مەن كەزىندە گورباچەۆكە قىتايدىڭ نارىقتىق رەفورماسىنان ۇلگى الۋعا كەڭەس بەردىم - ەلباسى
«ءداستۇرلى مەملەكەتتىك باسقارۋ جەكە مەنشىكپەن سالىستىرعاندا تيىمدىلىگى تومەنىرەك دەپ سانالدى. مۇنى ءبىز كەڭەس وداعىنىڭ «كوماندالىق باسقارۋى» ىدىراعاننان كەيىن ءوز باسىمىزدان وتكەردىك.
مەن كەڭەستىك كەزەڭدىك جۇيەدە جۇمىس ىستەي ءجۇرىپ، «سوتسياليزمدى تۇزەتە وتىرىپ، العا قاراي جۇرە بەرۋگە بولادى» دەگەنگە ساياتىن گورباچەۆ رەفورماسىن سىناعانداردىڭ ءبىرى بولاتىنمىن. ءتىپتى ونىڭ «سوتسياليزم - ادامي كەلبەتپەن» دەگەن ءسوزى دە بار ەدى. مۇنى ەشكىم دە تۇسىنگەن ەمەس، بۇنى نەگىزىنەن ول ەكونوميكاعا جاقىنداستىرىپ ايتقىسى كەلگەن دە شىعار. ءبىراق، مەملەكەتتىك كومپانيا كورپوراتيۆتىك نارىقتىق قاعيداتتارعا سۇيەنە وتىرىپ جۇمىس ىستەسە، وندا پروبلەمالاردى تابىستى شەشۋگە بولاتىن ەدى. وسىنى ەسكەرگەن جوق» ، - دەدى ن. نازاربايەۆ.
بۇل رەتتە پرەزيدەنت اتالعان ماسەلەنىڭ جارقىن مىسالى رەتىندە شىعىستاعى كورشىلەس قىتايدىڭ مەملەكەتتىك كومپانيالارىن اتاپ ءوتتى. «ءبىر كەزدەرى گورباچيەۆتىڭ قايتا قۇرۋلارى ءبىر ورىندا تابانداپ تۇرىپ، ونىڭ ەشقانداي دا جەتىستىگى بولمايتىنى اڭعارىلا باستاعاندا، ونىڭ جانىنداعى جاقىن ادامداردىڭ ءبىرى بولاتىنمىن، ماعان كوپ كەڭەستەر بەرىپ، ۇزاق تۇسىندىرۋگە تۋرا كەلدى. مەن «اقىرى ەشقانداي باعدارلاما مەن ستراتەگيا بولماسا، قىتايعا قارالىق» دەپ كەڭەس بەردىم. ويتكەنى، قىتايدا تۋرا سول كەزدەگى كەڭەس وداعىنداعىداي مەملەكەتتىك قۇرىلىم بولاتىن، باسشىلىق كۇش كوممۋنيستىك پارتيانىڭ قولىندا بولدى. بۇل پارتيا ءتارتىپتىڭ ناعىز قاڭقاسى (كاركاسى) ىسپەتتەس ەدى. وسى ارقىلى ورتالىق كوميتەتتىڭ قاۋلىسىمەن- اق كومپارتياعا نارىقتىق رەفورما جۇرگىزۋگە بۇيىرسا، ول جۇرگىزىلەتىن ەدى. ءتارتىپ سونداي بولاتىن. بۇعان ول (گورباچيەۆ- اۆت. ) كونبەدى، قىتاي دەگەن ءبىز ءۇشىن كىم دەگەندەي بولدى. ال شىندىعىندا، ءدال سول قىتايدا جۇرگىزىلگەن رەفورمالار جاقسى ناتيجە بەرگەن بولاتىن»، - دەدى ن. نازاربايەۆ.
اۆتور: قانات مامەتقازى ۇلى
