنشى سەسسياسىنىڭ اشىلۋى بارىسىندا بەرگەن تاپسىرمالارىن ورىنداۋ ماقساتىندا ازىرلەنگەن. بۇل رەتتە قۇجات مەملەكەتتىك باقىلاۋدى جەتىلدىرۋ، كاسىپكەرلىك سۋبەكتىلەرىن جوسپارلى تەكسەرۋدى جويۋ جانە جاڭا ءتاسىلدى انىقتاۋ ەسەبىنەن تاۋەكەلدەردى باعالاۋ نەگىزىندەگى تەكسەرۋلەردى ۇيىمداستىرۋعا كوشۋدى قاراستىرادى.

اۆتور: قانات مامەتقازى ۇلى