ن. نازاربايەۆ قازاقستاننىڭ ت م د-عا ءتوراعالىعى كەزىندەگى باسىمدىقتاردى اتادى

مينسك. قازاقپارات - بۇگىن مينسكىدە وتكەن ت م د مەملەكەت باسشىلارى كەڭەسىنىڭ كەڭەيتىلگەن قۇرامداعى وتىرىسى بارىسىندا ەلباسى نۇرسۇلتان نازاربايەۆ قازاقستاننىڭ ت م د-عا ءتوراعالىعى كەزىندەگى باسىمدىقتاردى اتادى.

«ءبىزدىڭ قوعامداستىقتىڭ قىزىعۋشىلىعىن تۋدىراتىن بارلىق وزەكتى ماسەلەلەردى تالقىلاپ، پىكىر الماستىق. ودان ارى دامۋ ءۇشىن قاجەتتى قادامداردى بەلگىلەدىك. وتىرىس قورىتىندىسى بويىنشا شەشىم ازىرلەدىك. قازىر وعان ءبىز قول قويامىز. مەملەكەت باسشىلارىنىڭ شەشىمى بويىنشا 2015-جىلى ت م د ءتوراعالىعى قازاقستانعا وتەتىن بولادى. ءبىزدىڭ ءتوراعالىقتىڭ ناقتى ءبىرقاتار باسىمدىقتارىنا توقتالعىم كەلەدى»، - دەدى ەلباسى.

مەملەكەت باسشىسىنىڭ اتاپ وتۋىنشە، بىرىنشىدەن، قازاقستان ءوز ءتوراعالىعى كەزىندە دوستاستىقتاعى سەنىم مەن ءوزارا تۇسىنىستىكتى نىعايتۋعا، ت م د كەڭىستىگىندەگى تۇراقتىلىق پەن قاۋىپسىزدىكتى قولداۋعا باعىتتالعان باستامالارعا جاردەمدەسۋگە كۇش سالاتىن بولادى.

«ەكىنشىدەن، ساۋدا-ەكونوميكالىق ءوزارا ءىس-قيمىلدى تەرەڭدەتۋ. بۇل ءبىز قول قويعان ەركىن ساۋدا ايماعى تۋرالى شارتتىڭ الەۋەتىن ارتتىرادى. ونەركاسىپ، ەنەرگەتيكا، كولىك، اگرارلىق جانە ەكونوميكانىڭ باسقا دا سالالارىنداعى ىنتىماقتاستىقتى جانداندىرۋ بويىنشا شارالار قابىلدانادى. ءبىز بۇل باعىتتارعا سايكەسىنشە ءمان بەرمەكپىز»، - دەدى ق ر پرەزيدەنتى.

ەلباسىنىڭ سوزىنە قاراعاندا، ۇشىنشىدەن، عىلىم، ءبىلىم، سپورت، تۋريزم جانە جاستار ساياساتى سالالارىنداعى ىنتىماقتاستىقتى دامىتۋدى قوسا العاندا مادەني-گۋمانيتارلىق بايلانىستار نىعايتىلاتىن بولادى.

اۆتور: مارلان جيەمباي